شمال حوزهسیده خبرچیلر نینگ مصونیت کمیتهسی مسئولی عبداللطیف سهاک نینگ ایتیشیچه، بلخ ده «نهاد» محلی رادیوسی ۱۶ ییل دن کیین فعالیتینی توختهتگن.
نهاد رادیوسی نینگ نشراتی مسئولی سیدمحمد یزدانپرست نینگ سلاموطندار گه ایتیشیچه، مذکور رادیو اقتصادی قیینچیلیک، بلخ ده برق نرخی یوقاریلیگی و حکومت تامانیدن حمایتی دستورلری یوقلیگی باعث فعالیتینی توختهتگن.
یزدانپرست نینگ کوپهیتیریشیچه، مذکور رادیو نینگ فعالیتی توختهشی بیلن، ییتتی عیال و ۱۸ ایرکک ایشسیز بولگنلر.
بیزلرنینگ فیسبوک صحیفهمیزگه باش اورینگ!
نهاد رادیوسی، ۱۳۸۶_ییل ده ۹۰.۴ تولقینی بیلن، مدنی سیما و بیلیم یورت اوقیتووچیسی نجیب پیکان تامانیدن قوریلیب و فعالیت گه باشلهگندی.
اوشبو رادیو خبری، اجتماعی، فرهنگی و هنری دستورلری بیلن، بلخ مرکزی مزارشریف شهری و مذکور ولایت نینگ قطار تومنلریده ایشتتیریلر ایدی.
شمال حوزهسیده خبرچیلر نینگ مصونیت کمیتهسی مسئولی گه کوره، مذکور رادیو فعالیتی گه دوام بیریش اوچون میدیالردن حمایت قیلووچی باشقه نهادلر اویغونلیگی بیلن سعیوحرکتلری نتیجهسیز قالگن.
شو بیلن بیرگه، بلخ معلومات و مدنیت ریاستی مسئوللری نینگ ایتیشلریچه، نهاد رادیوسی فعالیتی توختهتیلیش قراری اوشبو ریاست بیلن شریک قیلینمهگن.
باشقه تاماندن، بوگون افغانستان ایرکین میدیالریدن حمایت قیلووچی نهاد (نی)، نهاد رادیوسی فعالیتی توختهلیشی گه دایر بیر بیانیه ترقهتیب، میدیالر یاپیلیشیدن خواطردهلیگینی معلوم قیلگن.
نی بیانیهسیده کیلیشیچه، اوتگن ۲۰ ییل یوتوقلریدن بیری افغانستان ده کوپ سانده میدیالر فعالیتی دیر، ۲۰ ییل دهگی بو یوتوقلر حاضرگی شرایط ده انقراض گه دوچ بولگن.
بیزلرنینگ توییترده هم تعقیب قیلینگ!
بیانیه ده یازیلیشیچه: «میدیالر فعالیتی توختهلیشی بیلن، نه فقط ایرکین سوز و اطلاعات ساحهسی تار بولگن؛ بلکه خبرچیلر و میدیا ایشلاوچیلری ایشسیز بولیب و ایریم قیینچیلیکلر گه روپهره بولهدیلر.»
نی نینگ معلوماتی اساسیده، اولکه دهگی سیاسی اوزگریشلردن کیین افغانستان ده میدیالردن قریب یریمی فعالیتلرینی توختهتگن، میدیالر فعالیتی توختهلیشی بیلن، ۶۵ فایز دن آرتیق خبرچیلر و میدیا ایشلاوچیلری ایشسیز بولگنلر.