هېچ اویلب کورگن میسیز، یانینگیزده بولیشدن هېچ قچان چرچمهیدیگن و اېنگ مهمی دایما قولینگیز یېتهدیگن بیر دوست گه ایگه بولیشینگیز؟ مین عباس پناهی، کابل بیلیم یورتی سیاسی بیلیم فاکولته طلبهسی، بیر کون شوندهی بیر دوست بیلن تنیشدیم؛ اونینگ نامی «صنعی هوش». ایسلهیمن، بیرینچی مرته صنعی هوش دیگن نامنی بیلیم یورتده کورسداشلریم اونی حیرت بیلن محاکمه قیلهیاتگنیده ایشتگن ایدیم.
ایچیمده «البته بو هم ینگی بیر دستور بولسه کېرهک، باشقه تکنالوژی واسطهلری کبی» دیب اویلهدیم. کوپ اعتبار بیرمهدیم، بیراق سوال بیریش ایستهگی مینی تینچ قویمهدی. آخر-عاقبت تلفونیمنی آلدیم و بیرینچی مرته «صنعی هوش» پلتفرمهلریدن بیریگه کیردیم. کوتیلمهگنده، بو قدر تیزلیک، انیقلیک و بای معلوماتلر گه دوچ کیلهمن دیب اویلمهگن ایدیم. اما عادی بیر سوال یازیب، انیق، روان و بیر نیچه قتلملی جواب آلگنیمده، اوشه لحظهده خیالیمده اوچقون پیدا بولدی؛ گویا کوز اونگیمده ینگی بیر دریزه آچیلدی و مین ینگی دوستیم «صنعی هوش» همده اونینگ قولیلیکلری بیلن تنیشدیم.
«سیر محصول یاردمچی»
مین کبی دایما کتاب و مقالهلر ایزلهیدیگن، انترنتده قیدیرو قیلهدیگن طلبهلر اوچون صنعی هوش بیلن تنیشیش حیرتلنرلی بولدی. ییللر دوامیده بیرار معلومات تاپیش اوچون ساعتلر ورقلرنی ورقلردیم یا که گوگلده قیدیرردیم؛ بیراق اېندی مین بوندهی واسطهنی تاپدیم که، او بیر نیچه ثانیه ایچیده برچه سواللریمگه انیق، تولیق و تیز جواب بیرهدی؛ و بونی توشینرلی و آچیق تیل بیلن قیلهدی. شو کوندن باشلب، مین و بو سیر محصول یاردمچی» اورتهسیدهگی مناسبت باشلندی. بو ثمرهلی مناسبت و تکنالوژی عالمی گه تنیشوودهگی بوریلیش نقطهسی بولدی.
دستلب اونی کوپراق اوقوو ایشلری اوچون ایشلهتردیم؛ مثلاً قیسقچه یازیشده یا که سیاستشناسلیک دهگی مرکب توشینچهلرنی توشینتیریشده. وقت اوتیشی بیلن بیزنینگ مناسبتلریمیز کېنگهیدی. اونی تیل اورگنیش و علمی تدقیقات جریانلریده هم ایشلتدیم؛ انگلیس تیلی مشقلرینی یازیشده، علمی مقالهلر موضوعلرینی تاپیشده و بعضاق کیفیتیمنی تیکلش اوچون یاردم آلیشده. صنعی هوش استه-سیکین هېچ قچان چرچمهیدیگن، یاردم بیریشگه دایما تیار بیر همراهدیک بوله باشلهدی.
«حیرت» بیلن بیرگه «تشویش»
مینینگ صنعی هوش بیلن تنیشوویم ایکی خیل حسنی بیر وقتده آلیب کېلدی؛ بیر تاماندن بو واسطه مینگه تقدیم ایتگن قولیلیکلردن کیلیب چیققن حیرت و خورسندچیلیک، باشقه تاماندن اېسه اونگه قرهملیک، تنقیدی فکرلش و واقعهلرگه اۉز نظرینی سقلش قابلیتینینگ کمهیشیدن کېلهدیگن تشویش. مین صنعی هوشدن شونچهلیک فایدهلنسم، اویلش و تنقیدنی اونیتیب قویمسلیگیمدن و کونلردن بیر کون کتابلریم و اۉز فکریم اورنیگه همه نرسهنی صنعی هوش گه تاپشیرمسلیگیمدن خواطرده من. بو تشویشلر دایما ایچیمده موجود؛ بیراق برچه بو خواطر و شبههلر گه قرهمی، صنعی هوش بوگون مین اوچون یقین دوست و سیر محصول یاردمچی صفتیده حیاتیمنینگ بیر قسمیگه ایلندی. حیاتیمنینگ کوپ ساحهلریده اوندن مصلحت آلهمن.
بو واسطه تیل اورگهنیش و تیل اورگنووچیلر اوچون کېنگ دریزه آچدی. طلبهلر تامانیدن پلتفرمدن فایدهلنیشده هم ایریم خواطرلر منطقی دیر. حددن تشقری و آرتیقچه فایدهلنیش یاشلر و طلبهلر ایجادی کوچی و تنقیدی فکرلش قابلیتینی کمهیتیریشی ممکن. صنعی هوشدن فایدهلنیش حاضرده قبول قیلینگن بیر پرنسیپ حسابلنهدی؛ اما اوندن فایدهلنیش اصلیده «احتیاطکارلیک» و «موازنت»نی سقلش ضرور.
