استرالیا نینگ ملبورن شهریده یشه‌یدیگن دوران علی حکیمی نینگ ایتیشیچه، ۱۷ مینگ افغانی بدلی‌ده بیر بسته نی افغان پُست آرقه‌لی کابل دن ملبورن گه یوبارگن ایکن و بو بسته بیر آی گه ییتیشیشی گه قرار قیلینگن ایکن، بیراق اوشبو بسته بیر ییل دن کیین ییتیشه‌دی او هم ناقص.
مذکور بسته هزارگی دیزاین گه تیکیلگن ایکی کویلک ایکن کیم اونگه ایسکی سکه‌لر استعمال بولگن ایکن. اونینگ ایتیشیچه، بو کویلک نی بیر مراسم گه تورموش اورتاغی گه ساوغه بیریش اوچون کابل گه فرمایش بیرگن ایکن.
جناب حکیمی گه کوره، او مذکور بسته نی نیچه آی تعقیب قیلگندن کیین خسته بوله‌دی و باشقه اونینگ کیینی‌دن یورمه‌یدی. بیر ییل دن کیین ویب سایت نی چک قیلگندن کیین بو بسته استرالیا نینگ سیدنی شهری گه ییتیشگنی گه متوجه بوله‌دی.
ایکی کوندن کیین میلادی ۲۰۲۱- ییل نی فبروری آیی ده بو بسته جناب حکیمی نینگ اویی گه ییتیشه‌دی، بیراق اونینگ آچیب کورگندن کیین همه متعجب بوله‌دی. کویلک بار اما ناقص.
جناب حکیمی نینگ ایتیشیچه، مذکور کویلیککه قوللنگن سکه‌لرنینگ برچه‌سی اَیریلگن. اونگه کوره، کویلیک استعمال بولگن سکه‌لر همه‌سی قدیمی و مادی و معنونی نقطه‌ی نظردن هم ارزشلی ایکن.
صدیقه گلزار هند گه تحصیل قیله‌دیگن افغانستانلیک طلبه‌لردن بیری دیر. اونینگ ایتیشیچه، افغان پُست نینگ توجه‌سیزلیگی باعث ماسترلیککه قیلگن ایکی ییل زحمتی قریب کویب کیتماقده ایکن.
صدیقه برچه سند و حجت‌لرینی افغان پُست آرقه‌لی هند یوباره‌دی، بیراق ۴ آیدن کیین سندلر هند ییتیشمه‌یدی و یوقاله‌دی. خانم گلزار سندلرینی اسکن آلیب هند گه یوباریش گه زورلنه‌دی و هند بوییچه افغانستان ایلچی‌خانه‌سیدن نتیجه‌سینی بیلیم‌یورت دن آلیب بیریش اوچون یاردم سوره‌گن.
کابل یشاوچی‌لریدن بیری خالق امیری نینگ ایتیشیچه، افغان پُست بسته‌لرنی توغری ییتیشتیرمه‌سلیککه علاوه، رشوت هم ایسته‌یدی. جناب امیری نینگ ایتیشیچه، اوتگن ییل بیر بسته نی ۱۱ افغانی بدلی ده قولگه کیلتیرگن ایکن، بیراق بو ییل ایسه باشقه بیر بسته نی ۱۲۰ افغانی بدلی ده قولگه کیلتیرگن.
شونینگدیک یشاوچی‌لردن باشقه بیری زینب بخشی نینگ ایتیشیچه، اونملی بولگن سند و حجت‌لرینی ایکی مرته افغان پُست آرقه‌لی یوبارگن، بیراق ایکی مرته هم سندلری یوقالگن.
بو گزارش ده صحبت اوتکزیلگن برچه کیشیلرنینگ ایشانچ‌لریگه کوره، فساد و مسئوللرنینگ توجه‌سیزلیگی و افغانستان ده بیللی و دقیق آدرس بولمه‌گنی، پُستی بسته‌لرگه خیانت بولیشی نینگ اصلی دلیلی دیر.
افغان پُست اداره مسئوللری بو توغریده سوزلش اوچون حاضر بولمه‌دی.