شفاکارلرنینگ ایشانچیگه کوره، اولیملی کسللیکلر آلدی آلینیشی مقصد آنهلر و چقهلاقلر اوچون تیتانوس واکسینی تطبیق بولیشی مهم بولگنی بیرحالده؛ لیکن جوزجان ده عیاللردن قطارینینگ ایتیشلریچه، آگاهیسیزلیک، اقتصادی قیینچیلیکلر و ساغلیقنی سقلش خذمتلریدن آزراق فایدهلنیش سبب، حاضرگچه بو واکسیننی آلیشدن محروم قالگنلر. اولرنینگ کوپهیتیریشلریچه، مذکور قیینچیلیکلرگه علاوه، ناتوغری ایشانچلر هم، اوشبو واکسیندن عیاللرنینگ فایدهلنمسلیگیگه سبب بولگن مهم عامللردن دیر.
جوزجان مرکزی شبرغان شهری یشاوچیلریدن ۳۵ یاشر شمیلا و ۳۷ یاشر سودابهنینگ ایتیشلریچه، آگاهیسیزلیک سبب حاضرگچه تیتانوس واکسینینی قیلدیرمهگنلر.
شمیلانینگ ایتیشیچه: «تیتانوس واکسینی آتینی تلویزیون و اهالیدن ایشیتگنمین؛ لیکن انیق معلوماتیم یوق و قنچه مهم بولگنینی بیلمهیمن. آنهم کیچیکلیگیمده واکسین بولگنیمنی ایتدهدی؛ بیراق کته بولگنیمده واکسین قیلیش اوچون کلینیککه بارگنیم یوق.»
شونینگدیک سودابهنینگ ایتیشیچه: «اوشبو واکسین حقیده بیران نرسه ایشیتگنمین؛ لیکن کوپ معلوماتیم یوق. شونچه بیلهمن که یاشلیک پیتلریده بیر نیچه دوزینی آلگن ایدیم؛ بیراق برچهسینی آلگنیم یوق.»
شبرغان شهری یشاوچیلریدن باشقه بیری ۴۰ یاشر آرزو، اجتماعی ناتوغری ایشانچلر سبب حاضرگچه تیتانوس واکسینینی آلگن ایمس. اونینگ ایتیشیچه: «بو واکسین حقیده اهالی آغزیدن تورلیخیل نرسهلرنی ایشیتگنمین؛ بیر قطار کیشی فایدهلی دیهدی و بیر قطار کیشی ایسه ضرری بار. انه شوو سبب قنچه مهم بولگنیدن ایشانچیم یوق.»
آگاهیلیک کملیگی یانیده، ساغلیقنی سقلش مرکزلری فاصلهسی و اقتصادی قیینچیلیکلر هم، اوشبو واکسیندن عیاللرنینگ فایدهلنه آلیشی برابریدهگی جدی قیینچیلیکلردن عنوان بولهدی.
بو توغریده سمیر (مستعار آت) و آرزو (مستعار آت) نینگ ایتیشلریچه، ساغلیقنی سقلش خذمتلریدن آزراق فایدهلنه آلیش و اقتصادی قیینچیلیکلر سبب، حاضرگچه تیتانوس واکسینینی قیلدیرمهگن.
سمیرانینگ ایتیشیچه: «کلینیک اوییمیزدن اوزاقده و باریش-کیلیش اوچون پول کیرهک. انه شوو سبب، واکسین قیلدیریش اوچون باره آلمهدیم.»
شونینگدیک آرزونینگ ایتیشیچه: «کلینیک یولی اوزاق و باریب-کیلیش اوچون نقلیه واسطهمیز یوق. ساغلیقنی سقلش مرکزی یقین بولگنیده، حتمی واکسین قیلدیرهر ایدیم.»
بو آرهده، نسایی-ولادی متخصص شفاکارلری، تیتانوس واکسینی اوتکزیلیشینی عیاللر اینیقسه حاملهدار عیاللر سلامتلیگی اوچون مهم دیب و اونینگ وقتیده اوتکزیلیشیگه تاکید قیلهدیلر.
نسایی-ولادی متخصص شفاکارلردن شبانه حیدرینینگ ایتیشیچه، تیتانوس واکسینی اوتکزیلیشی آنه و چقهلاقنینگ سقلهنیشیده مهم اورینگه ایگه بولیب و اونینگ اوتکزیلمهگنی صورتده، جدی ساغلیق خوفلر جملهدن چقهلاق و حتا آنه اولیمیگه سبب بولیشی ممکن.
اونینگ کوپهیتیریشیچه: «عایلهلردن قطاری مذکور واکسیننینگ کسللیککه سبب بولهدی دیب توشینهدیلر یا-ده عایله اعضامیزده هیچ کیم واکسین قیلمهگن و بیزلر هم قیلمهیمیز دیهدیلر. مذکور توشینچهلر واکسیناسیون برابریده جدی توسیقلردن دیر.»
شوندهی بیرحالده، جوزجان ساغلیقنی سقلش ریاستی مسئوللری، اوشبو ولایتده مینگلب عیال گه واکسین تطبیق بولیشیدن خبر بیریب و اهالینینگ آگاهیلیک سطحی آشیشی اوچون اوشبو ریاست سعیوحرکتلرینی بیان قیلهدیلر.
جوزجان ساغلیقنی سقلش ریاستینینگ کتلوی معافیت مسئولی گلآقا بارکزینینگ ایتیشیچه: «ساغلیقنی سقلش ریاستی فعال ۵۹ ساغلیق مرکزی آرقهلی عیاللر گه واکسیناسیون خذمتلرینی تامین قیلگن و تورلیخیل دستورلری آرقهلی بو توغریده عایلهلر آگاهیلیگینی کوپهیتیریش مقصد، سعیوحرکت قیلماقده.»
شفاکارلرنینگ ایتیشیچه، تیتانوس واکسینی فرزند کوریش یاشلریده عیاللر و قیزلر اوچون بیش دوزده توصیه بولیب و خوفلی کسللیکلر اورتهگه کیلیشی آلدینی آلیشی ممکن.
