یازووچی، شاعر و ژورنالیست محمدعالم کوهکن تامانیدن یازیلیب و ینگی‌لیکده چاپ ایتیلگن «قاره کوزلریم» حکایه‌لر توپلمی تقدیمات مراسمی بوگون (جمعه، ۲۳ سرطان) بابر نشریاتی و اوزگریش مدنی و اجتماعی اویوشمه‌سی تشبثی همده یازووچیلر، فرهنگی‌لر، بیلیم یورت اوقیتووچیلری و مدنی فعاللر حضوری بیلن کابل ده یولگه قوییلدی.
اوشبو مراسم ده اشتراک ایتگنلر، حاضرگی قلتیس شرایط ده بو کبی تدبیرلر اوته مهم ایکنی اوستیده تأکیدلب، شاعر و یازووچیلرنی تقدیرلش جامعه نینگ مسئولیتی دیه بیان قیلدیلر.
بیزلرنینگ فیسبوک صحیفه‌میزگه باش اورینگ!
یازووچی، ژورنالیست همده اوشبو مراسم تشکیلاتچیلریدن بولمیش محمدحسن تولقین گه کوره، قاره کوزلریم حکایه‌لر توپلمی محمدعالم کوهکن نینگ پاکستان ده مهاجرت ده ایکی ییل ایچیده یازگن حکایت‌لریدن عبارت بولیب، کوهکن جنابلری تورموش نینگ جریانی ده اوزی گواه بولگن واقعه و حادثه‌لرنی حکایت قالبی ده بدیعی نثر ده یازگن و مذکور اثر افغانستان اوزبیک ادبیاتی و اوزبیک تیلی اوچون کتته یوتوق دیر.
تولقین جنابلری، بو حکایت‌لر قیشلاق ده بولگن واقعه‌لر، باله‌لیک ده کوز بیلن کوریلگن حادثه‌لر و کرونا ویروسی تجربه‌لری اساسیده یازیلگن دیدی. محمدعالم کوهکن بوتون عمرینی اوزبیک تیلی ادبیاتی رواجلنیشی اوچون صرف‌لب، ۱۳۷۴_ییل ده محمدعالم کوهکن و ذکرالله ایشانچ تشبثی بیلن چاپ بولگن «اوزبیک تیلی ادبیاتی»، «سین‌اوچون یره‌لدیم» شعری توپلمی مستقل اثری، نوایی نینگ «عالم‌اهلین ساغینور» تنلنگن مجموعه‌سی و «قاره کوزلریم» حکایه‌لر توپلمی، استاد نینگ اثرلریدن عبارت دیدی، محمدحسن تولقین.
مذکور مراسم ده، اوزگریش مدنی و اجتماعی اویوشمه‌سی مسئولی نقیب‌الله عبید، اوزبیک تیلی ادبیاتی و یشاوچیلر اینیقسه اوزبیک خلقی آره‌سیده مطالعه فرهنگینی رواجلنتیریش مقصدیده بو کبی اثرلر چاپ ایتیلیب و ترقه‌تیلیشی اوستیده تأکید ایتدی.
بیزلرنینگ توییترده هم تعقیب قیلینگ!
شونینگدیک، اوزگریش مدنی و اجتماعی اویوشمه‌سی اعضالریدن اسلام‌الدین سیزگین، دولت دن اوزبیک ضیالی‌لری گه علاوه، اوزبیک خلقی فرهنگی قوللب_قوتلنیشی و اونگه اهمیت بیریلیشی اوچون، دقت قیلیشینی طلب قیلدی.
قاره کوزلریم حکایه‌لر توپلمی ۲۵۰ بیت اطرافیده، بیر مینگ تیراژ ده «انتشارات و مطبعه واژه» ده چاپ ایتیلگن.
ایتیش کیره‌ک که، بوندن آلدین بدخشان ده اوزبیک شاعری و یازووچیسی محمدنسیم نسیم نینگ «فراق‌نامه» شعری توپلمی تقدیمات مراسمی بولیب اوتگندی.