بو نتیجهلر مملکتنینگ ۱۰ ولایتیدن نادولت تشکیلاتلریده ایشلهیاتگن ۲۵ نفر یاش (۱۴ عیال و ۱۱ ایرکک) بیلن اوتکزیلگن صحبتلر اساسیده آلینگن. صحبت قیلگنلرنینگ برچهسی شرطنامه اساسیده ایشلهیدی و اولرنینگ هیچ بیری اوزینی حاضرگی ایش اورنیده برقرار و کفالتلنگن دیب بیلمهیدی.
هرات یشاوچیسی ۳۰ یاشلی کبرا هاشمی تعلیمی نهادلردن بیرینینگ مالیهوی بولیمی خادمی و هراتده کسلخانهلردن بیریده قابله ۲۴ یاشلی حمیده، وقتینچهلیک شرطنامهلر امضالنیشی و نهادلرنینگ مالیهوی منبعلر گه قرهملیگی سببلی، ایشلری کیلهجگیدن تشویش بیلدیرهدیلر.
کبرا شوندهی دییدی: «قریب ۴۰ فایز ایشیمنی مصون بیلهمن؛ دایمی شرطنامه امضا قیلگنیم یوق بودجه یا کی نهاد مدیریتیده اینگ آز اوزگریش کیلیشی بیلن، ایشیمنی قولدن بیریش احتمالی بار.»
حمیده گه کوره: «نیچه آیدن سونگ شرطنامه وقتی تولهدی و قیته اوزهیتیریلمسلیگیدن تشویشده من. بو تشویشلر کوپراق شرطنامه وقتی یکونلنیش عرفهسیده کوپلهدی. ایشیمنی قولدن بیرمسلیک اوچون قوربیمدن یوقاری ایشلهی من. ایشدهگی ناتینچیلیک سببلی ایش کیلهجگیدن تشویشده من.»
اوشبو گزارش نتیجهلریگه کوره، لایحهلر وقتینچهلیک بولگنی سببلی (ایشلهیدیگن یاشلر) شرطنامه گه کیریتیلگن ایش گه قرهگنده کوپراق ایشلهیدی، معاش مقداری توستدن اوزگریشی و آرتگه قالیب تولنیلیشی، بو یاشلرنینگ ایشلرینی قولدن بیریش اوچون اساسی تشویشلریدن سنلهدی.
کاپیسالیک ۳۸ یاشلی ثابته و ۲۶ یاشلی احمد، نهادلرده ایشلهیدی ایتیشلریچه، ایشلرینی قریب ۴۰ فایز مصون بیلسه-لرده، معاشلری کیچیکتیریلیب بیریلیش قیینچیلیگی بیلن روپهرهلر.
ثابته گه کوره «سابق بیر ییل دوامیده نیچته پروژه آلردیک، ایندی بیر ییلده فقط بیر بار. ایکی-اوچ آی اوتسه بیر مرته قونغیراق قیلیشمهیدی، بیکار قیلینگن دیب اویلهی من و پروژه یکونلنگونچه بیز گه معاش بیریشمهیدی، دیتالریمیزنی کوریب و کیین ایسه معاش بیریشهدی.»
احمد هم شوندهی دییدی: «بیر ییللیک شرطنامه توزگن من، قریب آلتی آیدن بیری برقرار درآمدیم بار؛ بیراق سونگی آیلرده کمهیدی. انده-سنده بیر آی معاش بیریلیب و ایکی آی معاش بیریلمهگن، معاش مقداری کمهیشی بیلن تشویش کوپلهدی.»
اوشبو یاشلردن بیرقطاری، سلاموطندار بیلن صحبتده، ایشدهگی ناتینچلیک و اولرنینگ روحی باسیملری و حتا اولرنینگ حرکتی گه تأثیر قویگنینی ایتیشهدی.
قندوزلیک ۲۵ یاشلی شیراز، بوتوغریده شوندهی دییدی: «موسسهلر بیزنی حمایه قیلهدی. لوازمیم قراردادی، ۶۰ فایز ایشیمنینگ امنیتی یوق. شرطنامه وقتی یکونلنماقده ایکن تشویشیم هم آرتماقده؛ اوزهلتیریش یا کی بولمسلیگی نامعلوم.»
باشقه تاماندن، حقوقشناسلردن بیرقطاری، ایش بویروچی و ایشچی اورتهسیده موجود قیینچیلیکلر گه تأکیدلب ایتیشیچه، بو وضعیتنی باشقریش و برچه اوستیگه قانون بیر تینگ عملگه آشیریلیشی اوچون حکومت نظارت قیلیشی کیرهک.
حقوقشناس خدیجه حکیمی شوندهی دییدی: «ایش قانونی شو کی بیر کیشی ایرتهلبدن عصرگچه ایشلهیدی یا کی ایرتهلب ساعت ۸ دن عصر پیتی ۴ گچه، آی تولگچ معاشی تولنیشی کیرهک؛ بیراق بدبختلیک شو کی بو قانون فقط ایشلاوچی اوچون دیر. بیر کون کیچ کیلسه معاشی کسر بولهدی.»
برچهسی بیلن، اسلام امیرلیگی ایش و اجتماعی ایشلر وزیرلیگی مسئوللری، مصون ایش محیطی یرهتیلیشی و ایش معمالری حل ایتیلیشی اوچون، بو وزیرلیک خادملری تورلی ساحهلرده ایشلاوچیلر گه قولیلیک یرهتیش مقصدیده سعی-حرکت قیلماقدهلیکلرینی معلوم قیلیشهدی.
ایش و اجتماعی ایشلر وزیرلیگی سوزلاوچیسی سمیعالله ابراهیمی شوندهی دییدی: «ایش و اجتماعی ایشلر وزیرلیگی و باغلیق مفتشلر ایش بویروچی و ایشلاوچی اورتهسیده هماهنگلیک کیلتیریش اوچون سعی-حرکت قیلماقده، ایشلاوچیلر حقوقی حل بولسه، قیسی ساحهده ایشلاوچی قیینچیلیک بیلن روپهره بولسه، بو قیینچیلیک حل ایتیلیشی اوچون ایش بویروچیلر لازم بویروغلرنی بیریشی کیرهک – ایشلاوچی ایش محیطیده مصون بولسه.»
بیرلشگن ملتلر تشکیلاتی انسان پرورلیک یاردملرینی هماهنگ قیلوچی اداره (اوچا) معلوماتلریگه کوره، میلادی ۲۰۲۵ ییلده افغانستانده ۲۴۰ دن آرتیق انسان پرورلیک لایحه ایشی توختهگن، بو یاشلر اورتهسیده ایشسیزلیک کینگ کولمده کوپهلگنینی کورستهدی.
