سرپرست حکومت سویدن ده قرآن کریم یاندیریلیشی گه قرشی افغانستان ده مذکور مملکت برچه نهادلری نینگ فعالیت‌لرینی توخته‌تیش قراری دن کیین، بیز اوشبو گزارش ده سویدن کمیته‌سی نینگ افغانستان ده‌گی فعالیت‌لرینی بحث گه آلگن‌میز.
افغانستان اوچون سویدن کمیته‌سی، افغانستان ده خارجی مهم نهادلردن بولیب، ۱۴ ولایت ده تورلی ساحه‌لرده فعالیت قیله‌دی. یشاوچیلر گه ساغلیک خذمت کورسه‌تیش افغانستان اوچون سویدن کمیته‌سی نینگ فعالیتی مهم بولیم‌لریدن سنله‌دی.
بیزلرنینگ فیسبوک صحیفه‌میزگه باش اورینگ!
مذکور کمیته نینگ وبسایتیده ترقه‌لگن معلومات اساسیده، اوشبو نهاد گه باغلیق ساغلیک مرکزلرده ۲۰۲۱_ییل ده افغانستان ده ۱.۷ میلیون کیشی گه ساغلیک خذمت کورسه‌تیلگن.
تعلیم‌وتربیه، افغانستان اوچون سویدن کمیته‌سی نینگ فعالیتی باشقه بولیم‌لریدن عبارت دیر، مذکور کمیته اوشبو بولیم ده ۲۰۲۱_ییل ده ۵۹ فایزینی قیزلر تشکیل بیرگن ۱۰۴ مینگ کیشینی تعلیم بیلن تأمینله‌گن.
شونینگدیک، اوشبو کمیته اوز وبسایتیده افغانستان نینگ قیشلاق‌لریده ۴۲ مینگ ناگران باله و باشقه ۸۸ مینگ کیشینی تعلیم بیلن تأمینلب و باشقه تورلی خیل یاردم بیرگن.
بونگه علاوه، افغانستان اوچون سویدن کمیته‌سی، میلیون‌لرچه افغانی‌لیک ترقیاتی پروژه‌لرنی عملگه آشیرگن.
گرچند، افغانستان اوچون سویدن کمیته‌سی مسئوللری اسلام امیرلیگی نینگ اوشبو قراری و افغانستان ده مذکور کمیته نینگ فعالیتی توخته‌تیلیش سلبی تأثیری باره‌سیده ایضاح کیریتسه ده؛ لیکن اوشبو گزارش نی یازگونچه کمیته معلوماتی بیز گه ییتمه‌دی.
بیزلرنینگ توییترده هم تعقیب قیلینگ!
عین‌حالده، اسلام امیرلیگی گه کوره، سویدن قرآن کریم یاندیریلیشی گه دایر مسلمان‌لردن کیچیریم سوره مه‌گونچه، افغانستان ده فعالیت‌لری توخته تیله‌دی.
اسلام امیرلیگی سوزلاوچیسی نینگ اورین باسرلریدن بلال کریمی نینگ سلام‌وطندار گه ایتیشیچه: «سویدن اوشبو مسئله گه دایر مسلمان‌لردن کیچیریم سوره مه‌گونچه، اسلام امیرلیگی افغانستان دن سویدن نینگ بوتون فعالیت‌لرینی توخته‌تیش بویروغینی بیره‌دی.»
ایتیش کیره‌ک که، افغانستان اوچون سویدن کمیته‌سی نینگ قریب آلتی مینگ رسمی ایشلاوچیسی بار، مذکور کمیته نینگ ایشی توخته‌تیلگن تقدیرده، اوشبو نهاد ایشلاوچیلری نینگ تقدیری نیمه بوله‌دی، حاضرگچه بیللی ایمس.
