پاکستاننینگ سابق باش وزیری عمران خان اسلامآباد دهگی شفاخانهده بیر نیچه ساعت طبی کوریکدن اوتگچ، ینه عدلیه قماقخانهسیگه قیتریلدی.
قید ایتیلیشیچه، ۷۳ یاشلی سیاستچی عالی محکمه قراریگه موافق اوتگن کیچه قماقخانهدن شفاخانه گه آلیب باریلگن. او ییرده طبی تیکشیرودن اوتکزیلگنیدن سونگ بوگون (۳۰ اسد/۲۱ آگست، جمعه) ینه قماقخانه گه قیتریلگن.
پاکستان تحریک انصاف حزبی، عمران خان طبی کوریکدن اوتکچ شفاخانه گه آلیب باریلگنینی تصدیقلهگن.
خاننینگ وکیللری اونینگ ساغلیغی قماقده یامانلشگنی و اونگ کوزیدهگی کوریش قابلیتی سیزیلرلی درجهده پسهیگنینی بیلدیرگن. حکومت ایسه طبی خلاصهلرده تیزلیک بیلن دوالنیشینی طلب قیلهدیگن حالت انیقلنمهگنینی تأکیدلهگن.
ایسلهتیب اوتهمیز، عمران خان میلادی ۲۰۱۸ ییلدن ۲۰۲۲ ییلگچه پاکستان باش وزیری ایدی. اونگه نسبتن بیر نیچته جنایت ایشی قوزغهتیلگن. میلادی ۲۰۲۳ ییلدن بیری سابق باش وزیر «توشخانه» دولت خزینهسیده سقلنهیاتگن قیمتبها بویوملرنی ساتگنلیک عیبلاوی بیلن ۱۴ ییللیک قماق جزاسینی اوتهماقده.
