دییرلی سونگی تورت آی دوامیده، «دیورند چیزیغی» بویلب اسلام امیرلیگی حربی کوچلری و پاکستان اورتهسیدهگی توقنشوولرده، پاکستان اردوسی بیرقطار یشش حدودلر گه هجوم اویوشتیردی و اونینگ نتیجهسیده مینگلب عایله اوی-جایلرینی ترک ایتیشگه مجبور بولدی.
اوشبو توقنشوولرده قریب بیش مینگ عایله آواره بولگن، بیراق تورت آی اوتگچ، هنوزگچه قریب بیر مینگ ۵۰۰ عایله اصلی حدودلریگه قیته آلمهگن.
بو عایلهلر، حاضر لکنو تومنی سوری حدودیده وقتینچهلیک کمپده یشهیدی و اکثریتی علیشیر و تریزی تومنی ذکرخیل قیشلاغی یشاوچیلری دیر.
پاکستان اردوسینینگ هجوملری طفیلی اوی-جایلرینی ترک ایتیب بو منطقه گه آواره بولیب کیلگن شیرینگل و گلابجان، بالهلری یازنینگ ایسیق موسمیده خیمهلر آستیده حیات کیچیرماقده و بعضی عایلهلر هم قرینداشلرینینگ اویده وقتینچهلیک یشب کیلماقدهلیگینی بیلدیریشهدی.
آواره بولگنلردن رحمانالله و احساناللهنینگ ایتیشیچه، یشش اویلری پاکستان اردوسینینگ راکته هجوملریده ویرانه گه ایلنگن و احتمالی ماجرا باشلنیشیدن قورقیب هنوزگچه قیشلاقلریگه قیته آلمهگنلر.
اولر گه کوره، اوشبو توقنشوولرده کوپینچه عایلهلرنینگ اویلری بوزیلگن و بالهلر هم آوارهلیک سببلی، اوقیشلرینی دوام ایتتیره آلمهگن.
شو بیلن بیرگه، خوست ولایتی مهاجرلر و قیتگنلر ریاستی باشلیغی محمدامان امان، پاکستان اردوسی اوروش جریانیده یشش اویلرنی نشانگه آلگن و اونینگ نتیجهسیده کوپینچه اهالی آواره بولگن و حاضرگچه دییرلی بیر مینگ ۵۰۰ عایله قیشلاقلریگه قیتمهگنینی بیلدیرگن.
خوست ولایتی مهاجرلر و قیتگنلر ریاستی معلوماتیگه کوره، اسلام امیرلیگی حربی کوچلری و پاکستان اردوسی اورتهسیدهگی سونگی توقنشوولرده دییرلی بیش مینگ عایله علیشیر و تریزی، زازیمیدان و گربز تومنلریدن آواره بولگن – اولر گه دولت ادارهلری و همکار موسسهلر تامانیدن آزیق-آوقت، خیمه، نقد پول و باشقه کیرهکلی اوسکونهلر ترقهتیلگن.
