اوتگن کوندن بیری مملکت نینگ قطار ولایت‌لری اینیقسه کابل، جوزجان، قندهار، ارزگان، خوست و لوگر ولایت‌لریده هرات ده زلزله باعث زیان کورگنلر گه یاردم بیریش مقصدیده، مالی یاردم ییغیش صندیغ‌لری قوییلیب و کمپاین خیمه‌لری قوریلگن.
جوزجان ده مالی یاردم ییغیش کمپاینی، بوگون (دوشنبه، ۱۷ میزان)، باشلنگن. اوشبو ولایت معلومات و مدنیت باشلیغی سیف‌الدین معتصم نینگ ایتیشیچه، بو کمپاین اوچ کونگچه دوام تاپیب و ییغیلگن پوللر بیر ریجه اساسیده، هرات ده زلزله باعث زیان کورگنلر گه ییتکیزیب بیریله‌دی.
قندهار معلومات و مدنیت باشلیغی انعام‌الله سمنگانی نینگ سلام‌وطندار گه ایتیشیچه، هرات ده زلزله طفیلی زیان کورگنلر گه یاردم کورسه‌تیش اوچون، اولر اوشبو ولایت نینگ تورلی منطقه‌لریده مالی یاردم ییغیش صندیغ‌لرینی قویگنلر.
بیزلرنینگ فیسبوک صحیفه‌میزگه باش اورینگ!
سمنگانی جنابلری نینگ کوپه‌یتیریشیچه، زلزله باعث زیان کورگنلر یاردم گه محتاج دیر، اونگه کوره، اولکه یشاوچیلری حاضرگی قلتیس شرایط ده اولر گه یاردم بیریش‌لری کیره‌ک.
شونینگدیک، ارزگان معلومات و مدنیت باشلیغی آغاولی قریشی گه کوره، یک‌شنبه کونی، ۱۶ میزان، هرات ده زلزله باعث زیان کورگن عایله‌لر گه یاردم کورسه‌تیش اوچون، اوشبو ولایت مرکزی ترینکوت شهری ده مالی یاردم ییغیش صندیغ‌لرینی قویگنلر.
باشقه تاماندن، گردیز شهری شامل پکتیا ولایتی نینگ قطار تومن‌لریده، یاش‌لر تامانیدن مالی یاردم ییغیش صندیغ‌لری قوییلگن. پکتیا معلومات و مدنیت باشلیغی ثواب‌جان اسلام‌یار نینگ ایتیشیچه، مذکور ولایت حاکمی، اوز شخصی پولی دن ۵۰۰ مینگ افغانی اوشبو صندیغ‌لر گه یاردم بیرگن.
مسئوللر گه کوره، بو یاردم‌لر تیزلیک ده هرات زنده‌جان تومنی و بادغیس ده زلزله باعث زیان کورگنلر گه توزیع بوله‌دی.
هرات زنده‌جان تومنیده دهشتلی زلزله دن کیین، اقتصاد وزیرلیگی مصلحتی بیر ییغین یولگه قوییب ایچکی و تشقی نهادلردن مذکور زلزله باعث زیان کورگنلر گه یاردم بیریش‌لرینی طلب قیلگن.
بیزلرنینگ «ایکس» ترماغی ده هم تعقیب قیلینگ!
اوشبو ییغین ده حضوری بولگن تشقی نهادلر نماینده‌لری، هرات ده زلزله باعث زیان کورگنلر گه یاردم بیریش‌لریدن ایشانچ بیرگنلر. شونینگدیک ایچکی نهادلردن بیرقطاری، هرات ده زلزله طفیلی یاردم بیریش اوچون سعی‌وحرکت قیله‌یاتگنلرینی معلوم قیلگنلر.
افغانستان غربی قسمی هرات ده، اوشبو هفته شنبه کونی کیتمه_کیت نیچه زلزله یوز بیردی. طبیعی آفت‌لرنی باشقریش ایشلری بوییچه دولت وزیرلیگی نینگ معلوماتی اساسیده، مذکور زلزله‌لر طفیلی حاضرگچه ایکی مینگ ۵۳ کیشی اولیب و یره‌لنگن. بونگه علاوه بیر مینگ ۲۹ یشش اوی بوتونلی بوزیلگن.
