اوتگن کونی (شنبه، ۲۸جوزا)، ایرته‌لب ساعت ۶:۳۰ اطرافی ده قوراللی بیر گروه که حاضرگه قدر کیم‌لیگی بیللی بولمه‌گن، کابل شهری کارته پروان حدودی ده هندولر عبادتخانه‌سی گه هجوم قیلگن.
واقعه دن نییچه دقیقه کیین، ایچکی ایشلر وزیرلیگی نینگ سوزلاوچیسی عبدالنافع تکور بیر بیانیه ترقه‌تیب ایتیشیچه، قوراللی کیشی‌لر مذکور عبادتخانه گه کیریش دن آلدین، قوریقچی‌لری اوستیگه قول بمبی تشله‌گن که نتیجه ده یانغین صادر بولیب و قوریقچیلردن ایکیته‌سی یره‌لنگن.
اونگه کوره، قوراللی هجومچیلر، بمب ییرلشتیریلگن بیر موترنی اهالی آره‌سیده پارتله‌تیشنی قصد قیلگن ایکنلر، بیراق مقصد گه ایتیشمسدن آلدین، مذکور موتر پارتله‌تیلگن.
بیزلرنینگ فیسبوک صحیفه‌میزگه باش اورینگ!
باشقه تاماندن مملکت بویلب هندولر نینگ نماینده‌سی چرن سنگ خالصه سلام‌وطندار بیلن اوتکزگن صحبتیده ایتیشیچه، هجومچیلر معبد ایچیده کیریب اوزلرینی پارتلتدیلر. او اسلامی امارت حکومتیدن افغانستان ده‌گی آزچیلیک مذهبی قوم‌لر امنیتی تأمین ایتیلیشینی سوره‌یدی.
شو بیلن بیرگه، باختر دولت آژانسی، کابل شهری ده هندولر عبادتخانه‌سیده قوراللی هجومچیلر و اسلامی امارت کوچلری اورته‌سیده توقنشوو یکونیدن خبر بیرگن. باختر اوز توییتری ده یازیشیچه، کابل شهری ده هندولر عبادتخانه‌سی اوستیگه اویوشتیریلگن هجوم، قوراللی هجومچیلر نینگ هلاک ایتیلیشی بیلن یکونلنگن.
باختر دولت آژآنسی نینگ ایتیشیچه، اوشبو هجوم ده هندو وطنداش‌لریدن بیری جان بیرگن و باشقه ۷ کیشی یره‌لنگن. باختر نینگ کوپه‌یتیریشیچه، تازه‌لش عملیات جریانیده، اسلامی امارت کوچلری دن بیری جان بیرگن
بیراق واقعه عینی گواه‌لری اوشبو هجوم تلفاتینی اعلام بولگن رقم دن کوره کوپ دیدیلر. واقعه گواه‌لریدن بیری مطیع‌الله سلام‌وطندار بیلن اوتکزگن صحبتیده، اولگن‌لر و یره‌لنگنلر سانینی ۳۰،۴۰ کیشی دیدی.
اونگه کوره، پارتلش کوچلیگی باعث عبادتخانه اطرافیده‌گی برچه تورر اوی‌لر نینگ شیشه‌سی توکیلیب توشگن. باشقه تاماندن واقعه گواه‌لریدن باشقه بیری جبار نینگ ایتیشیچه، مذکور عبادتخانه ده کیتمه_کیت تورت پارتلش یوز بیردی.
کابل شهری ده هندولر عبادتخانه‌لری اوستیگه اویوشتیریلگن هجوم، ایچکی و خلق‌ارا عکس‌العمل‌لر گه روپه‌ره بولگن. افغانستان ده بیرلشگن ملت‌لر تشکیلاتی نینگ اورین باسرلیک هیأتی یا یوناما، مذکور هجوم‌نی قتیق شکلده قاره‌لب و تینچ اهالی گه قرشی هجوم‌لر تیزلیک بیلن توخته‌تیلیشینی سوره‌گن.
یوناما اوز توییتری ده، افغانستان بویلب هندولر، هزاره‌لر و صوفی‌لر امنیتی تأمین ایتیلیشینی تأکید ایتگن.
اروپا اتفاقی نینگ افغانستان اوچون مخصوص نماینده‌سی توماس نیکلسون نینگ ایتیشیچه، تینچ اهالی گه قرشی هجوم‌لر تیزلیک بیلن توخته‌تیلیشی کیره‌ک. او برچه آزچیلیک قوم‌لر حقوقی تأمین ایتیلیشینی تأکید ایتگن. نیکلسون گه کوره، «بوگون‌لیک کونده افغانستان ده بو گَل واقعه یوز بیریشی واقعیت دن اوزاق دیر.»
عین‌حالده هندوستان تشقی ایشلر وزیرلیگی اوشبو واقعه گه دایر خواطرلیگینی بیلدیریب ایتیشیچه، اولر بو وضعیت‌نی یقیندن کوزه‌تماقده‌لر.
شونینگدیک پاکستان تشقی ایشلر وزیرلیگی اوشبو هجوم‌نی تروریستیک هجوم دیب قاره له‌گن. پاکستان نینگ کابل ده‌گی ایلچیسی منصوراحمد خان، مذکور مملکت تشقی ایشلر وزیرلیگیده بیر بیانیه ترقه‌تیب ایتیشیچه، پاکستان یینه بیر مرته برچه ساحه‌لرده تروریستیک هجوم‌لرنی قاره له‌یدی.
اونینگ کوپه‌یتیریشیچه: «پاکستان افغانستان بویلب مذهبی مکان لرده اویوشتیریله یاتگن تروریستیک هجوم‌لردن خواطرده دیر.» پاکستان نینگ کابل ده‌گی ایلچیسی جمعه کونی قندوز ده بیر مسجد ده اویوشتیریلگن هجوم‌نی تروریستیک «شفقت‌سیز» دیگن.
بیزلرنینگ توییترده هم تعقیب قیلینگ!
ملی کینگش ده هندولر نینگ سابق نماینده‌سی انارکلی هنریار، اوشبو هجوم گه عکس‌العمل بیلدیریب توییتری ده یازیشیچه: «هندولر و سیک‌لر بو توپراق نینگ اصل یشاوچیلری دیر. کابل و دهلی نینگ ینگی مناسبتی باعث، هندولر و سیک‌لر نشانگه آلینیشینی ایتگنلر بیرقطار وطنداش‌لر. مین افغان من، بیز افغان میز حتا ویزا بیلن یا ویزا وقتی توللگندن سونگ، هندوستانده توریش گه حقیمیز یوق. بیراق یینه هم هندوستان‌لیک اسم بیز گه بیریله‌دی.»
شونینگدیک مملکت سابق جمهور باشلیغی حامد کرزی و سابق دولت ملی یره‌ش عالی کینگش باشلیغی عبدالله عبدالله، بو هجوم‌نی قاره له‌گنلر.
ایتیش کیره‌ک که، جمعه کونی قندوز ولایتی امام‌صاحب تومنیده بیر مسجد ده اویوشتیریلگن پارتلش نتیجه‌سیده ۱۲ کیشی هلاک و ۳۰ کیشی یره‌لنگن ایدی. حاضرگه قدر جمعه کونی قندوز ده یوز بیرگن پارتلش و اوتگن کونی کابل شهری ده هندولر عبادتخانه‌سی اوستیگه اویوشتیریلگن هجوم‌لر مسئولیتینی هیچ کیم یا گروه اوز زمه‌سیگه آلمه‌گن.