ساغلام حیات طرزی یا که یشش اسلوبی-موازنتلی آوقتلنیش، منتظم جسمانی فعاللیک، یېترلی اویقو، استرسنی باشقریش و کوندهلیک فعاللیتلرنی ترتیب گه سالیشنی اۉز ایچیگه آلهدی. سلاموطندار یاشلر اورتهسیده اوشبو یشش طرزینی تېکشیریش مقصدیده، جوزجان، فاریاب، بامیان، بادغیس، لغمان، بلخ، هرات، تخار و کابل ولایتلریده ۳۶ یاش بیلن صحبت اوتکزگن.
اوشبو یاشلردن ۲۱ نفری، ترتیبلی حیاتلری بولیب و کوندهلیک فعاللیتلرینی دقت بیلن بجریشلرینی بیلدیرگنلر؛ عینحالده قالگن ۱۵ نفری اېسه اقتصادی شرایطلر یا که امکانیتلرنینگ یېتیشمسلیگی کبی معمالر سببلی ساغلام حیات طرزیدن اوزاقلهگن لیکلرینی قۉشیمچه قیلگن.
اوشبو گزارشده صحبت قیلگن یاشلر، موازنتلی آوقتلنیش، منتظم جسمانی فعاللیک و اجتماعی علاقهلر اهمیتلی دیب تأکید اېتیشگن. شونینگدیک، ایریم یاشلر یخشی حیات کیچیریش اوچون ساغلام و ماس آوقتلردن فایدهلنیشنی مهم دیب و آوقتلنیشده بوتوغریده دقت قیلینیشی کېرهک دیگنلر.
سلامتلیگی اوچون یخشی آوقتلرنی استعمال قیلیش گه اهمیت بیرهدیگن فاریابلیک هدیه گه کوره: «آوقتلنیش دستوریمیزده بیز هر کونی تورلی خیل ساغلام آوقتلردن فایدهلنهمیز؛ مثال اوچون برنج، گوشت، منتو و لوبیا کوپراق استعمال قیلهمیز. مخصوص حالتلرده اېسه تشقریدن تیار آوقتلردن هم فایدهلنهمیز.»
سلامتلیگی اوچون یخشی آوقتلرنی استعمال قیلیش گه اهمیت بیرهدیگنلردن باشقه بیری بادغیسلیک حمیرانینگ ایتیشیچه: «آوقتلنیش دستوریم اساسن برنج، و حبوبات کبی ساغلام آوقتلردن عبارت بولیب، بعضیده تیز تیارلنهدیگن فستفود یا که تشقریدن آلینگن آوقتلردن هم فایدهلنه من.»
اوشبو یاشلردن بعضیلری ساغلام حیات کیچیریش اوچون جسمانی فعاللیکنینگ اهمیتینی تأکیدلهیدیلر و هر کونی جسمانی مشقلر بجریش آرقهلی حیاتلرینی ېنهده قووانچلی قیلهدیلر.
بلخلیک شبنم، سپورت گه قیزیقهدی، سپورت عادتلری حقیده ایتیشیچه: «هر کونی ۲۰ دن ۳۰ دقیقه پیاده کېزهمن و هفتهده قریب اوچ کون کلوب باریب و مشق قیلهمن. کوپراق فوتبال گه قیزیقهمن.»
بیزلرنینگ فیسبوک صحیفهمیزگه باش اورینگ!
فاریابلیک رحمتالله، سپورت گه قیزیقهدی، سپورت عادتلری حقیده ایتیشیچه: «سپورت، حیاتنینگ اساسی بولیمی دیر و اونگه اعتبار بیریش کېرهک. سۉنگی کونلرده رزمی سپورتلر گه قیزیقماقده من و سپورت اوچون وقت اجرهتگن من.»
ساغلام تورموش طرزی فقطگینه توغری آوقتلنیش و جسمانی فعاللیک بیلن چېکلنمهیدی، بلکه بو یاشلرنینگ جسمانی و روحی حالتی همده اجتماعی مناسبتلرنی یخشیلش گه آلیب کېلهدیگن خطی-حرکتلر و عادتلرنینگ مجسمهسینی هم اۉز ایچیگه آلهدی.
جوزجانلیک زرغونه، استرسینی کنترول قیلیش اوچون تورلی اسلوبلردن ایش آلهدی، ایتیشیچه: «استرس و قیینچیلیکلرنی نماز اوقیش، مطالعه قیلیش، کېزیش یا که سپورت قیلیش بیلن باشقریش گه اورینهمن.»
کابل یشاوچیسی حلیمه، استرسنی باشقریش اوچون تورلی اسلوبلردن ایش آلهدی ایتیشیچه: «پارکلر، کوچهلر و بازارده قدم اوریش استرسیم کمهیشیگه سبب بولهدی.»
گزارشده صحبت قیلگن یاشلرنینگ ایریملری کوندهلیک حیاتده اجتماعی مناسبتلرنینگ اهمیتی گه هم تأکید اېتیشهدی. کابللیک محمد و فاریاب یشاوچیسی احمدمنیر، عایلهوی علاقه و دوستلیکنینگ اهمیتی حقیده گپیرهدیلر.
بیزلرنینگ «ایکس» ترماغی ده هم تعقیب قیلینگ!
محمد گه کوره: «مین اوچون عایلهوی علاقه و دوستلیک اهمیتلی دیر و بو علاقه سقلنیشی اوچون سعی-حرکت قیلهمن.»
احمدمنیرنینگ کوپهیتیریشیچه: «اورتاق و عایله بیلن علاقهنینگ اهمیتی کوپ؛ چونکه انسان یالغیز حیات کیچیره آلمهیدی و باشقهلر بیلن تعامل قیلیش گه احتیاجی بار و مین هم بو اصولنی رعایت قیلهمن.»
ساغلیق و فراوانلیک اوچون منتظم فعالیتلری حقیده گپیرهیاتگن بو یاشلردن تشقری، تورلی سببلر گه کوره، حیات فعالیتلری ایزدن چیققن یاشلر هم بار. اولر ساغلام بولمهگن تورموش طرزینینگ اساسی معمالری صفتیده اقتصادی قیینچیلیکلر و وقت یېتیشمسلیگینی کورستیشهدی.
کابللیک عبدالرئوف گه کوره: «بیز اۉزیمیز و عایلهمیز اوچون قیمتبها آوقتلر ساتیب آلالمهیمیز، شو سببلی ارزان محصولاتلر مثال اوچون سبزهوات و کچالودن فایدهلنهمیز.»
لغمانلیک محمدفقیرزینینگ بو حقده ایتیشیچه: «کوپ بندلیکلریم سببلی سپورت بیلن شغللنیش گه وقتیم یوق و فقط هفتهسیگه بیر مرته فوتبال اوینهی من.»
بعضی شفاکارلرنینگ فکریچه، یاشلر ساغلام حیات کیچیریشلری اوچون اولا ساغلام آوقت استعمال قیلیشلری و سپورت بیلن شغللنیشلری کېرهک. شفاکار مداد دانشور بو بارهده شوندهی دیېدی: «ساغلام حیات کیچیریشنینگ بیرینچی یولی-میوهلر، سبزهواتلر، آقسیلگه بای طعاملر و کم یاغلی آوقتلر کبی ساغلام آزیق-آوقتلردن فایدهلنیش دیر. شونینگدیک، یاشلر کوپ مقدارده تشقریده تیارلنگن آوقتلر و فست-فود محصولاتلرینی استعمال قیلمسلیکلری کېرهک. توغری آوقتلنیشدن تشقری، هر هفته کمیده ۱۵۰ دقیقه منتظم جسمانی مشقلر بیلن شغللنیشلری ضرور.»
جمعیتشناسلرنینگ ایشانچی گه کوره، توغری تنلاولر ساغلام حیات کیچیریش گه یاردم بیرهدی و تکنالوژی تورموش طرزینینگ اوزگریشیده مهم رول اوینهگن. جمعیتشناس شعیب احمدینینگ ایتیشیچه: «ساغلام تورموش طرزی-بو توغری تنلاو دیر و حیاتنی یخشیلش گه یاردم بیرهدیگن هر قندهی نرسه ساغلام تورموش طرزی گه کېرهدی؛ بو عادت و حتا حرکتلردن تارتیب، آوقتلنیش گه بولگن ساحهلرنی اۉز ایچیگه آلهدی. تکنالوژینینگ هم کتّه تأثیری بار، چونکه آدملرنینگ کوپ وقتی تکنالوژی قوریلمهلر بیلن اوتهدی.»
روانشناس سویتا حبیبی، ساغلام حیات کیچیریش اوچون حیاتده انیق مقصدلر گه ایگه بولیش مهملیگینی تأکیدلهیدی. «بیرینچی باسقیچده، انیق ریجه توزیش استرسنی کمهیتیریش گه یاردم بیرهدی؛ چونکه کېلهجک حقیده خواطر کمیهدی. مقصد گه اساسلنگن انیق یونهلیش تشویشلرنی نظارت قیلیشده ثمرهلی بولیشی ممکن.»
یاشلر ساغلام تورموش طرزی حقیده گپیرهیاتگنده، خلقارا ساغلیقنی سقلش تشکیلاتی مقالهسیده ساغلام تورموش طرزی هر بیر شخصنینگ جسمانی و روحی سلامتلیگینی سقلش، کسللیکلرنینگ آلدینی آلیش و تیگیشلی دوالش چارهلری کوریش اوچون بجریلیشی کېرهک بولگن حرکتلر و چاره-تدبیرلر مجسمهسی اېکنلیگینی اعلام قیلگن.
