غور ده‌گی چاروه‌چیلردن قطاری نینگ ایتیشلریچه، اولر سوت محصوللری نینگ ستندرد شکلده پروسس قیلیش اسلوبلرینی بیلمه‌یدیلر و اوتمیش‌دن حاضرگچه سنتی اسلوبلردن فایده‌لنیش بیلن لبنیات ایشلب چیقره‌دیلر.
غور ولایتی‌ده‌گی چاروه‌چیلردن بیری ۳۵ یاشر گل‌احمد نینگ ایتیشیچه، ییل‌لردن بیری بو ایش بیلن شغللنیب، چاروه‌لری نینگ سوت محصولاتی نی پروسس و ییغیش اوچون محلی و قدیمی اسلوبلردن فایده‌لنه‌دی.
بو ایش بیلن درآمد قولگه کیلتیره‌دیگن گل‌احمد نینگ کوپه‌یتیریشیچه، زمانه‌وی پروسس اسلوب‌لریدن آگاهی‌سیزلیک و سوت محصولاتی ساتیلیشی اوچون مناسب بازار یوقلیگی، آز درآمد قولگه کیلتیریشی‌گه سبب بولگن. «چاروهچیلیک آرقه‌لی سوت، یونگ، قتیق و قیماق قولگه کیلتیره‌میز. حاضر ایسه بیللی بازار یوق، انه شوو سبب قیین‌چیلیک بیلن روپه‌ره‌میز. حاضر بیر کیلوگرام سوت نی ۳۵ افغانی و قتیق نی ایسه ۴۰ افغانی ساته‌میز.»
بیزلرنینگ فیسبوک صحیفه‌میزگه باش اورینگ!
شونینگدیک غور ولایتی‌ده‌گی چاروه‌چیلردن باشقه بیری غلام حیدری نینگ ایتیشیچه، امکانیت‌سیزلیک سبب سوت محصوللری پروسسی اوچون سنتی اسلوبلردن فایده‌لنه‌دی.
غلام حیدری حکومت و یاردم بیرووچی موسسه‌لردن تورلی بولیم‌لر اینیقسه سوت محصوللری پروسسی خصوصیده اورگه‌تیلیش زمینه‌سی یره‌تیلیشی، پروسس اوسکونه‌لری ترقه‌تیلیشی و بازار یره‌تیلیشینی ایسته‌گن. «درست شکلده سوت محصولاتی پروسسی بولیمی‌ده آگاهی‌لیگیمیز یوق. اوتمیش‌دن قالگن اسلوبلردن قوللنه‌میز. مسئوللردن بیر چاروه‌دار صفتیده سوت محصولاتی ییغیلیشی اوچون زمینه و یخشی بازار یره‌تیلیشینی ایسته‌‌یمیز.»
شونده‌ی بیرحالده، غور ولایتی‌ده چاوره‌چیلیک ایشلری بوییچه ایش بیلرمانلر نینگ ایتیشلریچه، گرچند ایکینچیلیک ریاستی چاروه‌چیلر اختیاری گه بیر قطار سوت محصولاتینی پروسس قیلیش اوسکونه‌لرینی قرار بیرگن؛ بیراق مذکور اوسکونه‌لر ییترلی بولمه‌ی و چاروه‌چیلردن کوپینچه‌سی اولردن قنده‌ی فایده‌لنیش نی بیلمه‌یدیلر.
غور چاروهچیلیک ایشلری بوییچه ایش بیلرمان شاه‌ولی متوکل، اوشبو ولایت ایکینچیلیک ریاستی مسئوللریدن چاروه‌چیلر گه آگاهی‌لیک بیریلیش و رهنمالیک یانیده، اولر گه کوپینچه امکانیت بیلن چاروهچیلیک محصولاتینی ایشلب چیقریش اسبابلری ترقه‌تیلیشینی ایسته‌گن.
مذکور بیلرمان نینگ ایشانچی گه کوره، چاروه‌چیلر نینگ قوللب-قوتلنیشی اولر نینگ چاروهچیلیک خصوصیده کوپراق قیزیقیشی و یخشی درآمد قولگه کیلتیریشلری گه سبب بوله‌دی.
شاه‌ولی متوکل نینگ ایتیشیچه: «ایکینچیلیک ریاستی تامانیدن تعلیم بیریش صنف‌لر یره‌تیلیشی کیره‌ک. یعنی قیشلاقلرده اهالی و چاروه‌چیلر گه قنده‌ی سوت ایشلب چیقریلیشی و ساتیلیشی اورگه‌تیلسین که اولر بو ایش گه قیزیقسینلر. شونینگدیک اولر گه اوسکونه لر ترقه‌تیلیب و اولر اختیاری گه قرار بیریلسین.»
بیزلرنینگ «ایکس» ترماغی ده هم تعقیب قیلینگ!
غور ایکینچیلیک، سووغاریش و چاروهچیلیک ریاستی‌ده مسئوللر نینگ ایتیشلریچه، ایکینچیلیک سکتوری خصوصیده‌گی همکار موسسه‌لر هماهنگ‌لیگیده، اوشبو ولایت فیروزکوه شهری‌ده چاروهچیلیک محصوللری ساتیلیشی و پروسس مرکزی آچیلیشی یانیده، اولر گه سوت محصولاتینی پروسس قیلیش اونلب اوسکونه ترقه‌تیلیشی و شونینگدیک چاروه‌چیلر اختیاری گه چاروه‌لر واکسینی و آذوقه‌سی قرار بیریلیشی خصوصیده سعی‌وحرکت قیلگنلر.
غور ایکینچیلیک، سووغاریش و چاروهچیلیک ریاستی نینگ مطبوعات بولیمی مسئولی ضیاءالحق جویا نینگ ایتیشیچه: «اوشبو اداره چاوره‌چیلیک محصولاتی ساتیلیشی و بازاری بولیمی‌ده اوز امکانیت‌لری نی نظر گه آلیب، همکار موسسه‌لر یاردمی بیلن بیر قطار خذمتلرنی انجام بیرگن. شونینگدیک فیروزکوه شهری‌ده چاروه‌چیلر گه سوت محصوللری پروسس مرکزی ایجاد بولیب و مرکز بیلن تومن‌لر بویلب چاروهچیلیک محصولاتی قیته ایشلب چیقریش اوسکونه‌لری ترقه‌تیلگن.»
مسئوللر و چاروهچیلیک ایشلری بوییچه ایش بیلرمانلر گه کوره، حاضر ایسه غور ولایتی‌ده بیر میلیون ۵۰۰ مینگ‌دن آرتیق سیگیر، قوی و ایچکی بار که کونده بو قطار چاروه‌لردن، آلتی یوز تُن گه قدر سوت قولگه کیله‌دی.
