غزنی ده باغدارلردن قطاری نینگ ایتیشلریچه، اوشبو ولایت‌ده ستندرد ساووق‌‌خانه‌لر کم‌لیگی سبب، محصول‌لری نینگ آز بها بیلن ساتیش گه مجبور بولگنلر.
غزنی شمالی‌ده جایلشگن خواجه‌عمری تومنی نینگ «ده‌نهال» قیشلاغیده‌گی باغدارلردن شاه‌رضا نینگ ایتیشیچه، ساووقخانه کم‌لیگی سبب، هر ییلی محصول‌لری نی بازار گه ترقه‌تمه‌ی، باغی باشیده قویی بها بیلن ساتیش گه مجبور دیر.
اونینگ کوپه‌یتیریشیچه: «محصول‌لریمیز نینگ پیشگنی‌دن کیین، باغ باشیده ساته‌میز؛ چونکه توپلش امکانیتی‌میز یوق. توپلگنی‌میز پیتده، سقلیه آلمه‌یمیز، انه شوو سبب آز بها بیلن ساته‌میز؛ چونکه ساووقخانه یوق.»
بیزلرنینگ فیسبوک صحیفه‌میزگه باش اورینگ!
حیات خره‌جتی نی باغدارلیک یولی آرقه‌لی تاین قیله‌دیگن شاه‌رضا نینگ ایتیشیچه، اوشبو ولایت‌ده ستندرد ساووقخانه ایجاد بولگنی صورت‌ده، باغدارلر محصول‌لری نی باشقه بیر ییل‌گچه سقله‌یشلری ممکن. اونینگ کوپه‌یتیریشیچه، غزنی ده باغدارلر، نیچه مرته اوشبو ولایت ایکینچیلیک، سووغاریش و چاروه‌چیلیک ریاستی‌دن غزنی ده ساووقخانه ایجاد بولینیشی نی ایسته‌گنلر؛ بیرق شاه‌رضا گه کوره، مذکور ریاست اولر نینگ ایسته‌کلری گه هر مرته رد جوابی نی بیرگن. «دولت گه مراجعت قیلگنی‌میز هر مرته، بودجه کم و دولت ساووقخانه توزه‌تیش گه امکانیتی یوق دیه‌دیلر. اوزی‌میز هم پول توپلب بیر ساووقخانه توزه‌تیش گه امکانیتی‌میز یوق.»
غزنی ده سبزه‌وات و تازه میوه سوداگرلری نینگ ایتیشلریچه، شونینگدیک اولر ساووقخانه کم‌لیگی سبب، زیان کورگنلر. مذکور سوداگرلر گه کوره، کوپینچه ایکینچیلیک محصول‌لر، توپلنیش‌دن کیین ساووق‌خانه‌لرده سقلنیش اوچون، پاکستان گه صادر بوله‌دی و ضرورت بولگنی صورت‌ده، نیچه برابر بها بیلن افغانستان گه قیته وارد بوله‌دی.
غزنی ده سودا آله‌دیگنلر نینگ ایتیشلریچه، ستندرد ساووقخانه یوقلیگی، بازار ده تازه میوه و سبزه‌وات بهاس نینگ ثابت قالمه‌یشی گه سبب بولگن. سودا آله‌دیگنلردن غلام‌محمد نینگ ایتیشیچه: «آلمه نینگ کیلو‌سی موسومی‌ده ۳۰ افغانی بولگنی صورت‌ده، باشقه بیر زمان‌ده بلکه ۶۰ افغانی گه ییتیشه‌دی؛ چونکه ساووقخانه یوق. انه شوو سبب، قیمتی ثابت ایمس و کوپ یوقاری کیته‌دی.»
ایکینچیلیک ایش بیلرمانی عبدالکریم یاری، غزنی ده ستندرد ساووقخانه یوقلیگی نی، سوداگرلر و باغدارلر اوچون بویوک بیر قیین‌چیلیک عنوان قیلگن. او، حکومت و یاردم بیرووچی موسسه‌لردن اوشبو قیین‌چیلیک نینگ حل قیلینیشی نی ایسته‌یدی. جناب یاری نینگ کوپه‌یتیریشیچه: «ساووقخانه بیر مملکت اقتصادی نینگ یوقاری کیتیشی خصوصیده اونملی دیر. یالغیز تازه میوه اوچون ایمس؛ بلکیم قوروق میوه‌لر نینگ خراب بولمه‌سلیگی اوچون هم اونملی دیر.»
بیزلرنینگ توییترده هم تعقیب قیلینگ!
شونده‌ی بیرحالده، غزنی ایکینچیلیک، سووغاریش و چاروه‌چیلیک ریاستی باغدارلیک بولیمی نینگ عمومی مدیری زکریا هوتک نینگ سلام‌وطندار گه ایتیشیچه، اوشبو ولایت‌ده ساووقخانه توزه‌تیش بویروغی نی، مسئوللر گه پیشنهاد بیرگنلر و حاضرگچه مذکور ایش نینگ قبول قیلینیشی و ایش نینگ باشلنیش بویروغی نی کوتیب تورگنلر.
اونینگ کوپه‌یتیریشیچه: «ایکینچیلیک ریاستی، ستمندرد بیر ساووقخانه ایجاد بولیش بویروغی نی، ایکینچیلیک وزیرلیگی، ولایتی مقامی، رئیس‌لر و حکومتی مسئوللر گه پیشنهاد بیرگنلر که، تازه میوه و سبزه‌وات سقلنیشی اوچون بیر ستندرد ساووقخانه توزه‌لسین. کیله‌سی ییل حکومت آرقه‌لی دهقان‌لر اوچون بیر ساووقخانه توزه‌تیلیشی خصوصیده امید‌ی‌میز بار.»
افغانستان ده ستندرد و بویوک بیر ساووقخانه یوقلیگی، نیچه مدت‌دن بویان سوداگرلر و ایکینچیلر میوه‌لر و باشقه ایکینچیلیک محصول‌لری نینگ آز بها بیلن تشقی گه صادر و کیین ایسه، مذکور توارلر نی یوقاری بها بیلن وارد قیلیشلری گه سبب بولگن.