الکترونیکی کیملیک آلهدیگنلردن قطارینینگ ایتیشیچه، آیلرچه کوتیب تورگنلریدن کیین قولگه کیلتیرگنلری کیملیکلریده، یازیلیش و باشقه بیر قطار قیینچیلیکلر بیلن روپهره بولگنلر.
کابل شهری خیرخانه منطقه یشاوچیسی بولمیش آمنه، کیملیگیده باسمه خطاسی بولگنیدن شکایت قیلیب و ایتیشیچه، مذکور دقتسیزلیک تحصیلی حجتلرینی آلیشی جریانیده بیر قطار قیینچیلیکلرگه سبب بولگن. «سینگلیم بیلن بیرگه کیملیک آلدیک. مینی کیملیگیمده ولایتیم و سینگلیم کیملیگیده ایسه بوبهمنینگ آتی درست یازیلمهگن ایدی. باشده اونچه اعتبار بیرمهدیک، بیراق تحصیلی حجتنی آلگنیمیزده کوپینچه قیینچیلیکلر بیلن روپهره بولدیک.»
کاپیسا یشاوچیلریدن احمدزی، کیملیگیده آتینینگ درست یازیلمهگنیدن شکایت قیلیب و ایتیشیچه، اونینگ اصلاح بولیشی بیر آی وقت آلیب و نیچه مرته کابل گه کیلگن. «الکترونیکی کیملیک آلگنیمده آتیم درست یازیلمهگن ایدی و اونینگ قیته توزهلیشی اوچون کابل گه یوباردیلر. نیچه مرته باردیم و خرهجتی هم جودهیم کوپ بولدی.»
مذکور یشاوچیلر، احصائیه و معلومات ملی ادارهسی ایشلاوچیلریدن شکایت قیلیب و ایتیشلریچه، هر کیم کیملیگیدهگی قیینچیلیکنینگ اوز ولایتیده حل قیله آلیشی اوچون حکومت الکترونیکی کیملیک ترقهتیلیشی و اصلاح قیلینیشی جریانیده قولیلیک یرهتیشی کیرهک.
پنجشیر یشاوچیسی بولمیش نور پادشاه، کیملیگیده آتی درست یازیلمهگنینی بیان قیلیب و ایتیشیچه، کوپینچه قیینچیلیک روپهره بولگن. «الکترونیکی کیملیک آلدیم. آتیمنینگ اصلاح بولیشی اوچون کوپ قیینچیلیک بیلن روپهره بولدیم. حتا قیته کیملیک آلمهیمن دیدم، چون اقتصادی وضعیتیمیز یخشی ایمس. کیملیکنینگ مهم بولگنی اوچون ینه هم کوپینچه قیینچیلیک بیلن آلدیم.»
لیکن پروان یشاوچیسی بولمیش حلیمهنینگ ایتیشیچه، اقتصادی قیینچیلیک سبب کیملیگیدهگی قیینچیلیکنی اصلاح قیلدیره آلمهگن. «تذکره آلگنیمده، آتیم توغری یازیلمهگن ایدی و بونی کورگنیمده اصلاح بولیشی اوچون کابل گه کیت دیدیلر. کابلگچه کوپ خرهجت کیتیشی و اقتصادی وضعیتیمیز یخشی بولمهگنی اوچون قیته کیملیک آلالمهدیم.»
شوندهی بیرحالده، احصائیه و معلومات ادارهسی مسئوللری، الکترونیکی کیملیکلرده باسمه خطالری بولگنینی تصدیقلب و ایتیشلریچه، الکترونیکی کیملیکلرده خطا تکرارلنمسلیگی مقصد بو اداره ایشلاوچیلری امکانیتینینگ آشیریش توغریسیده، تعلیمی سیمینارلر اوتکزیلیشینی نظرگه آلگنلر.
مذکور اداره سوزلاوچیسی محمدحلیم رفیعنینگ ایتیشیچه، بیلگیلری درست یازیلمهگن کیشیلرنینگ الکترونیکی کیملیکلری اصلاح بولیش جریانی، هر کونی کیملیک ترقهتیلهدیگن ادارهلرده دوام قیلماقده، بیراق بو جریاننینگ بیراز زمان آلیشی ممکن. «کیملیکلرده متنی خطالر اصلاح بولیشینینگ هر کونی دوامی بار، لیکن نیچه باسقیچی بار، بیر قطار کیشینینگ ایشی بیر کون یا-ده بیر هفته آلهدی. ولایتدن کیلهدیگن کیشیلرگه قچان کیلیشلری و قیینچیلیکلری حلی اوچون نوبت بیریلهدی.»
کیملیککه ایگه بولیش هر بیر مملکت یشاوچیسینینگ کیملیگی توغریسیده اینگ مهم حجت حسابلنهدی و بولمهگنی صورتده، اهالی کوپ قطار قانونی حقوق، دولتی خذمتلر، مکتب و بیلیم یورتگه ثبتنام بولیش، پاسپورت آلیش و باشقه حجتلردن محروم قالهدی.
ایتیش کیرهک که، افغانستان ده کیملیک ترقهتیلیش جریانیدهگی قیینچیلیکلردن بیری آت، آتهنینگ آتی یا-ده توغیلگن محلنینگ درست یازیلمسلیگی بولیب، کیملیک آلهدیگن کیشیگه قیینچیلیک بیلن روپهره بولیشیگه سبب بولهدی.
