قیش موسومی ییتیب کیلیشی بیلن بیرگه، زابل ولایتی یشاوچیلریدن قطاری یاقیلغی مادهلر اینیقسه یاغاچ قیمتی یوقاریلیگیدن شکایت قیلیب ایتیشلریچه، بو ییل قیش موسومیده، بیر سیر یاغاچ ۶۵-۷۰ افغانی گه ییتیشگن و اولرنینگ یاقیلغی ماده آلیش گه کوچلری ییتمهیدی.
زابل ولایتی یشاوچیلری یاقیلغی مادهلر قیمتی نینگ یوقاریلیگی و ساتیب آلالمسلیکلریدن خواطر بیلدیریب ایتیشلریچه، کون اوتیشی بیلن یاغاچ قیمتی یوقاری کیتهدی.
زابل یشاوچیلریدن محمدخان نینگ ایتیشیچه: «بو ییر گه یاقیلغی ماده ساتیب آلیش گه کیلگنمین، بیراق جودهیم قیمت دیر. هوا ساووق بولگن. بیر یا-ده ایکی سیر یاغاچ کیچیک بیر عایله گه هم ییترلی ایمس. کون اوتیشی بیلن یاقیغلی مادهلر قیمتی یوقاری کیتهدی.»
بیزلرنینگ «ایکس» ترماغی ده هم تعقیب قیلینگ!
شوندهی بیرحالده، زابل مرکزی قلات شهریده یاغاچ ساتهدیگنلر، یاغاچ قیمتلیگی سببی نی، اوشبو ولایتده یاغاچ کملیگی و شونینگدیک قیش موسومیده مرکز و تومنلر آرهسیدهگی یوللر یاپیلیشی عنوان قیلگنلر.
زابل ده یاقیلغی ماده ساتهدیگنلردن عصمتالله نینگ ایتیشیچه: «یاغاچ و بوتهلر نرخی یوقاری کیتگن، بونگه سبب هم بو دیر کیم بوتهلر چوللردن آلیب کیلینهدی، بیراق حاضر چوللر یولی یاپیقلیگی باعث یاقیلغی مادهلر نرخیگه ۱۰-۱۵ افغانی اوزگریش کیلگن.»
شونینگدیک یاقیلغی ماده ساتهدیگنلردن باشقه بیری محمدنبی نینگ ایتیشیچه: «بوتهلر نرخی یوقاری کیتگن و هر بیر سیر یاغاچ ۷۰-۷۵ افغانی گه ییتیشگن، حاضر ییترلیچه یاقیلغی یاغاچ یوقلیگی باعث، میزانی و ارغنداب کبی ایریم تومنلر یشاوچیلری هم یاقیلغی مادهلرینی مرکزدن ساتیب آلیشهدیلر.»
عین حالده، زابل محلی مسئوللری نینگ ایتیشلریچه، باشقه موسوملر گه قرهگنده قیش موسومیده یاقیلغی مادهلر خصوصیده نیاز کوپهیشی سبب، قیمتلر هم یوقاری کیتهدی، بیراق اولر قیمتلر نینگ کنترول بولیشی اوچون سعی و حرکت قیلهدیلر.
بیزلرنینگ فیسبوک صحیفهمیزگه باش اورینگ!
اوشبو ولایت مرکزی قلات بلدیه اورینباسری ضیاءالحق زاهد نینگ ایتیشیچه، یوقاری قیمت بیلن یاقیلغی ماده ساتیلیشی خصوصیده هیچ کیم گه رخصت بیریلمهیدی.
اونینگ کوپهیتیریشیچه: «عرضه گه قرهگنده تقاضا کوپهیگنی پیتده، قیمت یوقاری کیتهدی، بیراق بلدیه توارلر قیمتی نینگ کنترول قیلیش گه علاوه، اوشبو توارلر قیمتی خصوصیده هم جدی اعتبار قرهتگن دیر و قلات بلدیهسی ایسه ترقهتگن نرخنامهسی نی ینه بیر مرته تیکشیرهدی.»
ایتیش کیرهک که، هر ییل هوا نینگ ساووق بولیشی بیلن یشاوچیلر اویلری نی ایسیتیش اوچون یاقیلغی مادهلردن قوللنهدیلر؛ بیراق یاقیلغی مادهلر قیمتی نینگ یوقاریلیگی اولر نینگ قیینچیلیکلری نی کوپهیتیرگن.