پروان ولایتی اوزاق قیشلاقلریدهگی دهقانلرنینگ ایتیشلریچه، ایکینچیلیک ماشینلردن فایدهلنیش ییرنینگ تیارلنیش سرعتینی نیچه برابر کوپهیتیرگن. اوتمیشده، بیر قطعه ییرنینگ هیدهش کونلر دوام قیلیب، عمومی حشر و گروهی ایشلش ضرور ایدی؛ سیگیرلر میدان گه کیلتیریلیب و دهقانلر ایسه کوپ محنت بیلن کیسکلرنی توپراققه ایلنتیرر ایدی.
پروان ولایتی بگرام تومنیدهگی دهقانلردن بیری میرحمزهنینگ ایتیشیچه، دهقانلردن قطارینینگ اقتصادی قیینچیلیگی، قلبه ماشینلریدن فایدهلنه آلمسلیکلریگه سبب بولگن. او، دولت و ایکینچیلیکدن حمایت قیلهدیگن نهادلردن دهقانلرنینگ اوشبو اوسکونهلرگه ایگه بولیش امکانیتینی یرهتیب بیریشلرینی ایستهدی. «دهقانلرنینگ اقتصادی وضعیتی یخشی ایمس که قلبه ماشینینی آلیب کیلگنلریده، اونینگ اجاره پولینی بیرسهلر. دولتدن قلبه ماشینینی ساتیب آلیب و اهالی اختیاریگه قرار بیریشلرینی ایستهیمیز که بو کوپراتیفلر آرقهلی اهالی اوندن فایدهلنسهلر. حاضر دنیاده رواجلنگن مکانیزه اصولیدن فایدهلنیش وقتی کیلگن.»
اوشبو تغییر نهفقط سرعتنینگ کوپهیشیگه سبب بولهدی، بلکیم صرف-خرهجتنی هم کمهیتیرهدی و دهقانلر وقت همده ایش کوچلرینی ایکینچیلیکنینگ باشقه بولیملریده ایشلهتیشلری ممکن.
پروان دهگی ایکینچیلردن باشقه بیری زمریالی، تکنولوژیدن فایدهلنیشگه ایشانچ بیلن گپلهشیب؛ بیراق اوهم تیگیشلی ادارهلر آرقهلی دهقانلرنینگ سنتی ایکینچیلیکدن مکانیزهلشگن ایکینچیلککه اوتیشده قوللب-قوتلنیش امکانیتی یرهتیلیشی کیرهکلیگیگه تاکیدلهیدی. اونینگ کوپهیتیریشیچه: «اوتمیش ده، بیر دهقان ییرینی قوش هیدهش اوچون سیگیر یا-ده ایشکدن ایش آلهر ایدی که بو ایش کوپ وقتنی آلهر ایدی؛ بیراق حاضر ایسه ماشین یالغیز بیش لیتر تیل بیلن بیر جریب ییرنی ۱۰-۱۵ دقیقهده قلبه قیلهدی. دهقانلردن کوپ قطاری بوغداینی سماندن اَیریش اوچون شمالنی کوتیب تورهر ایدیلر و شونینگدیک بادامنی پروسس قیلیش اوچون هر دانهنی تاش بیلن سیندیرهر ایدیلر. حاضر تیگیشلی نهادلرنینگ زراعت بیلن دهقانلرگه ایکینچیلیک ماشینلردن کینگ کولمی شکلده فایدهلنیش امکانیتینی یرهتیشلری وقتی دیر.»
شوندهی بیرحالده، پروان دهگی دهقانلردن باشقه بیری گلمیرنینگ ایتیشیچه، سنتی ایکینچیلیک کوپ وقت آلیب و کوپینچه خرهجت کوتارهدی. او حاضر قلبه ماشینی، تریشل و اوریش دستگاهلری کبی اوسکونهلردن فایدهلنیش بیلن، مکانیزهلشگن ایکینچیلیک کیلهجگی توغریسیده امیدوار دیر.
اونینگ کوپهیتیریشیچه: «اوتمیشگه قرهگنده، هم قوش هیدهشده آسایشتهلیک کیلگن و همده اوریشدن کوپ آسایشتهلیک کیلگن. اوتگن ییللرده ۲۰ کون یا-ده بیر آیده شوو ییرده بولهر ایدیک، حاضر آسایشتهلیک کیلگن که ماشین شو ییرده بیر ساعتده هم سماننی همده دانهنی اَیرهدی. بو ماشینلر افغانستان گه کیلتیریلگنیده، دهقانلر زحمت و قیینچیلیکدن بیغم بولهدی.»
ایکینچیلیک ایش بیلرمانلریدن قطارینینگ ایتیشلریچه، مکانیزهلشتیرماق ایکینچیلیک تولیدلری میزانینی نیچه برابر کوپهیتیره آلهدی؛ بیراق بو پروسهنینگ انیق برنامه و تعلیم بیلن نتیجه بیریشی ممکن.
پروان دهگی باغدارلیک بوییچه ایش بیلرمانلردن احمدزبیر قاضیزادهنینگ اورغولشیچه، تعلیم بیریلیش یانیده ییردن فایدهلنیشیگه تغییر کیلیشی جدی بیر نیاز دیر. اونینگ ایتیشیچه: «بیرینچیده ییردن فایدهلنیش و ایکینچیلیک ییرلرنینگ مدیریت بولیشی اوچون منظم پالیسی یرهتیلسین، ایکینچیده دهقانلر اوچون مسلکی خذمتلر یرهتیلسین و اوچینچیده ایسه دهقانلرگه اقتصادی یاردم بیریلسین. قیینچیلیکنی یالغیز تعلیم حل قیله آلمهیدی؛ مکانیزهلشیش شرایطینی یرهتیشیمیز کیرهک. اولرگه ایکینچیلیک قرضلر امکانیتینی یرهتیشیمیز کیرهک که حاصللر کوپهیشی و افغانستان ده ایکینچیلیکنینگ یخشی مدیریت بولیشیگه سبب بولسین.»
بولرگه علاوه، پروان ایکینچیلیک، سووغاریش و چاروهچیلیک ریاستینینگ زراعتی ایشلر بوییچه آمری نیازمحمد تایب، اوشبو ولایتده دهقانلردن قریب ۹۰ فایزینینگ ایکینیچلیک تکنولوژیسیگه قول تاپیش امکانیتیگه ایگه بولگنینی تخمین اورگن. اونینگ اورغولشیچه، زمانهوی اوسکونهلردن فایدهلنیشگه دهقانلرنی تشویق قیلیش اوچون بیر قطار برنامهلر عملگه آشیریلماقده.
اونینگ ایتیشیچه: «پروان ایکینچیلیک ریاستینینگ مکانیزه بوییچه مدیریتی، هر ییلی قولیده بولگن امکانیتلرنی نظرگه آلیب، دهقانلرنی مکانیزه اوسکونهلریگه تشویق قیلهدی و اولرنینگ فایدهلرنی اولر بیلن شریک قیلهدی؛ بو ولایتدهگی دهقانلر مکانیزهلشگن ایکینچیلیککه قیزیققن دیر. ۲۸ مینگ ۲۸۸ هکتار ییرنی تورلیخیل ماشینلر آرقهلی قلبه قیلگنمیز؛ دهقانلردن ۹۰ فایزی ایکین و ییغیم-تیریم اوچون ماشینلردن فایدهلنهدیلر.»
حاضر پروان ولایتینینگ دشتلریدن کوپ قطاریده قوش هیدهلگن تازه توپراق هیدی بیلن ماشینلر سیسی قوشیلگن که اوشبو آرام بیراق دواملی سنتی ایکینچیلیکنینگ زمانهوی ایکینچیلیککه اوتیشی نشانهسی دیر. تکنولوژینینگ کوپراق رواجلنگنی، دهقانلرنینگ آگاهیلیک سطحی آشگنی و ایکینچیلرنی قوللب-قوتلش نهادلرنینگ حمایت قیلیش امکانیتی یرهتیلگنی حالده، یقین کیلهجکده بو اوتیش جریانی مذکور ولایتنینگ ایکینچیلیک سیماسینی اوزگرتیریشی ممکن.
