هرات ولایتی بوییچه قصاب‌لر بیرلشمه‌سی مسوول‌لری و یشاوچی‌لری نینگ ایتیش‌لریچه، چاروالرنینگ قاچاق آرقه‌لی قوشنی مملکت‌لرگه انتقال بیریلیشی سبب، اوشبو ولایت بازارلریده گوشت نینگ بهاسی یوقاری کیتگن. هرات ولایتی بوییچه قصاب‌لر بیرلشمه‌سی مسوول‌لری نینگ آگاه‌لنتیریشلریچه، چاروالرنینگ قاچاقی‌گه توسیق بولینمه‌گن صورتده، گوشت بهاسی نینگ یوقاری کیتیشی ممکن.
هرات ولایتی بوییچه قصاب‌لر بیرلشمه‌سی باشلیغی عبدالقدیر رحیمی‌زاده نینگ سلام‌وطندارگه ایتیشیچه، نیچه پیت آلدین اوشبو ولایتده بیر کیلو گوشت ۳۸۰ افغانی ساتیله‌ریدی، لیکن حاضرده ۴۵۰ افغانی ساتیله‌دی. جناب رحیمی‌زاده گه کوره، اولرنینگ تیکشیریش‌لریگه کوره، کونده ۴ الی ۵ مینگ چاروا قاچاق آرقه‌لی ایران گه انتقال بیریله‌دی.
عبدالقدیر رحیمی زاده نینگ کوپه‌یتیریشیچه، بو موضوعی هرات محلی مسوول‌لری بیلن شریک قیلگنلر، لیکن حاضرگه‌قدر هیچ‌قنده‌ی دقت صورت تاپمه‌گن. اونینگ ایتیشیچه، وضعیت بونده‌ی دوام قیلگن صورتده، کیله‌سی ییلده چاروا کم‌لیگی بیلن دوچ کیلیش‌لری ممکن.
هرات یشاوچی‌لری هم اوشبو ولایتده گوشت بهاسی یوقاری کیتگنی خواطرلنترووچی عنوان قیلیب ایتیش‌لریچه، حاضرده بیر کیلو گوشت ۴۵۰ افغانی دن باشلب ۴۸۰ افغانی گچه ساتیله‌دی.
هرات محلی مسوول‌لری، چاروالرنینگ قوشنی مملکت‌لرگه قاچاق ایتیلیشینی تصدیق‌لب ایتیش‌لریچه، امنیتی کوچلر اینقسه پولیس کوچلری مملکت چیگره‌لریده جایلشتیریلگن و هرقنده‌ی قاچاققه توسیق بولیش اوچون سعی و حرکت قیله‌دیلر.
هرات حاکمی سوزلاوچیسی جیلانی فرهاد نینگ ایتیشیچه: «چیگره پولیسی چیککه‌سیده بوتون کشفی و استخباراتی نهادلر قاچاققه توسیق بولیش اوچون سعی و حرکت قیله‌دیلر.»
چیگره پولیسی هم چاروالرنینگ چیت‌ایللیک مملکت‌لرگه قاچاق ایتیلیشی‌گه رخصت بیرمه‌یش‌لریدن ایشانچ بیره‌دیلر.