کیچیک بیر صناعتی ایشخانه، صبر و ظرافت بیلن سفالنینگ ساووق یوزیگه صناعت روحینی جایلهیدیگن قوللرگه میزبانلیک قیلماقده. اوشبو ایشخانهگه قیزلردن قطاری هر کونی ییغیلیب، میناکارلیک صناعتی آرقهلی عادی سفال ایدیشلرینی مدنیت، طبیعت و حیاتنینگ رنگ-برنگ حکایهلریگه اَیلنتیرهدی.
کوندهلیک مذکور سعیوحرکتلر، رنگ هیدی، سفال توپراغی و یالغیز مویقلملرنینگ سفال یوزیگه تیگیش آوازی بوزهدیگن سکوت ارهلشگن محیطده شکللنهدی. اولر گللر، تاریخی بنالر و عنعنهوی منظرهلردن عبارت نقشلرنی چیزهدیلر که هر بیر نقش، اولرنینگ ایجادی افکاری و یشهگن تجربهسینینگ عکسی دیر.
اوشبو صناعتچی قیزلردن و مذکور ایشخانهدهگی ایشلاوچیلردن بیری زهرا اکبرینینگ ایتیشیچه، میناکارلیک یالغیز صناعتی بیر فعالیت ایمس، بلکیم تویغولرنی بیان قیلیش، فرهنگی کیملیکنی سقلش و قیین کوندهلیک حیاتده معنا تاپیش دیر. «بو ایشخانهگه کیلگنیمدن ییتی آی بولگن. صناعت گه قیزیققنیم باعث بو ایشگه باشلهدیم. هم رنگ-برنگ صناعت و هم قیزلر بولگن ییرگه کیلیش، برچه کیشینینگ فکری اوچون جودهیم یخشی دیر. اویگه بولسهک افسرده بولهمیز. تشقریگه چیقیش، ایشلش و بیرگه بولیش، خوشلیککه سبب بولهدی.»
مذکور ایشخانهده ایش بیلن شغللنگن قیزلر و عیاللردن قطاری، چیکلاولر سبب تحصیل و ایشدن محروم قالگن. اوشبو قیزلرنینگ ایتیشلریچه، بو ایشخانهده اولرگه یرهتیلگن فضا، اولرنی یکهلیکدن اوزاقلشتیریب و روحی باسیملرینی کمهیتیرگن.
بو ایشخانهدهگی ایشلاوچیلردن بیری عایشه چشتینینگ ایتیشیچه: «تحصیل قیلهر ایدیم؛ تحصیلی چیکلاو یرهتیلگنیده، بو ییرگه کیلدم و بویهش ایشلری بیلن شغللنگنمین که مینی فکریمگه جودهیم ایجابی تاثیر قویگن.»
اوشبو ایشخانهدهگی قیزلردن قطاری، بو صناعتنی اجتماعی و اقتصادی حضورلری اوچون قالگن یگانه یول بیلهدیلر که شخصی کیملیکنی سقلش یانیده مالی مستقللیک سری بیر منبع بوله آلهدی.
بو توغریده صناعتی ایشخانه ایشلاوچیلریدن عاصیه کاکرنینگ ایتیشیچه: «افغانستاننینگ حاضرگی وضعیتی قیین دیر و عیاللرنینگ باریش اوچون هیچ جایی یوق. یالغیز آچیق بولگن ایشیک، صناعت ایشیگی دیر و اقتصادی نقطهی نظریدن هم فایدهسی بار.»
مذکور صناعتی ایشخانه مسئولی قریش ملکزاده، بو فضانینگ آچیلگنیدن مقصد صناعتچی عیاللرنی قوللب-قوتلش و تعلیم، تولید و هنری اثرلرنی چیقریش زمینهسینی یرهتیش عنوان قیلگن.
اونینگ کوپهیتیریشیچه، حاضر اوشبو ایشخانهده ۲۵ عیال سفال یوزیگه میناکارلیک صناعتینی اورگهنیش بیلن شغللنیب و اثرلر ساتییشی اولردن قطاری اوچون درآمد منبعسیگه اَیلنگن. قریش ملکزادهنینگ کوپهیتیریشیچه: «مین هم رئیس همده ایشلاوچیمین. بو ییلنی باشلهگنیمدن توقیز ییل بولهدی، ۲۵ ته شاگردیم بار و اولر ایشنی اورگنگنلریدن کیین اوزلری ایشخانه آچیب و شاگرد آلهدیلر.»
قیزلر و عیاللر اوچون اجتماعی و اقتصادی فرصتلر آز بولگنی بیر شرایطده، مذکور ایشخانه خلاقیت و امید اوچون بیر باشپنه گه اَیلنگن. بو جایده سفال ایدیشلرگه میناکارلیک صناعتی، نهفقط تزیینی بیر نقش، بلکیم برقرارلیک، کیملیک و صناعتچی عیاللرنینگ اوچمهگن سیسی رمزی دیر.
