افغانستان شمالیده ۱۲-عقرب یوز بیرگن ۶.۳ درجه ریشترلیک زلزله، بلخ ولایتی شولگره تومنیده هم اونلب یشش اوینینگ خراب بولیشیگه سبب بولگن. بو واقعه طفیلی ییتیشگن جانی و مالی زیانلر، محل یشاوچیلری حیاتینی جدی شکلده تاثیرلنتیرگن.
بوندن آلدین اقتصادی قیینچیلیکلر بیلن روپهره بولگن شولگره تومنی یشاوچیلری، زلزله و اونینگ نتیجهسیده ییتیشگن ویرانلیکلر بیلن، خواطرلری کوپهیگن. محل یشاوچیلرنینگ ایتیشلریچه، اقتصادی بحران بیلن روپهره بولگنلری بیر حالده، حاضر ایسه اویلرینینگ خرابلیگی و باشپنهسیزلیک بیلن، اینگ قیین شرایطده قالگنلر.
باشپنه قوریلیشی، آزیق-آوقت یاردملری تامینلنیشی، یخشیراق دوالنیش خذمتلری کورسهتیلیشی و یاقیلغی مادهلر ترقهتیلیشی، بو منطقه یشاوچیلرینینگ اینگ اونملی ایستهکلریدن دیر.
زلزله نتیجهسیده اویی بوزیلگن اوشبو تومن یشاوچیلریدن شکریهنینگ ایتیشیچه، اویی قیته قوریلیشی اوچون امکانیتی بولمهی، ییتیب کیلهیاتگن قیشده بالهلری وضعیتیدن خواطرلنگن. «اویلر تامینی قوریشگه پولیمیز یوق؛ اویلریمیز دیوارلری یاریلگن. دولت بیزگه یاردم بیرسین و بیزلرگه بیران نرسه تامینلهسین که قیشده تیریک قالهیلیک. هیچ بیر نرسهمیز یوق.»
شونینگدیک شولره تومنی یشاوچیلریدن باشقه بیری سخیدادنینگ ایتیشیچه، اویلری قوریلیشی و قیته قوریلیشی اوچون تیز و کوپینچه یاردمگه نیازلری بار. «یالغیز شو آیده، یاردم بیرووچی نهادلردن بیری کیلیب و ایکی ته کمپل یاردم بیردی. اون و یاغیمیز یوق. ایش یوق. ییر و جایدادیمیز هم یوق. باشپنه و پول گه نیازیمیز بار که حیاتیمیز نی قیتهدن باشلسهک. اویلریمیز ویران بولگن.»
شولگره، ۱۸۰ مینگدن آرتیق جمعیت گه ایگه بولیب و سونگی زلزلهده، بو تومنده اویلردن قطاری بوتونلی یا-ده قسمی شکلده ویران بولگن.
عایله سرپرستی و زلزلهده اویی بوزیلگن گلالی، حتا عادی وضعیتده عایله نیازلرینینگ تامینلشی قیین بولگنینی بیان قیلیب و ایتیشیچه، حاضر ایسه اویینینگ بوزیلگنی بیلن قیینچیلیگی نیچه برابر بولگن. «بیوهمین و عایله نیازلرینی تامین قیله آلمهیمن. حاضر اوییمیز بوزیلگن، بیزلرگه یاردم بیریلیشی کیرهک که اوییمیزنی قیته قورهیلیک. قیش ییتیب کیلماقده و یاغینگرچیلیک بولهدی. خیمهده بولهمیز که هوا ساووق بولگن و بالهلریم تیترهیدی. بو اویلرده ایندی حیات کیچیریشنینگ امکانی یوق، چونکه تامی تکهتکه بولگن.»
شوندهی بیرحالده، شولگره ولسوالی اورینباسری عینالدین فاروقنینگ ایتیشیچه، یوز بیرگن سونگی زلزلهده ایکی باله اولیب، ۴۳ کیشی یرهلنگن و شونینگدیک قریب ۲۰۰ یشش اوی خراب بولگن. «مذکور طبیعی حادثه یا-ده زلزلهده، شولگره تومنیده قریب ۲۰۰ یشش اوی بوزیلگن. بو تومنده ایکی کیشی شهید بولدی، ۴۰ دن آرتیق کیشی یرهلندی. شونینگدیک ۱۰۰ دن آرتیق چاروه تلف بولدی. برچه دولتی و امنیتی نهادلر اهالی خذمتیده ایدی و امکانیتیمیزده بولگن هر نرسهنی، اهالی گه کورستدیک.»
افغانستان شمالی ولایتلرینینگ بیر قطار بولیملریده ۱۲-عقرب، ۶.۳ درجه ریشترلیک زلزله یوز بیردی که نتیجهده، ۲۷ کیشی اولیب و بیر مینگدن آرتیق کیشی یرهلندی.
