غور ده شفاکارلرنینگ ایتیشلریچه، تخمدان کیستی تخمدان ایچیده یا-ده اوستیده شکللنهدیگن، اینگ کینگ ترقلهدیگن کسللیکلردن بیری بولیب و عیاللرنینگ هر بیر یاش اینیقسه حاملهدارلیک یاشلریده بو کسللیککه چلینیشلری ممکن.
نسایی-ولادی شفاکارلریدن فریبا مشفقنینگ سلاموطندار گه ایتیشیچه، قریننینگ قویی قسمیده آغریق، حیض ترتیبسیزلیگی، قیتریش، طبیعی بولمهگن شکلده قان کیتیشی و ایاقلر آغریشی بو کسللیکنینگ علایملریدن بولیب و بو علایملر کوریلگنی صورتده، عیاللرنینگ شفاکار گه باریشی کیرهک.
اونینگ کوپهیتیریشیچه: «کسل قرنینینگ قویی قسمیده بیر آغیرلیک یا-ده آغریقنی حس قیلهدی. کیست یاریلگنی صورتده، کسل جدی آغریق بیلن روپهره بولهدی و کیست تخمداننینگ اَیلهنیشیگه سبب بولسه، کسل قیتریش حالتی بیلن جدی آغریققه چلینهدی. شونینگدیک ایاق و بیل قسمیده آغریقنی حس قیلیش کبی باشقه علایملری هم بار.»
شونینگدیک نسایی-ولادی شفاکارلریدن باشقه بیری فاطمه پوپلنینگ ایتیشیچه، کسیتلردن کوپینچهسی اونچهلیک خوفلی ایمس؛ لیکن آز و جدی موردلردن قطاری بیپشتلیک و تخمدان سرطانیگه سبب بوله آلهدی. «تخدان کیستینینگ فرقی بار. بعضا اوز باشیمچهلیک شکلده بیپشتلیککه سبب بولمهی و هیچ قندهی خوفی یوق، بیراق بعضا کیستلر بیپشتلیککه اینیقسه تخمدان سندرومی یا-ده پلیکیستیک گه سبب بولهدی یا-ده کیست کوپ کته یا هم کوپینچه بولگنیده، لولهلرنینگ بند بولیشی و بیپشتلیککه سبب بولهدی.»
شونینگدیک غور دهگی شفاکارلرنینگ ایتیشلریچه، بو ولایتدهگی عیاللر تخمدان کیستی علایملری توغریسیده ییترلی معلومات گه ایگه ایمسلر و بعضا ایسه، شفاکار بیلن مصلحت قیلمسدن اوز باشیمچهلیک شکلده دوالنیش اوچون اقدام قیلهدیلر. اولرنینگ اورغولشیچه، آگاهیلیک بیریش، مصلحت و وقتیده شفاکار گه باریش، تخمدان کیستی تشخیص بولیشی و دوالنیشیده اونملی اورینگه ایگه دیر.
شوندهی بیرحالده، تخمدان کیستیگه چلینگن غور دهگی عیاللردن قطارینینگ ایتیشلریچه، اولر باشده بو کسللیکنی جدی آلمهی و اونی حیض کوریش دورهسیدهگی عادی قیینچیلیک بیلگنلر.
بو کسللیککه چلینگن عیاللردن بیری غور یشاوچیسی بولمیش گلچهرهنینگ ایتیشیچه: «شفاکار که باردیم و مینگه کیستینگ بار دیدی. بالهم هم بولگنی یوق. حیض کوریشیمده کوپ اذیت بولهمن و شفاکار گه باریب دارو آلهمن و یخشی بولهمن. بعضا هم سوزاک بولهمن و کوپ قیین دیر. شفاکارلر دارو بیلن بولمهیدی و عملیات بولیشینگ کیرهک دیدیلر.»
شونینگدیک بو ولایت یشاوچیلریدن و تخمدان کیستیگه چلینگن عیاللردن باشقه بیری ستارهنینگ ایتیشیچه: «بیر نیچه وقت آلدین قرنیم قسمیده جدی شکلده آغریقنی حس قیلهر ایدیم و حیض کوریشیم نامنظم بولگن ایدی. شفاکار گه باردیم، تخمدان کیستینگ بار دیدی و دارو آلدیم، شکر اوشه آغریقلر کمهیدی و کسللیگیم یخشی بولگن.»
مذکور عیاللرنینگ تجربهسی، شفاکار گه باریش و وقتیده کسللیکنینگ تشخیص بولیشی، تخمدان کیستینینگ یامان عاقبتلری آلدی آلینیشینی کورستهدی.
