حاملهدارلیک حساس بیر دوره بولیب، آنهلر و چقهلاقلرنینگ ساغلیگیده مهم اورینگه ایگه بولگن درست آوقتلنیش مراقبتلرینی طلب قیلهدیگن؛ لیکن حاملهدار عیاللردن قطاری حاملهدارلیک دورهسیده سیمیز بولیشدن خواطرلنیش سبب قتیق رژیم توتهدیلر که بو ایش، تنهگه ضرور بولگن قوتلی مادهلرنینگ کمهیشی و جنین وزنی کم بولیشیگه سبب بولهدی.
نسایی ولادی و عمومی ایچکی بولیم شفاکارلرینینگ ایتیشلریچه، عیاللرگه حاملهدارلیک دورهسیده رژیم آلیش توصیه بولمهیدی؛ چونکه جنین ساغلیگی آنهنینگ درست آوقتلنیشیگه تیگیشلی دیر. نسایی ولادی شفاکارلریدن ریحان قادری، حاملهدارلیک دورهسیده آنهلرنینگ مناسب شکلده آوقتلنیشی اهمیتیگه تاکیدلب و ایتیشیچه، حاملهدار عیاللر اوچون هیچ قندهی رژیم توصیه بولمهیدی.
اونینگ کوپهیتیریشیچه، حاملهدار عیاللر کون جریانیده اوچ پیتدن کوپراق آوقت اییشلری کیرهک. «بیر عیال حاملهدار بولگنیده، اونگه آوقتلرنی آز قیلمهیمیز؛ چونکه چقهلاغینینگ توییب آوقتلنیشیگه سبب بولهدی. هیچ قچان حاملهدار عیاللرنینگ رژیم آلمسلیگی کیرهک. حاملهدار عیاللر اوچ پیتدن کوپراق یعنی ایکی پیت آخشم هم آوقت اییشی کیرهک. معده قیینچیلیگی بولگنیده، تیز-تیز لیکن آز-آز آوقت اییشی کیرهک. عایلهده اینگ یخشی آوقت، حاملهدار عیالنینگ حقی دیر. آنه درست آوقتلنگنی صورتده، جنین ساغلام بولهدی. وزنلری کوپ بولگن عیاللرگه هم، حاملهدارلیک دورهسیده رژیم بیریلمهیدی.»
شونینگدیک کاپیسا ولایتی نجراب تومنینینگ ۵۰ یاتاقلی کسلخانهسیدهگی عمومی ایچکی بولیم شفاکاری عبدالمحسنگه کوره، حاملهدارلیک دورهسیده آنهنینگ درست آوقتلنمسلیگی توغیشدن کیین هم آنهنینگ ساغلیگیگه زیان ییتیشتیره آلهدی. «قتیق ژریم، یعنی آز آوقت. بیر تورلی آوقتگه نیازیمیز یوق، تورلیخیل آوقتگه نیازیمیز بار. ژریم آلهدیگن عیاللرنینگ باشده تنهنینگ محافظه قیلووچی سیستمی قویی کیتهدی. برچه تنه اعضاسیگه تاثیر قیلهدی و اینیقسه آز ژریم آلگنلریده دی ویتامینی، پروتین و کلیسیم کملیگیگه چلینهدیلر. توغیشدن کیین قتیق باش آغیریق اوچون باشلرینی باغلهیدیگن عیاللر، حاملهدارلیک دورهسیده آهن کملیگیگه چلینیب و عادی شکلده آهن آلمهگنلر.»
کاپیسا ولایتی نجراب تومنینینگ ۵۰ یاتاقلی کسلخانهسیده بالهلر متخصص شفاکاری غلامحضرتگه کوره، چقهلاق ساغلیگی آنه ساغلیگیگه تیگیشلی دیر و آنهنینگ درست و مناسب شکلده آوقتلنگنی صورتده، چقهلاق ساغلام بولهدی. «هر بیر حاملهدار عیال حاملهدارلیک دورهسیده تورلیخیل آوقتلردن فایدهلنیشی کیرهک. کوپراق قوتلی مادهلری همده ویتامینلری و منراللری بولگن آوقتلر؛ چونکه بیر آنه حامله بولگنیده، بیر نرسه اونگه فایدهلی بولهدی و باشقه بیرتهسی ایسه چقهلاغی رشدی اوچون کوپ اهمیتی بولهدی. آنه قارنیده بولگن جنین، آنه آرقهلی آوقتلنهدی.»
مذکور شفاکارنینگ آگاهلنتیریشیچه، بیر آنه حاملهدارلیک دورهسیده رژیم آلگنی صورتده، چقهلاغی توییب آقتلنمسلیککه چلینیب دنیا گه کیلهدی و کیلهجکده هم بو چقهلاقنینگ باشقه بیر قطار قیینچیلیکلر بیلن روپهره بولیشی ممکن. «توییب آوقتلنمهیدیگن و درست آوقتلنمهیدیگن آنهلر چقهلاغی، یا وقتدن آلدین دنیا گه کیلهدی یا-ده چقهلاق هم توییب آوقتلنمهیدیگن شکلده دنیا گه کیلهدی. بو وضعیت کیلهجکده هم چقهلاق و عایلهسینی قیینچیلیک بیلن روپهره قیلهدی و حتا عصب سیستملرینینگ درست تکمیل بولمسلیگی یا-ده کیلهجکده فلج بولیشیگه سبب بوله آلهدی.»
حاملهدارلیک دورهسیده رژیم آلگن عیاللردن ۳۵ یاشر نرگس، بیش باله آنهسی بولگنینی بیان قیلیب و ایتیشیچه، آخرچی فرزندیده رژیم آلگن و چقهلاغی آز وزن بیلن دنیا گه کیلیب، باشقهلریگه نسبت ضعیفراق دیر. «بیش بالهم بار؛ ییتینچی آیده رژیم آلدیم. فشارم بار و وزنم هم کوپ دیر، انه شوو سبب رژیم آلدیم. اوزیم رژیم آلیشگه قرار آلدیم. کوپراق سبزهوات و میوه آلیدیم، یاغلیک نرسه اییمس ایدیم، قیغو بیلن بو فرزندیم باشقهلریگه نسبت ضعیفراق دنیا گه کیلدی. قریب ایکی یریم کیلو ایدی.»
اوچ باله آنهسی بولمیش کاپیسا ولایتی حصهی اول کوهستان تومنی یشاوچیسی ۳۰ یاشر فاطمهنینگ ایتیشیچه، حاملهدارلیک دورهسیده وزنی کنترول بولیشی اوچون رژیم آلیب و انه شوو سبب، درست آوقتلنمهگن. «سیمیزلیک ارثی دیر؛ انه شوو سبب برابر وزن بیلن دنیا گه کیلمهدی، چونکه درست آوقتلنمهدیم و رژیم آلگن ایدیم. حاملهدارلیکده باش ایلهنیش، چرچهش و یورهک بوزیلمهم بار ایدی. درست آوقتلنه آلمس ایدیم و انه شوو سبب، بالهمنینگ وزنی آز بولدی.»
مذکور عیاللردن باشقه بیری گلجاننینگ ایتیشیچه: «معده قیینچیلیگیم بار ایدی، درست اشتهام یوق ایدی و آوقت اییگنیمده هم یورهگیم بوزیلیب و باشیم ایلنر ایدی. انه شوو سبب کوپ آوقت آلمس ایدیم، کیین بالهم دنیا گه کیلگنیده کوپ ضعیف ایدی.»
شفاکارلرنینگ اورغولشیچه، ناساغلام آقت رژیملری آنه و چقهلاق ساغلیگینی خوف بیلن روپهره قیله آلهدی. اولرنینگ کوپهیتیریشلریچه، حاملهدارلیک دورهسیده ساغلام رژیم توغریسیده عیاللر آگاهیلیگی آشیریشی بیلن، آنهلر و چقهلاقلرنینگ ساغلام بولیشی ممکن.
