جمهورلیک ریاستی و محلی ارگان‌لر مستقل اداره‌سی نینگ ریجه‌سی آرقه‌لی، نیچه مدتدن بویان بیرقطار ولایت‌لرده ولسوال‌لیک سیلاوی باشلنگن و بیرینچی مرته بوتوغریده پنجشیر ولایتی ننیگ حصه‌اول تومنیده آواز بیریش صندوق قوییلدی.
پنجشیر ولایتی نینگ حصه‌اول تومنی ولسوالی میرویس شجاعی نینگ سلام‌وطندارگه ایتیشیچه، اهالی تامانیدن ولسوال انتخاب قیلیش اوچون اوتگن کونی سیلاو یولگه قوییلگن. اونینگ کوپه‌یتیریشیچه، جمهورلیک ریاستی و محلی ارگان‌لر ارکین اداره‌سی نینگ ریجه‌سی آرقه‌لی، اوشبو تومن ده بولگن ۷۰ کینگی تیریش کینگشدن ۲۸۰ کیشی سیلاوگه اشتراک قیلگن.
حصه اول تومنی ولسوالی نینگ ایتیشیچه، ولسوال‌لیک کرسی‌سینی قولگه کیلتیریش اوچون ۱۲ کیشی اوزلرینی نامزد قیلگن و بوجمله‌دن ۳ ته‌سی یوقاری آوازنی قولگه کیلتیریب محلی ارگان مستقل اداره‌سیگه تانیتیلگن و بوجمله‌دن معیارگه ماس بولگن ۱ کیشی ملی خوفسیزلیک کینگشی تامانیدن ولسوال صفتیده تانیتیله‌دی.
عین‌حالده، مذکور سیلاو دن میعاری آوازنی قولگه کیلتیره آلمه‌گن نامزدلردن بیری مولوی فضل‌ادیب نینگ سلام‌وطندارگه ایتیشیچه، اوشبو سیلاو جمهور رییس نینگ ۱۷۵۱ و ۲۹۴۶ شماره‌لی ایکی فرمانی گه قرشی یولگه قوییلگن.
پنجشیر یشاوچی‌لری ولسوال‌لرنینگ سیلاو آرقه‌لی انتخاب ایتیلیشی‌نی خوش قرشی‌لب و اهالی نینگ آواز آرقه‌لی انتخاب ایتیلگن ولسوال‌لر محلی حکومت اوچون فایده‌لی دیگنلر.
پنجشیر ولایتی نینگ حصه‌اول تومنیده یولگه قوییلگن سیلاویدن ایجابی آواز قولگه کیلتیرگن بیرقطار نامزدلر نینگ ایتیش‌لریچه، اوشبو روند نهایی گزینشیده ملی خوفسیزلیک کینگشی تامانیدن سیاسی برخورد صورت تاپیشیدن خواطرگه دیرلر. اولرنینگ ایتیش‌لریچه، ملی خوفسیزلیک کینگشی سیاسی مصلحت اورنیده معیارلرنی نظرگه آلیشی کیره‌ک.
حاضرده پنجشیر ولایتی نینگ حصه اول تومنیده اهالی آوازی آرقه‌لی انتخاب ایتیلگن ۳ کیشی محلی ارگان‌لر ایرکین اداره‌سی و ملی خوفسیزلیک کینگشی نینگ قرارینی کوتیب تورماقده دیر و اولردن قیسی ولسوال صفتیده تعیین ایتیلشی بیللی ایمس.
پنجشر محلی مسووللری نینگ ایتیش‌لریچه، حصه اول تومنی نینگ ولسوالی‌نی انتخاب قیلیش اوچون یولگه قوییلگن سیلاو آچیق و مردم سالارلیک فضا ده تنیق شکلده بولیب اوتگن.