مین هادی هادی، کابل شهریده خصوصی بیلیم یورتلردن بیریده کمپیوترساینس طلبهسی من. شونینگدیک، تیل اورگهنیش مرکزلریدن بیریده خلقارا «تافل» امتحانیگه تیارگرلیک کورهیپمن.
صنعی هوش بیلن تنیشوویم ایسه کوندهلیک حیاتده تنیش بولگن بیر ایشیکدن باشلندی – اجتماعی ترماقلر و دیجیتالی دنیا آرهلیغیدهگی مکاندن. انترنتده سَیر قیلیب یورگندیم، یوتیوبدهگی تعلیمی ویدیولرنی تماشا قیلر، انستاگرامدهگی موضوعلرنی کوزدن کیچیرردیم. شو جریانده استه-سیکین و اوزلوکسیز روشده، صنعی هوش دیب اتهلوچی قدرتلی حادثهنینگ تاپیلیشی حقیدهگی مطلب گه دوچ کیلدیم. کوپچیلیک فایدهلنوچیلر صنعی هوشنینگ کوندهلیک حیاتدهگی قوللنیلیشی همده تعلیم و اورگهنیش جریانلریدهگی اورنی حقیده سوز یوریتر ایدی.
دستلب بو موضوعلر کوپراق ینگی تاپیلهیاتگن، ایشانیب بولمس درجهدهگی تکنالوژی، گویا کیلهجکدن کیلیب، استه-سیکین انسانلر حیاتیگه کیریب کیلهیاتگن بیر حادثهنینگ تنیشتیرووی کبی ایدی. عینن شو ینگیلیک و حیرتآموزلیک حسی مینینگ قیزیقیشیمنی اویغاتدی و مینی بو تکنالوژی بیلن تنیشیش همده او بیلن ایشلش گه ییتکلهدی.
بو تکنالوژی بیلن تنیشیشدن و اونگه مراجعت قیلیشدن اول، آنگیمدهگی صنعی هوش صورتی اساساً علمی-فنتستیک فلملر و حکایهلردن شکللنگن ایدی؛ مرکب و نامعلوم درجهده خواطرلی بیر تکنالوژی. مین اونی یا دنیانی قوتقرهدیگن، یا ایسه اونگه تهدید سالهدیگن کوچ دیب تصور قیلردیم. دستلبکی تصوریم گه کوره، صنعی هوش فقط عالملر، مسلکی دستورچیلر و ییریک کمپنیهلر اختیاریده بولیب، عادی آدملر اوندن اونچه فایده کوره آلمهیدی، دیب اویلردیم.
مین اونی بیر کون کیلیب شخصی حیاتیمده و اوقیش جریانیمده بونچهلیک آسان ایشلته آلیشیمنی تصور هم قیلمهگن ایدیم. تخمیناً بیر ییل اول صنعی هوش بیلن تنیشیش و او بیلن ایشلش بوییچه ایلک ریئل و عملی تجربهلریم باشلندی. بو تنیشو کتته بیر مقصد بیلن ایمس، بلکی قیزیقیش طفیلی و عادی ایشلرنی بجریش اوچون باشلنگن ایدی. اوشه پیتلرده مین صنعی هوشدن اساساً معلومات ایزلش، قیسقه متنلرنی ترجمه قیلیش و عمومی سواللر گه جواب آلیش اوچون فایدهلنردیم. مینینگچه، اونینگ امکانیتلری چیکلنگن بولیب، بو دستلبکی فایدهلنیشلردن آرتیق نرسه کوتیب بولمهیدی، دیب اویلردیم.
بیراق، وقت اوتیشی بیلن قرهشلریم اوزگردی. صنعی هوشدن قنچه کوپ فایدهلنسم اونینگ امکانیتلری و صلاحیتینی شونچه چقورراق انگلهی باشلهدیم. بو تکنالوژی استه-سیکین مینینگ کوندهلیک حیاتیم و اورگهنیش یولیمنینگ اجرهلمس، دایمی واسطهلردن بیریگه ایلندی.
بوگون مین اوچون صنعی هوشنینگ اینگ مهم قوللنیشلریدن بیری – اورگهنیش جریانیگه یاردم بیریش و تعلیمی کونیکمهلرنی مستحکملش دیر، اینیقسه تیل اورگهنیشده و درس موضوعلرینی چقورراق توشونیشده. قیین موضوعلر و مسئلهلر گه دوچ کیلگنیمده، صنعی هوش اولرنی ساده تیلده توشونیشیمگه سواللریمگه ایسه تیزراق و انیقراق جواب تاپیشیمگه یاردم بیرهدی. صنعی هوش حیاتیمده کیلتیریب چیقرگن اینگ مهم اوزگریشلردن بیری – وقتنی تیجش و ثمرهدارلیکنی آشیریش دیر.
آلدین، مرکب بیر سوال گه جواب تاپیش یا کی توشونیش قیین بولگن بیر موضوعنی انگلش اوچون ساعتلب ایزلنردیم. حاضر ایسه انیق و فایدهلی معلوماتلر گه تیز و آسان کیریش امکانیتی اورگهنیش جریانینی مینینگ اوچون انچه یینگیللشتیردی. صنعی هوش مینگه شونی تأمینلهیدی کی، معلوماتلر تولیغیده چلغیمسدن، بیواسطه توشونرلی و انیق جوابلر گه یونَله آلهمن.
آخر-عاقبت، مین صنعی هوشنی انساننینگ ایجادی تفکرینینگ اورنینی باسوچی واسطه صفتیده ایمس، بلکی کوچلی بیر واسطه صفتیده کورهمن؛ اونینگ قندهی ایشلهتیلیشی ایسه جوده مهم دیر. یاش اولاد و صنعی هوشدن ایندی فایدهلنیشنی باشلهگنلر اوچون مینینگ خبریم شو کی، اولر بو تکنالوژی گه آنگلی، مسئولیتلی و مقصدلی یاندهشسین. اگر صنعی هوش توغری و توغری یونهلیشده ایشلتیلسه، او اورگهنیش، شخصی رواجلنیش و یاشلرنینگ ترقیاتی اوچون کتته امکانیتلر یرهتیشی ممکن. کیلهجک تکنالوژیدن قورقمهی، اونی بیلیب، عقل بیلن فایدهلنگن آدملر نیکی دیر.
