قیش، یالغیز قار یاغیش و ساووق ییتیب کیلیش موسومی ایمس، بلکیم کمبغل عایلهلر اوچون آچلیک، ایشسیزلیک و قیینچیلیکلر کوپهیشی دیر. فاریاب ولایتی فردوس تومنینینگ «زرشوی» قیشلاغیده، ۲۷ یاشر بیر عیال هر کونی، قویاش چیقیشی بیلن عایله خرهجتلرینی تامینلش مقصد، چرچهمسدن سعیوحرکت قیلیشگه باشلهیدی.
اوچ باله آنهسی بولمیش ماماخال، بیش کیشیلیک عایلهسیگه بیر لقمه نان تاپیش مقصد قیش و یاز موسومیگه قرهمهی، اهالی اویلریده پاککارلیک و کییم یوویشدن باشلهب، قالین یوویش و نانپیشیریشگچه، هیچ بیر ایشدن واز کیچمهیدی.
اونینگ ایتیشیچه، بیر کونلیک درآمدی اینگ یخشی حالتده ۱۵۰ افغانی دیر؛ بو پول ایسه یالغیز بیر کونلیک قوروق ناننینگ پولینی تامین قیله آلهدی. «ایش تاپیلگنیده، کونیمیز اوتهدی، ایش تاپیلمهگنیده ایسه کیچهنی تشویش بیلن اوتکزهمن. قولگه کیلتیرهدیگنیم پول فقط اوشه کون اوچون ییترلی دیر. بیر کون ایشلمسم، بالهلریم آچ قالهدی.»
ماماخالگه کوره، ایشچیلیک قیلهدیگن تورموش اورتاغینینگ ایشی دوامدار بولمهی و حیاتنینگ دستلبکی خرهجتلرینی تامین قیلمهیدی. اونینگ کوپهیتیریشیچه، اقتصادی قیینچیلیکلر سبب بیش عایله بیلن بیرگه قوشمه شکلده، کرایی و ایسکیرگن بیر اویده حیات کیچیرهدیلر. «حیات کیچیرهدیگنیمیز اویده جودهیم ایسکیرگن دیر، بیراق مجبورمیز. شونینگدیک اوی کرایهسینی یکه اوزیمیز تامین قیله آلمسلیگیمیز اوچون نیچه عایله بیلن بیرگه حیات کیچیرهمیز.»
قیش، بو عایله اوچون یالغیز هوانینگ ساووقلیگی ایمس؛ تقدیرسیزلیک و قیینچیلیکلر آرهسیده ایشلش ساووقلیگی دیر. آغیر ایشلرنی قیلیش، ماماخال گه کوپینچه قیینچیلیک یرهتگن. یاشی اونچه بویوک بولمسهده، لیکن حاضر بیل آغریق، ایاغ آغریق و باشقه بیر قطار کسللیکلردن اذیت چیکماقده و شونینگدیک شفاکارلر، اونینگ نسایی-ولادی قیینچیلیکلرگه چلینگنینی ایتگنلر.
اونینگ کوپهیتیریشیچه، شفاکار آلتی آی دوالنیب و اوخلهشینی توصیه قیلگنی بیلن، قشاقلیک و کمبغللیک سبب بو توصیهلرنی عملگه آشیره آلمهیدی. «شفاکار دوالنیشیم و آغیر ایشلرنی قیلمسلیگیمنی ایستهدی، بیراق پولیم یوق. ایشلمهگنیمده، حیات خرهجتلرینی قندهی قیلهیلیک.»
ماماخال، ساغلیق وضعیتیدن کوپراق، ایشلش اوچون بالهلرینینگ اویگه یکّه قوییب کیتیشدن خواطرلنهدی. مذکور بالهلر، هوا ساووقلیگی، بعضا ایسه آچ و سووسیز کیچهگچه آنهلرینینگ اویگه قیتیشینی کوتیب تورهدی. «دایم بالهلریم اوچون تشویش قیلهمن؛ لیکن اویدن تشقریگه کیتیب و ایشلشگه مجبورمین.»
او، حاضرگچه اولر وضعیتیگه توجه قرهتیلمهگنی نی بیان قیلیب و حکومت همده مسئول نهادلردن، یاردم ترقهتیلیشیده اولرنینگ اونوتیلمسلیگینی ایستهگن. «حاضرگچه هیچ کیم بیزلرگه یاردم بیرمهگن و قیش موسومیده کمبغل عایلهلرنینگ اونوتیلمسلیگینی ایستهیمن.»
ماماخال برچه قیینچیلیکلر آرهسیده قالگنی بیلن ینه هم درس اوقیش بیلن بالهلرینینگ کیلهجگی توزهلیشی و بیر کونی حیات قیینچیلیکلرینینگ حل بولیشینی آرزو قیلهدی. «آرزو قیلهمن که بالهلریم درس اوقیب و کیلهجکلری یخشی بولسه و مینی کبی تقدیرسیز بولیب قالمسهلر.»
ماماخالنینگ حکایهسی، افغانستان ده کمبغللیک بیلن قرشی کورهشه یاتگن باشقه یوزلب عیالنینگ حکایهسی کبی دیر. اوشبو عیاللر جیم توریب حیاتنینگ آغیر یوکینی بویینلریده تاشیدیلر و قیشنینگ ساووق کونلریده، باشقه هر وقتگه قرهگنده کوپراق قوللب-قوتلنیشگه نیازلری بار.
