دهقانلر اقلیم اوزگریشلری طفیلی زراعتی حاصللر کمهیشیدن خواطر بیلدیرگنلری بیرحالده، بلخ ولایتیده عضوی و کیمیایی کود ایشلب چیقرووچی بیر فابریکه فعالیتی باشلنیشی ایکینچیلیک تولیدلرنی قوللب-قوتلش اوچون امیدوار قیلووچی بیر آدیم صفتیده بیان بولگن.
اوشبو فابریکه مسئوللرینینگ ایتیشلریچه، تولیدلری فنی ستندردلر اساسیده و ضرور تیکشیروولردن کیین بازار گه چیقریلهدی.
عضوی و کیمیایی کود ایشلب چیقرووچی بو فابریکه نمایندهسی محمدیاسین عزیزیگه کوره: «درخشان گروپ اسملی شرکتیمیزده خلقارا ستندردلر اساسیده ایکی تور کود ایشلب چیقرهمیز. بیری کیمیایی و بیری ایسه عضوی دیر. محصوللریمیز زمانهوی اوسکونهلر همده بیللی کودلر بیلن جهازلنگن بیر لابراتوارده تیکشیریلیب و اوندن کیین تولید بولهدی.»
شوندهی بیرحالده، بلخ دهگی دهقانلرنینگ ایتیشلریچه، اقلیم اوزگریشلری عاقبتلری یانیده بازارده صفتسیز کودلر بارلیگی، اولرنینگ ایکینچیلیک تولیدلری میزانیگه سلبی تاثیر قویگن. اولرنینگ کوپهیتیریشیچه، توپراقلر حاصل بیریشی کوچلنیشی همده صفتلی و ارزان کودلردن فایدهلنه آلیش، زراعت برقرارلیگی سقلهنیشی و حاصللر کوپهیشی اوچون ضرور دیر.
اوشبو دهقانلر، مسئوللردن بازارگه چیقریلگن کودلر صفتینینگ جدی شکلده نظارت بولینیشینی سورهگنلر.
بلخ ولایتیدهگی دهقانلردن بیری حبیبالله، کیمیایی کودلر نرخی یوقاریلیگیدن خواطر بیلدیریب و ایتیشیچه: «شهرده کودلر بار، لیکن هیچ صفتی یوق و اونگه قرهگنده بلخ ولایتی بالحصار تومنی توپراغی صفتلی دیر. ستندرد شکلده پاکتلنگن، بیراق صفتلی بولمهی و قیمتی هم یوقاری دیر. ۱۵۰۰ گه ارزیدیگن بیر بوجی وطنی کود قیمتی ۲۵۰۰ افغانی دیر.»
شونینگدیک بو ولایتدهگی دهقانلردن باشقه بیری میرویسگه کوره: «قیمتلر ارزان بولیشی اوچون ینه بیر ایکیته شرکت یا-ده فابریکه قوریلسین. حاضر کود قیمتی جوده یوقاری بولیب و ساتیب آلیشگه کوچیمیز ییتیشمهیدی.»
عین حالده، ایکینچیلیک ایش بیلرمانلرینینگ ایتیشلریچه، کودلردن درست بیر شکلده فایدهلنمسلیک اینیقسه ییرلرنینگ اقلیم اوزگریشلری باسیمی آستیگه قالگنی بیرحالده، طبیعی منبعلرگه کوپراق زیان ییتیشتیریشی ممکن.
ایکینچیلیک ایش بیلرمانلریدن سیفالله سعادتنینگ ایتیشیچه: «کیمیایی یا-ده عضوی کودلردن درست شکلده فایدهلنمهگنی صورتده، اوشبو کودلر نهفقط اوسیملر اوسیشیگه تاثیر قیلهدیم، بلکیم توپراق بوزیلیشی و اولرنینگ کمراق حاصل بیریشیگه هم سبب بولهدی. انه شوو سبب کیمیایی کودلردن درست شکلده فایدهلنیش اوچون توپراقنینگ تیکشیریلیشی، مناسب کود تورینی تنلش، نیاز بولگن مقدارنی تعیینلش و کودلردن فایدهلنیش بوییچه مناسب وقتنینگ بیلیشنی نظرگه آلیش کیرهک.»
بلخ ایکینچیلیک ریاستی مسئوللرینینگ ایتیشلریچه، اقلیم اوزگریشلری بیلن ماس و برقرار زراعت رواجلنیشی مقصد، دهقانلر گه آگاهیلیک بیریش همده تعلیمی دستورلرنینگ دوام بیرگنلر.
بو توغریده، اوشبو ریاست زراعتی ایشلرینی رواجلنتیریش مدیری حسین عظیمینینگ ایتیشیچه: «دهقانلرنینگ کودلر فایدهلیگینی بیلیشلری اوچون بلخ ایکینچیلیک ریاستی آرقهلی خصوصی همده کود تولید قیلووچی شرکتلر همکارلیگیده، هر کونی ولایت بویلب و بلخ تومنلریده کودلردن قندهی فایدهلنیش توغریسیده آگاهیلیک و تعلیمی دستورلرنینگ دوامی بار. سوو تنقیصلیگی بیلن روپهره بولگنیمیز بیر شرایطده، بو کودلر کیمیایی کودلرگه نسبت جوده فایدهلی دیر. اوشبو کودلر ییرلر نملیگینی سقلهب و توپراقنی بوزمهیدی.»
اقلیم اوزگریشلری، سوو منبعلری کمهیگنی، یاغینگرچیلیک مقداریدهگی اوزگریشلر و توپراقنینگ کمراق حاصل بیریشی، افغانستان ایکینچیلیک بولیمینینگ اینگ مهم قیینچیلیکلری حسابلنگنی بیرحالده، مذکور خواطرلر بیلن بولگن.
