ایچکی ایش‌لر وزیرلیگی مسووللری نینگ ایتیش‌لریچه، رمضان مبارک آیی باشلنگنیدن حاضرگه‌قدر مملکتده ۳۰۰ تینچ اهالی هلاک و باشقه ۵۰۰ تینچ اهالی یره‌لنگن.
ایچکی ایش‌لر وزیرلیگی سوزلاوچیسی طارق آرین نینگ سلام‌وطندارگه ایتیشیچه، رمضان آیی باشلنگنیدن حاضرگه‌قدر طالبان تامانیدن ۱۵۰ پارتلش، ۱۵ خودکش هجوم و ۵۰ هدف‌لی ترورلر اویوشتیریلگن.
اونینگ ایتیشیچه، مذکور هجوم‌لر نتیجه‌سیده عیال‌لر، باله‌لر و یاش‌لر شامل ۳۰۰ تینچ اهالی هلاک و باشقه ۵۰۰ کیشی یره‌لنگن.
جناب آرین، اوتگن بیر آی جریانیده طالبان تامانیدن اویوشتیریلگن هجوم‌لر نتیجه‌سیده امنیتی کوچلردن بیرقطاری هلاک ایتیلگنی‌نی بیلدیرگن، بیراق بیللی ارقام ارایه قیلمه‌گن.
ایچکی ایش‌لر وزیرلیگی سوزلاوچیسی نینگ ایتیشیچه، اوتگن بیر آیی‌ده امنیتی کوچلرگه قره‌گنده طالبان تلفاتی ایکی برابر بولگن.
عین‌حالده، انسان حقوقی ایرکین کمیسیونی نینگ رمضان آیی‌ده تینچ اهالی تلفاتی کوپه‌یگنیدن خواطر بیلدیریب ایتیشیچه، اوشبو آیی نینگ بیرینچی کونیدن ۲۵- تاریخی کونی‌گچه ۱۳۰ واقعه قید ایتیلگن.
انسان حقوقی ایرکین کمیسیونی نینگ معلومات بیریش بولیمی مسوولی رضا جعفری نینگ ایتیشیچه، مذکور واقعه‌لر نتیجه‌سیده ۹ عیال و ۲۶ باله شامل ۱۶۰ تینچ اهالی هلاک و ۱۳۰ باله، ۳۰ عیال شامل ۳۵۱ کیشی یره‌لنگن.
اوشبو نهاد دایمی آتیش‌کیسین‌نی تینچ اهالی تلفاتی‌گه توسیق بولیش اوچون اساسی یول عنوان قیلیب و اوروش تامان‌لریدن آتیش‌کیسین اعلان قیلیش‌لرینی سوره‌گن.