بچهدان سرطانی تامیرلرنینگ بند بولیشی و یورهک کسللیکلریدن کیین، دنیا بویلب اولیمنینگ ایکینچی اساسی سببی حسابلنهدی و شفاکارلردن قطارینینگ ایتیشلریچه، عیاللر آرهسیده بچهدان سرطانی کسللیگینینگ ایکی توری انیقلنیب و اولردن بیری اولیمگه سبب بولهدی.
لوگر ده عیاللردن قطارینینگ سلاموطندار گه ایتیشلریچه، اوتگن ییللرگه قرهگنده اوشبو ولایتدهگی عیاللر آرهسیده بچهدان سرطانیگه چلینیش موردلری کوپهیگن و عیاللردن قطاری بو کسللیک توغریسیده ییترلیچه آگاهیلیکلری بولمهی و مذکور خبرسیزلیک سبب حیاتلرینی قولدن بیرهدیلر. اوشبو عیاللر، ساغلیقنی سقلش وزیرلیگیدن مملکت بویلب بچهدان سرطانی کسللیگی حقیده عیاللرگه آگاهیلیک بیریلیشی و ولایتلردن برچهسیده عیاللر اوچون بچهدان سرطانینی تشخیص قیلیش مرکزلرینینگ آچیلیشینی ایستهگنلر.
بیزلرنینگ «ایکس» ترماغی ده هم تعقیب قیلینگ!
لوگر مرکزی پلعلم شهری یشاوچیسی بولمیش ۳۵ یاشر بیبیزهرانینگ ایتیشیچه، اوچ ییلدن بویان بچهدان کسللیگیگه چلینگن دیر. اونینگ کوپهیتیریشیچه، کوپینچه شفاکار گه مراجعت قیلگن؛ بیراق مذکور کسللیک طفیلی فرزند صاحبی بوله آلمهیدی. اونگه کوره، مملکت ایچیده کوپینچه مرته درمان قیلگنی بیلن نتیجه آلمهگن و اقتصادی وضعیتی یخشی بولمهگنی سبب مملکتدن تشقی گه باریش امکانیتیگه هم ایگه ایمس دیر.
بیبیزهرانینگ ایتیشیچه: «بچهدانمده اوچ ییلدن بیری بیر غده بار و مین فرزند گه ایگه بوله آلمهیمن. شفاکارلر حاملهدار بوله آلمهیسین دیهدیلر. کسللیگیمنینگ جدی بولگنینی بیلهمن و عایلهم هم بعضا مین گه هیچ نرسه دیمهی و کسللیگیم حقیده اوز آرهلریده گپلشهدیلر؛ لیکن مین بچهدان سرطانیگه چلینگنیمنی بیلهمن.»
باشقه بیر تاماندن، لوگر دهگی متخصص شفاکار احسانالله غفارینینگ ایتیشیچه، بچهدان سرطانی تورلیخیل دیر که اولردن بیرتهسی (سالم) و بیرتهسی (خبیث) دیر. اوشبو شفاکارنینگ کوپهیتیریشیچه، سالم تورلی سرطاننینگ دوالنیشی ممکن؛ بیراق خبیث تورینینگ مملکت ایچیده دوالنیشی ممکن ایمس و کسللردن قطاری حیاتلرینی قولدن بیرهدیلر.
غفارینینگ اورغولشیچه: «خبیث بولگن بچهدان سرطانینینگ دوالنیش یوللری، شیمیدرمانی کارسینوماییدن عبارت دیر؛ لیکن سالم سرطانلرنینگ شیمیدرمانیگه نیازی یوق و یالغیز زیان کورگن بولیملرنی آلیش اوچون جراحی عملیاتی ییترلی دیر. حاضر بو کسللیک جدی شکلده کوپهیگن و هر ۱۰۰ عیالدن ۵دن ۱۰ تهسی بچهدان سرطانیگه چلینگن دیر.»
لوگر ساغلیقنی سقلش ریاستی مطلوعات مسئولی فهیمالله لودیننینگ سلاموطندار گه ایتیشیچه، مذکور ولایتده بچهدان سرطانی کسللیگینینگ مکمل شکلده انیقلش امکانسیز دیر. اونینگ کوپهیتیریشیچه، بو کبی کسللر مراجعت قیلگنی پیتده، معاینه بولهدیلر و کیین کابل ابن سینا کسلخانهسیگه یوباریلهدیلر.
بیزلرنینگ فیسبوک صحیفهمیزگه باش اورینگ!
فهیمالله لودیننینگ اورغولشیچه، جاری ییلده بچهدان کسللیگیگه چلینگن اوچ عیال نائب امینالله خان ولایتی کسلخانهسیگه مراجعت قیلگن که اولردن بیرتهسی بو کسللیک طفیلی حیاتینی قولدن بیرگن. «بچهدان کسللیگی تخصصی بیر کسللیک بولیب و لوگر ده اونینگ تشخیص و دوالنیشی امکانسیز دیر. کسللر کابل ابن سینا کسلخانهسی گه یوباریلهدی و او ییرده تشخیص بولیب و درمان آستیده قرار تاپهدی. شونینگدیک اوشبو اوچ ییلده بچهدان کسللیگیگه چلینگن اوچ عیال ثبت بولگن که اولردن بیرتهسی حیاتینی قولدن بیرگن.»
افغانستان ساغلیقنی سقلش وزیرلیگینینگ معلوماتی اساسیده، مملکتده هر ییلی قریب ۴۰ مینگ کیشی تورلیخیل سرطان کسللیگیگه چلینیب و اولردن ۱۶-دن ۲۰مینگ تهسی بو کسللیک سبب حیاتینی قولدن بیرهدی.
