افغانستان مرکزی بانکی مسئوللری، اوشبو قویاش ییل باشیدن حاضرگچه، تورلی لایتلردن قریب ۳ میلیارد افغانی اېسکیرگن پولنی ییغیب و آلاو بیرگنلرینی معلوم قیلهدیلر.
اولر گه کوره، بازار احتیاجلرینی نظر گه آلیش و پولی سیاستلرنی رعایت قیلیش بیلن، آلاو بیریلگن پوللر عوضیگه، اوشبو مقدارده ینگی پولنی بازار گه ترقهتگنلر.
افغانستان مرکزی بانکی سۉزلاوچیسی حسیبالله نوری سلاموطندار بیلن صحبتده شوندهی دیېدی: «افغانستان بانکی قویاش ۱۴۰۴-ییل باشلنگنیدن حاضرگچه قریب ۳ میلیارد اېسکیرگن بانکنوتنی برچهسی افغانی دیر آلاو بیرگن. بو پوللر انیق ریجه اساسیده ییغیلیب آلاو بیریلگن. افغانستان بانکی آلاو بیریلگن پوللر عوضیگه اوشبو مقدار ده ینگی پول بازار گه ترقهتگن.»
نورینینگ فکریگه کوره، یشاوچیلر اېسکیرگن پوللرینی افغانستان مرکزی بانکی یا کی سوداگرلیک بانکلرنینگ نمایندهلیکلریگه مراجعت قیلیب، ینگی پول بیلن المشتیریشلری ممکن.
شو بیلن بیرگه، اقتصاد شناسلردن بعضیلری، بازاردن اېسکیرگن پوللر ییغیلیشینی مهم و ضرور دیب بیلهدیلر.
اقتصاد شناس قیس محمدی بوتوغریده شوندهی دیېدی: «مرکزی بانک تامانیدن پول عوضی گه ینگی پول ترقهتیشی و اېسکیرگن پولنی ییغیشی کېرهک، بو ایش ریجه و کیتمه-کیت اساسیده عملگه آشیریلیشی درکار.»
شو بیلن بیرگه، کابل شهریده یشاوچیلردن بیرقطاری، بازاردهگی اکثریت پوللر حددن تشقری اېسکیرگنی اوچون، آلیش-بیریشده اولرنی تورلی قیینچیلیک بیلن روپهره قیلهیاتگنینی ایتهدیلر.
افغانستان مرکزی بانکی سۉزلاوچیسینینگ ایتیشیچه، افغانستان مقیاسیده اېسکیرگن پوللرنی ییغیب آلاو بیریش و بازار گه ینگی پول ترقهتیش جریانی دوام ایتماقده.
او یشاوچیلردن، ینگی پوللر وقتدن آلدین اېسکیرمسلیگی اوچون یاغلی، هول و افلاس قوللر بیلن پول ایشلتمسلیکنی سورهیدی.
