دوحه بیتیمی ایکی ییل لیگیگه بیر کون قالگن؛ اوشبو بیتیم ۲۰۲۰-ییل ۹ فبروریده قطرده اسلامی امارت نینگ اوشه زمان سیاسی دفتری نینگ اورین باسری ملا عبدالغنی برادر و آمریکا قوشمه ایالتلری نینگ افغانستان صلحی اوچون سابق مخصوص نمایندهسی زلمی خلیلزاد آرهسیده امضالندی.
بیرلشگن ملتلر تشکیلاتی نینگ امنیتی کینگشی، بوگون روسیه نینگ اوکراین گه قیلگن هجومی حقیده مذکور تشکیلات نینگ عمومی مجمع اضطراری ییغینی نی یولگه قویشی گه قرار آلگن.
اروپا اتفاقی نینگ افغانستان اوچون ایلچیسی وان برانت، اسلامی امارت کوچلری تامانیدن اویمه-اوی تیکشیریلیش عملیاتی گه واکنش کورسهتیب، اوشبو جریان تیزلیک بیلن توختهتیلیشینی سورهگن.
خلقارا مناسبتلر ایشلری بوییچه ایش بیلرمانلردن قطاری نینگ ایشانچی گه کوره، اوکراینده اوروش باشلهنیشی بیلن اوکراینلیک لر نینگ باشقه مملکتلر گه مهاجرتی باشلنگن. خلقارا مناسبتلر ایشلری بوییچه ایش بیلرمان طارق فرهادی نینگ سلام وطندار گه ایتیشیچه، کیلهسی ۳ ییلده قریب ۵ میلیون اوکراینلیک باشقه مملکتلر گه آواره بولیشلری کوتیلهدی.
مملکت نینگ ساووق حدودلریده دولت بیلیم یورتلری نینگ درسلری باشلهنیشیدن بیر کوندن کیین، قطار طلبهلر اوشبو بیلیم یورتلرده مسلکی استادلر آزلیگیدن خواطر بیلدیریب ایتیشلریچه، بیرقطار اوقیتووچی علمی کدرلر جاینی تولدیریش مقصدیده قراردادی شکلده عالی تحصیلاتده استخدام بولگنلر. اولر گه کوره، ینگی استادلر سابق استادلر گه نسبتن، کمراق تجربه و معلومات گه ایگه دیر.
افغانستان اسلامی امارت سوزلاوچیسی و معلومات و مدنیت وزیرلیگی نینگ نشرات ایشلری بوییچه معینی ذبیحالله مجاهد اوتگن کون (یکشنبه، ۸_حوت) کابلده خبری بیر ییغینده ایتیشیچه، اسلامی امارت کوچلری ایکی کون آلدین کابلده شبههلی اویلر نی تیکشیریش و تازهلش عملیات جریانیده، اسلامی دولت گروهی یا_ده داعش گه تیگیشلی ۶ کیشی، ۹ آدم اوغیرلاوچی و ۵۳ مسلکی اوغرینی قولگه آلگنلر و شونینگدیک بیر مقدار قورال هم قولگه کیلگن.
اسلامی امارت ایچکی ایشلر وزیرلیگی، بوگون بیر اطلاعیه ترقهتیب بویروغ بیریشیچه، هیچ بیر خصوصی شرکت یا_ده ورکشاپ مخابروی وسیلهلر نینگ توزهتیش و پروگرام قیلیش اوچون حقی یوق.
هرات محلی مسئوللری نینگ ایتیشلریچه، هرات-تورغندی قتناو یولیده یوزبیرگن ترافیکی حادثه نتیجهسیده، بیر عیال شامل ۶ کیشی جان بیرگن.
پاکستان میدیالری نینگ گزارشی اساسیده، افغانستان و پاکستان آرهسیده تجارت سودا-ساتیغی ۱ میلیارد دالر گه کمهیگن. پاکستان چاپی اکسپرس تریبون کوندهلیگی، بوگون پاکستان و افغانستان سوداگرلیک و صناعت قوشمه اتاقی (PAJCCI) دن نقل قیلیب یازیشیچه، ایکی مملکت آرهسیده تجارت حجمی ۲.۵ میلیارد دالردن ۱ میلیارد دالر گه کمهیگن.
قندهار محلی مسئوللری نینگ ایتیشلریچه، چمن-سپینبولدک قتناو یولی اوچ کوندن کیین قیته اوتیب-قیتیش یوزیگه آچیلگن. مذکور قتناو یول اوچ کون آلدین، اسلامی امارت کوچلری و پاکستانی چیگره کوچلری آرهسیده یوزبیرگن آتیشمهدن کیین، باغلنگن ایدی.
آمریکا بیرشمه ایالتی نینگ سابق جمهوررئیسی دونالد ترامپ، روسیه و اوکراین آرهسیدهگی آتیشمه نینگ دوامیدن هشدار بیریب و ایتیشیچه، اوکراین گه روسیه نینگ نیچه تامانلیک هجومی، دنیا اوروشی گه سبب بولیشی ممکن.
بادغیس یشاوچیلریدن قطاری، اوشبو ولایت حسابات و معلومات ریاستی تامانیدن کیملیکلرنی تصدیقلش برابریده پول آلینیشیدن شکایت قیلیب سلام وطندار گه ایتیشلریچه، بادغیس حسابات و معلومات ریاستی مسئوللری، کیملیک لرنی تصدیقلش اوچون اولردن پول آلهدی.
اوتگن کون ایرتن چاغیدن مملکت پایتختی کابل شهری نینگ بولیملریده اسلامی امارت کوچلری تامانیدن اویمه اوی تیکشیریشلر باشلنگن. شوندهی بیرحالده، پایتخت یشاوچیلریدن قطاری اسلامی امارت کوچلری نینگ اویمه اوی تیکشیریشلریدن شکایت قیلگنلر، اولرنینگ خواطر بیلدیریب ایتیشلریچه، اویمه اوی تیکشیریشلر اهالی، عایلهلر اینیقسه بالهلر و عیاللر آرهسیده قورقیش و خواطرلر نی ایجاد قیلگن.
بیرلشگن ملتلر تشکیلاتی نینگ یاردم بیرووچی نهادلر و نا دولتی تشکیلاتلر نمایندهلریدن تشکیل تاپگن بیر هیأت، ۵ کونلیک بیر مأموریتده افغانستان نینگ بشری وضعیتینی تیکشیرگن. مذکور هیأت نینگ اعلام قیلیشیچه افغانستان بویلب انسان پرورلیک یاردملرگه نیازمندلر سانی مثل سیز دیر.
آمریکا قوشمه ایالتلری نینگ مالیه وزیرلیگی اوتگن کون (جمعه، ۶- حوت) افغانستانده مالیهوی و سوداگرلیک معاملهلر نینگ آسانلشتیریش و کینگهیشی اوچون ینگی رخصتنامه صادر قیلگن.
شمالی اتلانتیک تشکیلاتی یا ناتو گه اعضا دولتلر لیدرلری، بیر بیانه آرقهلی روسیه نینگ اوکراین گه هجومینی قارهله گنلر. اولر روسیهدن اوکراین گه حربی یوریشینی توختهتیب و برچه کوچلرینی اوشبو مملکتدن چیقریشینی طلب قیلگنلر.
