بدخشان ده کیچیک بیر قالین توقیش ایشخانهسیده، عیاللر و قیزلردن هر بیری المک اوریش آرقهلی اوشبو صناعتی مسلکنی کیینگی نسل گه اوتکزیش توغریسیده سعیوحرکت قیلماقده.
طبیعی رنگلردن فایدهلنیش و قالین یوزیگه محلی نقشلرنی یرهتیش صناعتی، آنهلردن قیزلرگه اوتیب و بو مسلک بدخشان ده عصرلر دوامیده سقلهنیب قالگن. بدخشان ده عیاللر و قیزلر، بوش وقتلرینی قالین توقیش بیلن اوتکزیشلری یانیده، بو یول آرقهلی اوزلریگه درآمد منبعسینی هم یرهته آلگنلر.
بیزلرنینگ «ایکس» ترماغی ده هم تعقیب قیلینگ!
بالهلیک چاغیدن قالین توقیشگه شغللنگن بدخشانلیک مسعودهنینگ ایتیشیچه، بو مسلکنی بوویسیدن ارثگه آلگن. اونینگ سلاموطندار گه ایتیشیچه، قالین توقیش او و عایلهسینینگ حیاتینی دوام ایتیره آلگن یگانه یول بولگن. مسعوده کونده وقتیدن قریب ۱۰ ساعتنی قالین توقیش بیلن اوتکزهدی. «حاضرگی شرایطده ایرککلردن کوپ قطاری ایشسیز دیر. ایشلری یوق و مصروفیتلری یوق. انه شوو سبب بیزلر هم قالین توقیب، توقیگنیمیز قالیننی بازار گه آلیب باریب و ساته آلهمیز. شونینگدیک بو یول آرقهلی عایله نیازلرینی تامین قیله آلهمیز.»
قالین توقیش، بدخشان اهالیسی مدنیتینینگ اجرهلمس قسمی بولیب، قدیمی صناعتلردن حسابلنهدی و حاضرگی کونده هم، بو ولایتنینگ تورلی تومنلریده عایلهلردن کوپینچهسی اوییده هیچ بولمهگنیده، بیرته قالین توقیش دستگاهسیگه ایگه دیر.
کونینینگ بیر قسمینی قالین توقیش بیلن اوتکزهدیگن بدخشانلیک آسیهنینگ ایتیشیچه، قالین توقیش قدیمدن عایلهلر آرهسیده کینگ شکلده ترقهلیب و دایم محلی کیملیک و مدنیتنینگ بیر قسمی صفتیده اسرهلیب کیلماقده. اونینگ کوپهیتیریشیچه، حاضرگی کونلرده قالینلر یوزیگه توکیلهدیگن رنگبه-رنگ نقشلر، اجدادلریدن ارث گه آلگنلری قدیمی طرحلر دیر. «قیینچیلیکلرنینگ کوپ بولگنی بیلن، ینه هم عیاللر بو صناعتنی اسرهب قالگنلر و یرهلنگن پرماقلری بیلن کیچه و کوندوز ایشلهیدیلر. بو صناعت نه فقط درآمد بلکیم، قدیمی فرهنگنینگ سقلنیشی مقصد، دوام قیلماقده. بو صناعتدن حمایت بولگنیده، قیته رواجلنیب، بدخشان همده افغانستان ده فخر گه سبب بولهدی.»
ییللردن بیری قالین توقیش آرقهلی حیاتینی اوتکزهدیگن عیاللردن ثلوا ثاقبنینگ ایتیشیچه، اوتگن بیر ییلده قالین ساتیلیشی کمهیب و بو صناعت آرقهلی قولگه کیلتیرهدیگن درآمد بیلن یالغیز دستلبکی مصرفلرینی تامین قیله آلهدی، بیراق ینه هم بو ایشگه دوام بیریب و کوپینچه حمایت بولگنی صورتده بو صناعتنینگ قیته رواجلنیشیگه امیدوار دیر.
بیزلرنینگ فیسبوک صحیفهمیزگه باش اورینگ!
بانو ثاقبنینگ ایشانچیگه کوره، قالین توقیش صناعتینینگ کوپراق توجه قرهتیلیب و ییترلی شکلده قوللب-قوتلنگنیده، نه فقط عایلهلر اقتصادی وضعیتی یخشیلنیشیگه یاردم بیرهدی، بلکیم افغانستاننینگ اونملی قول صناعتلریدن بیرینینگ سقلنیشیگه سبب بولیشی ممکن. «منطقهمیزده قالین توقیش فرهنگی تاریخی اوتمیشگه ایگه دیر. بدخشان ده عیاللر طبیعی یونگ و طبیعی رنگلردن فایدهلنیب قالین و گیلم توقهدیلر. بدخشاننینگ جغرافیایی موقعیتی گه توجه قیلیش بیلن، قالین توقیش صناعتی فرهنگی المشتیریلیشیده رولی بار و قالین توقیش فرهنگینینگ سقله آلیش اوچون سعیوحرکت قیلهمیز.»
قالین توقیش، بدخشان ده قدیمی قول صناعتلریدن بیری بولیب، کوپراق عیاللر آرقهلی اویلر و مخصوص ایشخانهلرده دوام ایتماقده.
