«روماتیزم» کسللیگی گه چلینگن عیاللردن قطاری، ساغلیق مرکزلر اینیقسه دولتی کسل‌خانه‌لرده دوالنیش امکانیتلریگه قول تاپه آلمسلیک‌دن شکایت قیلیب و ایتیشلریچه، مذکور کسل‌خانه‌لرده امکانیت یوقلیگی و قشاق‌لیک سبب، بو کسل‌لیک‌نی دوالش‌گه قادر بولمه‌گنلر.
تورلی یاش آره‌سیده بولگن مذکور کسل‌لر، کسل‌لیکلری سببی نی سووگه حددن تشقری قول اوریش بیلن وراثت دیب و کوپه‌یتیریشلریچه، عضله‌لر، ایاقلر و قوللر نینگ جدی شکلده آغریشی، بو کسل‌لیک نینگ اساسی نشانه‌لریدن دیر.
کابل یشاوچیسی و ۱۰ ییل‌دن بویان روماتیزم گه چلینگن شبنم نینگ ایتیشیچه، ایاقلر نینگ جدی شکلده آغریشی، قوللر نینگ جدی شکلده آغریشی و عضله‌لر نینگ حرکت قیلمسلیگی، اونینگ تنی‌ده بولگن اساسی نشانه‌لردن دیر. اونینگ کوپه‌یتیریشیچه، دولتی کسل‌خانه‌لرده بو کسل‌لیک دوالنیشی اوچون زمینه یوقلیگی و اونینگ یانیده اقتصادی قیین‌چیلیکلر سبب، حاضرگچه کسللیگی نی درمان قیلیش گه قادر بولمه‌گن.
شبنم نینگ اورغولشیچه: «دولتی کسل‌خانه‌لرده امکانیت یوق و کاشکی دولتی کسل‌خانه‌لر بیر بولیم نی روماتیزم گه اختصاص بیرسه‌لر که حد اقل معاینه‌لر تیکین روش‌ده بولسه؛ بیراق شخصی کسل‌خانه‌لر گه باریش گه مجبور‌میز. امکانیتیمیز بولگنی‌ده یخشی‌راق کسل‌خانه گه کوپ پول بیلن مراجعه قیلیب، یخشی‌راق امکانیت نی تجربه و صفت‌لی دارولرنی ساتیب آلاله‌میز. پولیمیز بولمه‌گنی‌ده ایسه آزراق دارو آلیب و عادی کسل‌خانه گه باریش یا-ده اصلا دوالنمسلیککه مجبور‌میز.»
بیزلرنینگ «ایکس» ترماغی ده هم تعقیب قیلینگ!
شونینگدیک کابل یشاوچیلریدن باشقه بیری و ایکی ییل‌دن بیری روماتیزم گه چلینگن سیلی، مملکت کسل‌خانه‌لریده کسللیگی تشخیص بولمه‌گنی و درمانی امکانیت یوقلیگی حقیده ایتیشیچه: «روماتیزمیم بار؛ دولتی کسل‌خانه گه بارگنیم‌ده، شفاکار درست تشخیص قیله آلمه‌دی. بیرینچی‌ده شفاکارلر کسل‌لر گه هیچ توجه قیلمه‌یدی و شو رقم، درست شکلده تشخیص قیله آلمه‌یدیلر و امکانیت هم یوق. بیرگنلری دارولر هم کوپ قیمت یا-ده هیچ تاثیری بولمه‌گن دارولر دیر. دولتی کسل‌خانه‌لرده هم امکانیت کوپ آز دیر.»
مذکور گزارش‌ده صحبت اوتکزگن روماتیزم گه چلینگن عیاللر، حددن تشقری سوو گه قول اوریش و وراثت نی، بو کسل‌لیک نینگ اساسی عامللریدن بیله‌دیلر.
حددن تشقری سوو گه قول اوریش نی روماتیزم گه چلینگنی سببی دیگن فوزیه نینگ ایتیشیچه: «کوپینچه معاینه‌لر قیلدیردیم؛ قولیم نینگ بند‌لری آغریدی، سوو گه قول اورگنیم‌ده، قوللریم شیشیدی، خارش قیلیدی و آغریدی. شفاکار گه باردیم، داروسی فایده قیلمه‌دی، کیین ایسه معاینه‌لریم نی یونانی بیر شفاکار گه آلیب باردیم. یونانی شفاکار، روماتیزمیم بارلیگی نی ایتیب یونانی دارو بیردی و بو دارو بیلن قوللریم بندی و ایاقلریم نینگ آغریغی یخشی‌لنگن؛ ایاقلریم و قوللریم نینگ شیشی یخشی بولدی.»
شونینگدیک کسللیگی سببی نی وراثت دیگن زیبا نینگ ایتیشیچه: «بی‌بیم هم ۲۰ ییل بوله‌دی که روماتیزم کسللیگی گه چلینگن. مین هم ۲ ییل بوله‌دی که روماتیزم کسللیگی گه چلینگن‌مین. عایله‌میزده باشقه هیچ کیم نینگ روماتیزم کسللیگی یوق.»
شونده‌ی بیرحالده، شفاکارلر نینگ ایتیشلریچه، روماتیزم، هورمونی تغییرلر، ژنتیکی و محیطی عامللر سبب کوپراق عیاللرده کوریله‌دی که بو کسل‌لیک تشخیص‌لنیشی نینگ قیین بولگنی و کوپینچه تورلری بولگنی سبب، شفاکارلر بو کسل‌لیک تشخیص‌لنیشی‌ده قیین‌چیلیک بیلن روپه‌ره بوله‌دی.
عمومی داخله شفاکاری ثناءالله قریشی نینگ ایتیشیچه: «روماتیزم نینگ کوپینچه تورلری بار. شونینگدیک اونینگ تشخیص‌لنیشی‌ده شفاکارلردن قطاری نینگ اشتباه قیلیشی سببی بو دیر که، نیچه کسل‌لیک بیر جای بوله‌دی و باشقه کسل‌لیک‌لر کبی نشانه‌لری بار.»
بیزلرنینگ فیسبوک صحیفه‌میزگه باش اورینگ!
شونینگدیک اندراگاندی کسل‌خانه‌سیده‌گی باله‌لر نینگ داخله بولیمی متخصصی عدیل آرین گه کوره: «روماتیزم کوپراق عیاللرده بار و عیاللر نینگ بو کسل‌لیککه کوپراق چیلینیشی سببی، استروژن هورمونی کمه‌یشی دیر که یاش نینگ یوقاری کیتیشی بیلن بو هورمون کمه‌یه‌دی و بو هورمون آرقه‌لی اورته گه کیله‌دیگن دفاعی میکانیزم، اورته‌دن کیته‌دی.»
بولر گه علاوه، سرپرست حکومت ساغلیق‌نی سقلش وزیرلیگی سوزلاوچیسی شرافت زمان امرخیل نینگ سلام‌وطندار گه ایتیشیچه، روماتیزم نینگ دوالنیشی اوچون کابل و ولایت‌لرده‌گی دولتی کسل‌خانه‌لرده ییترلیچه امکانیت یوق.
اونینگ کوپه‌یتیریشیچه: «ارتوپدی گه تیگیشلی کسل‌لر گه، ولایت‌لرده مخصوص جایلریمیز بار. شونینگدیک کابل ده ارتوپدی کسل‌لر گه وزیر اکبر‌خان کسل‌خانه‌سی اختصاص بیریلگن. او ییرده الحمد‌الله ارتوپدی کسل‌لر گه فعال و مسلکی کدرلریمیز بار که خذمتلر نی ارائه قیله‌دیلر. ولایت‌لرده هم داخله و ارتوپدی بولیم‌لری گه مراجعه قیله‌دیلر و ولایت‌لرده هم خذمتلر نینگ دوامی بار.»
افغانستان ده عیاللر اوی ایشلری گه ایرککلر گه قره‌گنده کوپراق مسئول بولیب و شونینگدیک مملکت نینگ قطار منطقه‌لریده دوالنیش خذمتلردن عیاللر نینگ آزراق فایده‌لنیشی بیرحالده، روماتیزم گه چلینگن عیاللر کسل‌لیکلری سببی نی حددن تشقری سوو گه قول اوریش و وراثت عنوان قیلگنلر.
