اوتگن بیر ییل‌ده کوکنار ایکمه‌گن دهقانلردن قطاری، بدیل ایکین‌گه قول تاپه آلمسلیکلریدن شکایت قیلگنلر.
بدخشان ولایتی ارگو تومنی‌ده‌‌گی دهقانلردن عیان‌الدین نینگ ایتیشیچه، سرپرست حکومت تامانیدن بنگی‌وار ماده‌لر اورنیده بدیل ایکین ترقه‌تیلمه‌گنی، اونینگ اقتصادی قیین‌چیلیکلر بیلن روپه‌ره قیلگن.
اونینگ کوپه‌یتیریشیچه: «حقیقتا کوپینچه اقتصادی قیین‌چیلیکلر بیلن روپه‌ره بولگن‌میز. اسلام امیرلیگی بدیل ایکین ترقه‌تگنی صورتده، بیزلر باشقه کوکنار ایکمه‌یمیز که هم حکومت و هم بیزلر زحمت گه قالمه‌یمیز، بیراق بدیل ایکین بیزلر گه ترقه‌تیلمه‌گنی صورتده اقتصادی قیین‌چیلیگی‌میز نینگ حل بولیشی اوچون قیته کوکنار ایکیش گه یوز کیلتیریشیمیز ممکن.»
بیزلرنینگ فیسبوک صحیفه‌میزگه باش اورینگ!
شونینگدیک زابل ده‌گی دهقانلردن زیارمل، سرپرست حکومت‌دن دهقانلر گه بدیل ایکین صفتیده اصلاح بولگن اوروغلر ترقه‌تیلیشینی ایسته‌گن. «حیاتی‌میز نینگ اوزگریشی اوچون حکومت بیزلر گه یاردم بیریشی و اصلاح بولگن اوروغلر نینگ ترقه‌تیشی کیره‌ک.»
شونده‌ی بیرحالده، ایکینچیلیک، سووغاریش و چاروه‌چیلیک وزیرلیگی مسئوللری نینگ ایتیشلریچه، حاضرگچه تورلی ولایت‌لرده ۱۰۰ مینگ‌دن آرتیق دهقان گه بدیل ایکین ترقه‌تیلگن.
ایکینچیلیک وزیرلیگی سوزلاوچیسی مصباح‌الدین مستعین نینگ ایتیشیچه، اوشبو وزیرلیک دهقانلر گه بدیل ایکین اوچون بیش ییل‌لیک بیر ریجه نی تیارله‌گن.
جناب مستعین نینگ کوپه‌یتیریشیچه: «دهقانلر گه بدیل ایکین، کیمیاوی کودلر و دارولر ترقه‌تیلیشی و اوزوم باغ‌لری اوچون سیستم قوریلیش، حاضرگچه صورت تاپگن ایشلردن بولیب و شونینگدیک یوزمینگ‌لرچه دهقان بدیل ایکین برنامه‌لریدن فایده‌لنگن. مذکور وزیرلیک کوکنار ایکیش‌دن قول تارتگن دهقانلر اوچون بیللی برنامه‌لری بار و بدیل ایکین نی تانیشتیریش بیلن فایده‌لی حصه قوشیش خصوصیده سعی‌وحرکت قیلماقده.»
اسلام امیرلیگی قدرت گه ایریشگنی‌دن کیین، افغانستان ده بنگی‌وار ماده‌لر نینگ ایکیلیشی و ایشلب چیقریلیشی نی تقیق‌له‌گن و حاضرگچه بنگی‌وار ماده‌لر ایکیلگن مینگ‌لرچه هکتار ییر نینگ تازه‌لنگنی‌دن خبر بیرگن.
بیزلرنینگ «ایکس» ترماغی ده هم تعقیب قیلینگ!
ایچکی ایشلر وزیرلیگی مسئوللری نینگ ایتیشلریچه، اوشبو وزیرلیک افغانستان ده کوکنار ایکیلیشی کمه‌یشی اوچون اونلب آگاهی‌لیک بیریش کمپاینی نی یولگه قوییگن.
ایچکی ایشلر وزیرلیگی سوزلاوچیسی اورین‌باسری بسم‌الله حبیب نینگ ایتیشیچه: «ایچکی ایشلر وزیرلیگی نینگ بنگی‌وار ماده‌لر گه قرشی کوره‌ش پولیسی جاری ییل نینگ باشلنگنی‌دن بویان کوکنار ایکیلگن مینگ‌لرچه هکتار ییر نی تازه‌له‌گن و بنگی‌وار ماده‌لر ایکیلیشی آلدی آلینیشی اوچون بیر قطار آگاهی‌لیک بیریش کمپاین‌لرینی یولگه قوییگن.»
ایتیش کیره‌ک که، بوندن آلدین خلق‌ارا بحران گروه‌لری اسلام امیرلیگی تامانیدن کوکنار ایکیلیشی تقیق‌لنگنی نی، کمبغل ایکینچیلر بیلن ایکینچیلیککه تیگیشلی بولگن قیشلاقده‌گی عیاللر حیاتی خصوصیده نامتناسب شکلده سلبی اثر قویگنی نی ایتگن ایدی.
