بلخ قاچقینلر ریاستی مسئوللری نینگ ایتیشلریچه، ایران و پاکستان دن قیتگن قاچقینلر گه ۱۲۵ یشش اوی نینگ قوریلیش ایشی باشلنگن.
بلخ قاچقینلر ایشلری بوییچه باشلیغی اسد‌الله وفا نینگ ایتیشیچه، اوشبو یشش اویلر مذکور ولایت زارع، کلدار، چهاربولک و نهرشاهی تومن‌لریده قوریله‌دی. اونینگ کوپه‌یتیریشیچه: «هر بیر یشش اوی نینگ قوریلیش خره‌جتی تورت مینگ دالر دیر؛ بو قطار یشش اوی نینگ قوریلیشی تورت آی‌ده یکون‌لنه‌دی؛ بو یشش اویلر ایران و پاکستان دن جبری شکلده چیقریلگن عایله‌لر اوچون قوریله‌دی.»
بیزلرنینگ فیسبوک صحیفه‌میزگه باش اورینگ!
بلخ ده قاچقینلر ایشلری بوییچه باشلیغی نینگ کوپه‌یتیریشیچه، مذکور یشش اویلر نینگ قوریلیشی ۴۴ میلیون افغانی خره‌جت کوتاریب و بیرلشگن ملت‌لر تشکیلاتی نینگ قاچقینلر ایشلری بوییچه عالی کمیساری یا-ده (UNHCR)، آرقه‌لی توللنه‌دی.
باشقه بیر تاماندن، ایران و پاکستان دن قیتگنلردن قطاری یشش اویلر نینگ قوریلیش ایشی باشلنگنی‌دن خورسند‌لیک قیلیب و ایتیشلریچه، اوشبو اویلر نینگ قوریلیشی بیلن باش‌پنه بولیمی‌ده‌گی قیین‌چیلیکلری نینگ حل بولیشی ممکن.
بلخ یشاوچیسی اسماعیل نینگ ایتیشیچه: «باش‌پنه‌سی بولمه‌گن باشقه نیچه عایله گه هم اوی قوریلیشی نی ایسته‌یمیز که بو رقم اهالی قیین‌چیلیگی حل بولسین. اوی‌سیزلیک کوپ قیین دیر.»
شونینگدیک بلخ یشاوچیلریدن باشقه بیری ظریف، سرپرست حکومت و یاردم بیرووچی نهادلردن قاچقینلر نینگ باشقه قیین‌چیلیکلری حل بولینیشی اوچون سعی‌وحرکت قیلیشلرینی ایسته‌گن. «اوی‌سیز ایدیک و قیش موسومی کیلیشی بیلن کوپ خواطرلنگن ایدیک که کیچه قیرگه اوخله‌یدیک دیب؛ باله‌لریمیز نی قیرگه آلیب باره‌‌یلیک. حاضر کوپ خوش‌میز که باش‌پنه قوریله‌دی.»
بیزلرنینگ «ایکس» ترماغی ده هم تعقیب قیلینگ!
شونده‌ی بیرحالده، بلخ حاکمی اورین‌باسری نورالهادی ابوادریس، یاردم بیرووچی نهادلردن مملکت گه قیتگن کیشیلر گه باشقه آسایشته‌لیکلر یره‌تیلیشی اوچون همکارلیک قیلیشلرینی ایسته‌گن. «تشکیلاتلردن یاردم‌لری نینگ کوپه‌یتیریشلرینی ایسته‌یمیز؛ چونکه مملکت گه قیتگنلر نیازمند و آز امکانیت گه ایگه‌لر.»
بوندن آلدین ایران و پاکستان دن بلخ گه قیتگنلردن قطاری باش‌پنه‌سیزلیک شکایت قیلگنلر. اوشبو ولایت قاچقینلر ریاستی آرقه‌لی ارائه بولگن معلومات اساسیده، جاری قویاش ییل نینگ باشلنگنی‌دن حاضرگچه ایکی مینگ عایله ایران و پاکستان دن بلخ گه قیتگن دیر.
