اسلام امیرلیگی طبیعی آفتلر گه قرشی کورهش ملی اداره مسئوللری، ۶ حمل کونیدن حاضرگه قدر سوو تاشقینلری و باشقه طبیعی آفتلر نتیجهسیده، ۷۷ کیشی اولیب و ۱۳۷ کیشی یرهلنگنینی معلوم قیلدیلر.
مذکور اداره سوزلاوچیسی یوسف حماد گه کوره، اوشبو واقعهلرده اوچ مینگ ۴۶۶ یشش اوی بوتونلی یا کی قسمی شکلده بوزیلگن و ۱۱ مینگ ۶۷۶ ایکینچیلیک ییر سوو آستیده قالگن.
او شوندهی دییدی: «آلتینچی حمل کونیدن حاضرگچه، مملکتده یاغینگرچیلیک و طبیعی آفتلر نتیجهسیده ۷۷ کیشی اولگن و ۱۳۷ کیشی یرهلنگن و توپلم شکلده بیش مینگ ۸۱۱ اوی بوزیلگن و ۱۲۱ سوو قودوغی و سوو ییتکزیش ترماغی و ۳۳۷ کیلومتر سرک بوزیلگن.»
بیر هفتهدن بیری دهشتلی سوو تاشقینی ۲۰ ولایتده یوز بیرگن – مینگلب عایله جبرلنگن و کوپینچه عایلهلر آواره بولگنلر.
لای و ویرانهلر آرهسیده، همه نرسهسینی یوقاتگن آدملر فقط اوز جانلرینی قوتقریب و بار نرسهلری یوق بولگنینی ایتهدیلر.
هلمند ولایتی گرمسیر تومنی بیرتاکه قیشلاغی یشاوچیسی جلالالدین، قیشلاقلریده یوز بیرگن سوو تاشقینی نتیجهسیده اوینینگ دیوارلری قولهگن و فقط اوزی و عایله اعضالرینینگ جانینی قوتقریش گه اولگورگنینی ایتهدی. او شوندهی دییدی: «ساعت ۱۰:۰۰ یا کی ۱۱:۰۰ اطرافیده سوو تاشقینی کیلدی، بیز فقط اوز جانلریمیزنی قوتقریش گه اولگوردیک و باشقه همه نرسهمیزنی آلیب کیتدی و اسلام امیرلیگیدن بیز گه یاردم بیریشنی و باشپنه قوریب بیریشنی ایستهیمیز.»
پروان سیاگرد تومنی فندقستان قیشلاغی یشاوچیسی قدیر، سوو تاشقینی عاقبتیده، اوشبو قیشلاق بازاریدهگی دکانی بوزیلیب و بوتون نرسهسینی سوو آلیب کیتگن.
اونگه کوره: «بیز فندقستان وادیسی (دره)سیده یشهیمیز و وادی آغزیده دکانیم بار ایدی و سوو تاشقینی نتیجهسیده بوزیلدی و هنوزگچه هیچ کیم یاردم کورسهتیش اوچون کیلگنی یوق. بو ییرده باشقه ۳-۴ دکان یوق بولگن و بیز گه یاردم بیریلیشینی سورهیمیز.»
بوندن آلدین، خلقارا آزیق-آوقت دستوری، افغانستاننینگ ایریم حدودلریده یوز بیرگن سوو تاشقینلری اهالی حیاتینی تهدید قیلیب و عایلهلرنی تورلی قیینچیلیک بیلن دوچ قیلگنی حقیده آگاهلنتیرگن ایدی. اوشبو نهاد فوقالعاده انسان پرولیک یاردم کورسهتیشنی تیکشیرماقدهلیگینی ایتگن.
ننگرهار یشاوچیسی رحیمگل، سوو تاشقینلریدن جبرلنگنلردن بیری. او اسلام امیرلیگی و خلقارا تشکیلاتلردن سوو تاشقینلری طفیلی جبرلنگن کیشیلر گه تیزلیک بیلن یاردم کورسهتیشلرینی ایستهیدی.
او شوندهی دییدی: «یاغینگرچیلیک و سوو تاشقینلری نتیجهسیده یشش اویلریمیز بوزیلدی. حکومت، یشاوچیلر و خلقارا تشکیلاتلردن ایستهیمیز اوی-جایلریمیزنی قیته قوریشگه یاردم بیرسینلر.»
بوندن آلدین هم، بیرلشگن ملتلر تشکیلاتینینگ انسان پرورلیک یاردملرینی هماهنگ قیلووچی ادارهسی (اوچا)، سونگی سوو تاشقینلری عاقبتیده جبرلنگن ۱۵۷ عایله گه یاردم بیریلگنینی بیلدیرگن.
