ایکینچیلیک و چارواچیلیک محصولات و ایچکی تولیدلر اوچ کونلیک ملی کورگزمهسی، بوگون (۲۷ دلو/۱۶ فبروری، دوشنبه) ایکینچیلیک و چاروادارلرنی قوللب-قوتلش مقصدیده، بلخ مرکزی مزارشریف شهریده آچیلدی.
اوشبو کورگزمه، بیرلشگن ملتلر تشکیلاتی ترقیاتی دستورینینگ مالیهوی حمایتی و «حرکت موسسهسی» تامانیدن آچیلگن و اونده ایکینچیلیک، چارواچیلیک محصولات، ایکینچیلیک اوسکونهلر، طبی اوسیملیکلر و حیوانلر آزوقهسی، ۱۰۰ دن آرتیق غرفهده نمایش گه قوییلگن.
اوشبو کورگزمه تشکیلاتچیلریدن بولمیش نقیبالله لاروی گه کوره، بو کورگزمه ایکینچیلیک سکتوری رواجلنیشی، ایچکی تولیدلر تنیشتیریلیشی و قوللب-قوتلنیشی و اونینگ قوللنیش اصولینی اورگهتیش مقصدیده آچیلگن.
او شوندهی دییدی: «بو ایکینچیلیک و چارواچیلیک محصولاتی کورگزمهسی دیر. بو ییرده ۱۰۰ دن آرتیق ایکینچیلیک سکتوری بوییچه فعالیت آلیب بارهیاتگن کیشی اشتراک ایتگن. اوشبو کورگزمه یواندیپی مالیهوی حمایتی و حرکت موسسهسی تامانیدن آچیلگن.»
شو بیلن بیرگه، غرفهدارلردن بیرقطاری، بو کورگزمه آچیلگنیدن خورسندلیک قیلیب و بوندهی کورگزمهلر کوپراق اوتکزیلیشیگه تأکید ایتیشهدی.
غرفهدارلردن مهدی غلامی شوندهی دییدی: «بوندهی کورگزمهلر بیز کبی کیچیک تجارتی بولگنلر اوچون یخشی دیر. بو ایش یاشلر، عیاللر و باشقه کیشیلرنی بو بولیمده قیزیقتیریشگه سبب بولهدی. بوندهی کورگزمهلر و حتا مملکتدن تشقریده اوتکزیلیشنی ایستهیمیز.»
غرفهدارلردن باشقه بیری نیکمحمد، ایکینچیلیک و چارواچیلیک محصولاتیگه بازار قیدیریش اوچون اوشبو کورگزمه گه اشتراک ایتگنینی بیلدیرهدی.
اونگه کوره: «اوشبو کورگزمهده یشهیدیگن حدودیمیزنینگ اچار، خیار، روب، قلمپیر، مربا، قوروق میوه و باشقه تولیدلرنی تنیشتیریش مقصدیده نمایش گه قویگنمیز.»
بلخ ایکینچیلیک ریاستی مسئوللری، تورلی تشکیلاتلر همکارلیگی بیلن ایچکی تولیدلردن قوللنیش مدنیتینی رواجلنتیریش، ایکینچیلیک و چارواچیلیک محصولاتلرنی قوللب-قوتلش گه سعی-حرکت قیلیشماقدهلیگینی ایتهدیلر.
بلخ ایکینچیلیک ریاستینینگ چارواچیلیکنی رواجلنتیریش مدیری غلاممحمد محمدی شوندهی دییدی: «ایکینچیلیک ریاستی محنتکارلر و چارواچیلرنی اوتمیشدن بیری قوللب-قوتلب کیلگن و بوندن کیین هم حمایتیگه دوام ایتتیرهدی. تورلی تشکیلاتلر همکارلیگی بیلن، ایکینچیلیک و چارواچیلیکنی رواجلنتیریش گه سعی-حرکت قیلماقدهمیز.»
بوندن آلدین هم، ایچکی تولیدلر، ایکینچیلیک محصولات و قول صناعتی گه دایر کورگزمهلر، بلخده اوتکزیلگن.
