سونگی کون‌لر، افغانستان ده قتل واقعه‌لری کوپه‌یگن که، هر کون میدیالرده بیر یا-ده نیچه قتل واقعه‌سی ترقه‌تیله‌دی.
میدیالرده ترقه‌تیلگن گزارشلر اساسیده، سونگی ایکی هفته‌ده (۲۱-جوزا دن ۳-سرطان) گچه، ۱۲ ولایت‌ده ۱۶ قتل واقعه‌سی یوز بیرگن؛ بیراق بوندن آلدینگی ایکی هفته‌ده (۹-جوزا دن، ۲۲-جوزا) گچه بیش ولایت‌ده آلتی قتل واقعه‌سی یوز بیرگن که بو، قتل واقعه‌لری نینگ ۶۲ فایز کوپه‌یگنی نی کورسته‌دی.
ینگی بیر مورد‌ده سابق حکومت نینگ ملی خوفسیزلیک ریاستی ایشلاوچیسی بی‌بی زهرا، هلمند مرکزی لشکرگاه شهری‌ده اولدیریلگن.
بی‌بی زهرا نینگ اوغلی بولمیش فرید نینگ سلام‌وطندار گه ایتیشیچه، آنه‌سی اوتگن هفته دوشنبه کونی ایرتنگ چاغی ساعت ۹:۰۰ده شخصی بیر ایشی نی انجام بیریش اوچون اوی‌دن چیقیب و مذکور کون عصر چاغی ساعت ۵:۰۰ده اونینگ جسدی هلمند ولایتی کسل‌خانه‌سیدن تاپیلگن دیر. اونینگ کوپه‌یتیریشیچه: «اوی‌دن اوغیرلنیب و جسدی ایکی یا-ده اوچ کون‌دن کیین تاپیلگنی خصوصیده‌گی موضوع‌لر یالغان دیر. مذکور کون ساعت ۱:۰۰ده آنه‌م بیلن تماس آلگن ایدیک، جواب بیرگن ایدی و کیین ایسه موبایلی اوچیریلدی. اونینگ اولیمی سببی حاضرگچه بیللی ایمس.»
بیزلرنینگ توییترده هم تعقیب قیلینگ!
شونده‌ی بیرحالده، هلمند معلومات و مدنیت ریاستی اورین‌باسری محمد‌قاسم ریاض نینگ ایتیشیچه: «بو خبر نی اوتگن کون قولگه کیلتیردیم. اوشبو واقعه عامل‌لری نینگ تاپیش خصوصیده سعی و حرکت قیلماقده‌‌میز.»
باشقه بیر واقعه‌ده، جوزجان مرکزی شبرغان شهری نینگ «شوبه افغانیه» قیشلاغی یشاوچیسی بولمیش ۲۳ یاشر جنت‌گل، ۲۲-جوزا ناتانیش کیشی‌لر تامانیدن اولدیریلگن.
جنت‌گل نینگ آته‌سی میرزابای نینگ سلام‌وطندار گه ایتیشیچه، اوغلی هیچ کیم بیلن دشمن‌لیگی یوق ایکن و قین آته‌سی نینگ اویی‌دن قیتیش چاغیده، یول‌ده اولدیریلگن. اونینگ کوپه‌یتیریشیچه: «اوشبو واقعه عاملی حاضرگچه بیللی ایمس، اونینگ کیم اولدیرگنی نی حاضرگچه بیلمه‌یمیز. مذکور واقعه عاملی نینگ تاپیلیشی نی ایسته‌یمیز.»
شونینگدیک ارزگان ولایتی نینگ «خاص ارزگان» تومنی یشاوچیسی بولمیش نجیب‌الله، ۲۶-جوزا ناتانیش کیشی‌لر تامانیدن اولدیریلگن.
اوتگن ایکی هفته‌ده یوز بیرگن ۱۶ واقعه‌دن، ۱۲ تهسی نینگ عاملی ناتانیش کیشی‌لر و تورت تهسی نینگ عاملی ایسه اولدیریلگن کیشی نینگ یقین‌داشلری دیب گزارش بیریلگن و شونینگدیک اوشبو قتل‌لردن تورت موردی نینگ سببی ایسه، عایله‌وی زوره‌وانلیک، حقوقی دعوا و شخصی دشمن‌لیک‌لر عنوان قیلینگن.
عین حالده، ۱۲-جوزا هرات شهری نینگ «فرقه» منطقه‌سیده حامله بیر عیال، اوگه‌ی اوغلی تامانیدن پیچاق‌لنیب اولدیریلگن.
هرات امنیه قوماندانلیگی نینگ میدیالر بولیمی آمری عبدالله انصاف نینگ ایتیشیچه، اوشبو عیال اوگه‌ی اوغلی نینگ قولگه آلینیشی خصوصیده سعی و حرکت‌لر نینگ دوامی بار. اونینگ کوپه‌یتیریشیچه: «مذکور ییگیت ایران ده حیات کیچیره‌ر ایکن. ایران دن قیتگنی‌دن نیچه مدت کیین، اوگه‌ی آنه‌سی نی پیچاق‌لب اولدیرگن و اوزی ساحه‌دن قاچگن دیر. مذکور قضیه خصوصیده تیکشیرو نینگ دوامی بار.»
سونگی ایکی هفته جریانیده ۱۶ قتل واقعه‌سی آره‌سیدن، اوچ‌ته‌سی بادغیس، ایکی‌ته‌سی کابل و باشقه ایکی‌ته‌سی ایسه ننگرهار ده یوز بیرگن. شونینگدیک هلمند، جوزجان، هرات، تخار، نیمروز، قندهار، سرپل و فایاب هم سونگی ایکی هفته‌ده بیر مورد قتل گه شاهد ایکن.
باشقه بیر تامان‌دن، جنایی و خوفسیزلیک حوزه ایش بیلرمان‌لریدن قطاری نینگ ایتیشلریچه، قانون نینگ عمل گه آشیریلمه‌سلیگی، قتل گه تیگیشلی دوسیه‌لر نینگ تیکشیریلمه‌سلیگی، قشاق‌لیک، ایشسیزلیک و شخصی دشمن‌لیک‌لر، افغانستان ده قتل واقعه‌لری کوپه‌یگنی نینگ اصلی سبب‌لریدن دیر.
بیزلرنینگ فیسبوک صحیفه‌میزگه باش اورینگ!
بو توغریده جنایی جرم‌لر تدقیقاتچیسی حبیب‌الله عاقلی نینگ ایتیشیچه، ایش زمینه‌سی یره‌تیلیشی بو کبی واقعه‌لر نینگ کمه‌یشی گه سبب بوله‌دی. «ایشسیزلیک و روحی کسل‌لیک قیین‌چیلیگی آستیده قالینیشی، جرم‌لر جمله‌دن قتل واقعه‌لری نینگ کوپه‌یشی گه سبب بوله‌دی. باشقه بیر تامان‌دن، قتل گه قول اورگن کیشی نینگ جزالنتیریلمه‌سلیگی، باشقه کیشی‌لر نی رغبت‌له‌یدی.»
شونده‌ی بیرحالده، ایچکی ایشلر وزیرلیگی سوزلاوچی اورین‌باسری بسم‌الله حبیب، مملکت‌ده قتل واقعه‌لری کوپه‌یگنی گه تیگیشلی سلام‌وطندار گه ایتیشیچه: «مرکز و مملکت نینگ باشقه بیر قطار ولایت‌لریده بیر قطار مورد‌لرده، قتل کبی جنایی جرم‌لر صورت تاپگنی تقدیرده، پولیس تامانیدن تیکشیرو نینگ بیتگنی‌دن کیین، موضوع نی میدیالر بیلن شریک قیله‌میز.»
ایتیش کیره‌ک که، اوشبو گزارش‌ده ارایه بولگن آمار، میدیالرده ترقه‌تیلگن واقعه‌لر اساسیده دیر و رسمی منبع‌لر ایسه، اوتگن ایکی هفته‌ده یوز بیرگن ۱۶ قتل واقعه‌سیدن یالغیز ۹ تهسی نی میدیالر گه تایید قیلگن.
