افغانستان المپیک، جسمانی تربیهلش و سپورت کمیتهسی عمومی ریاستی مسئوللری، بوگون (۶-قوس/۲۷-نومبر، پنجشنبه) کابلده اۉتکزگن خبری ییغیلیشده، مملکت سپورتچیلری مرکزی آسیا یاشلر رقابتلری اوچینچی دوریده پارلب و آلتی مدال قولگه کیریتگنلرینی معلوم قیلدیلر.
المپیک، جسمانی تربیهلش و سپورت عمومی باشلیغی احمدالله وثیق گه کوره، اوشبو رقابتلرده افغانستاندن ۵۷ سپورتچی و مربی، سپورت سکیز بولیمیده اشتراک اېتگن و بیر آلتین، ایکی کومیش و اوچ برنز قولگه کیریتیش گه اولگورگنلر.
او شوندهی دیېدی: «بو رقابتلرده افغانستاندن ۵۷ سپورتچی و حکم (مربی) سپورت سکیز بولیمیده اشتراک ایتگن اېدیلر، بیر آلتین، ایکی کومیش و اوچ برنز مدال آلیب و ۲۴-اورینده تورگنلر.»
اوشبو ریاست مسئوللرینینگ ایتیشیچه، افغانستان ۱۷ یاشنی تولدیرمهگن فوتسال ملی تیرمه جماعهسی، فینالده ایران تیرمه جماعهسینی ۲-۱ حسابی بیلن مغلوب قیلیب و آلتین مدالنی آلدی و شونینگدیک افغانستان والیبال تیرمه جماعهسی مرکزی آسیا رقابتلری فینال مسابقهسیده تورکمنستان برابریده ۳-۲ حسابی بیلن مغلوبیت گه تن بیریب و نایب قهرمان بولدی.
شو بیلن بیرگه، افغانستان فوتبال فدراسیونی باشلیغی محمد یوسف کارگر، بو یوتوقلرنی خلقارا معیارلر نظرگه آلینیشی عنوان قیلیب، مملکت سپورتچیلری خصوصی سکتور تامانیدن قۉللب-قوتلنیشی کېرهک دیېدی.
اونگه کوره: «بو یوتوقلرنینگ سببی بو کی فدراسیونلر خلقارا معیارلر گه تینگ فعالیت قیلگن. مملکت سپورت جماعهلرینی خصوصی سکتور قۉللب-قوتلشی کېرهک.»
المپیک، جسمانی تربیهلش و سپورت عمومی ریاستی مسئوللرینینگ ایتیشیچه، اوتگن بیر یریم ییل ایچیده، مملکت سپورتچیلری تورلی ساحهلرده ۳۵ آلتین، ۴۰ کومیش و بیرقطار برنز شامل ۱۰۰ مدال قولگه کیریتگنلر.
