مملکت شمالیده ۱۲-عقربده یوز بیرگن زلزلهده اویلری بوزیلگن عایلهلر، ساووقدن اولرنینگ سقلش اوچون حاضر ایسه دایمی باشپنه قوریش توغریسیده حکومت و یاردم بیرووچی نهادلر آرقهلی یاردم بیریلیشینی کوتیب تورگنلر.
سمنگان ولایتی حضرتسلطان تومنینینگ «کوکجر» و «کابلیهای پایین» قیشلاقلری یشاوچیلری، اوی و باشپنه قوریلیشینی حاضرگی کونلردهگی اینگ مهم تشویشلریدن بیری بولگنینی بیلدیریب و ایتیشلریچه، باشپنه قوریش امکانیتیگه ایگه ایمسلر.
حضرتسلطان تومنیده یشاوچیلریدن سراجالدیننینگ ایتیشیچه: «ایشچیمیز و باشپنه قوریش امکانیتیگه ایگه ایمسمیز. امکانیتیمیز بولگنیده اوزیمیز توزتهر ایدیک. بو اوینی اوزیمیز قورگن ایدیک، بیراق زلزله نتیجهسیده بوزیلدی. ایکی ییلده بو اوینی قورگن ایدیک. حاضر امکانیتیمیز یوق و قییردن قیلهیلیک؟ قیش موسومی کیلگن و کمبغللیک دیر. هیچ نرسهمیز هم یوق.»
اوشبو تومن یشاوچیلریدن باشقه بیری امانالله، اولرگه باشپنه قوریلیشی توغریسیده همکارلیک بولینیشینی ایستهب و ایتیشیچه: «بیزلرگه ۱۰ یریم مینگ افغانی یاردم بیردیلر که بو پول بیلن بیرته اتاق هم قوریلمهیدی. کوچی و امکانیتی بولگن کیشیلر آرقهلی ایکیته اتاق قوریب بیریلیشینی ایستهیمیز، چونکه اویلریمیز وضعیتی جودهیم یامان دیر. دولت و اهالیدن انه شوونی طلب قیلهمیز.»
شوندهی بیرحالده، سمنگان ده محلی مسئوللرنینگ ایتیشلریچه، زلزله نتیجهسیده جبرلنگن کیشیلرنینگ باشپنهسیزلیک قیینچیلیکلری حلی اوچون سعیوحرکت قیلهدیلر. سمنگان حاکمی سوزلاوچیسی فضلالرحمان عثمانینینگ ایتیشیچه: «مرکزی حکومت، موسسهلر و تشقی مملکتلردن اهالی نیازمندلیگی توغریسیده صحبت قیلگنمیز که قیش موسومیده قیینچیلیکلرینی حل قیلسهلر. اهالی اویلری قیته قوریلیشی و اولرنینگ قیته عادی حیاتلریگه قیتیشلری اوچون سعیوحرکت قیلهمیز. بو قیینچیلیکلر حاضرگچه حل بولمهگن و اوشبو ییتکرمه آرقهلی اهالینینگ مذکور قیینچیلیکلری حل بولیشینی سورهیمیز.»
رسمی معلومات اساسیده جاری قویاش ییل ۱۲-عقربده یوز بیرگن زلزلهده، یالغیز سمنگان ولایتی حضرتسلطان تومنیده، کمیده بیر مینگ ۸۰۰ یشش اوی بوتونلی و قسمی شکلده ویران بولگن.
