افغانستان برق ییتکزیش شرکت (برشنا) و عزیزی گروپ کمپنیهسی، افغانستانده قویاش و تاش کومیردن ۸۴۵ میگاوات کوچیگه ایگه برق ایشلب چیقریش شرطنامهسینی امضالهدی.
اوشبو شرطنامه، بوگون (۲۲ دلو/۱۱ فبروری، چهارشنبه) کابلده اسلام امیرلیگی باش وزیرینینگ اقتصادی اورین باسری ملا عبدالغنی برادر و عزیزی گروپ کمپنیهسی عمومی باشلیغی میرویس عزیزی اشتراکی بیلن امضالندی.
شرطنامه اساسیده، عزیزی گروپ کمپنیهسی قویاش و تاش کومیردن برق ایشلب چیقریش بیش لایحه اوستیده ۴۶۳ میلیون دالر سرمایه کیریتهدی.
بو لایحهلر کابل، پروان، غزنی، بغلان و تخار ولایتلریده عملگه آشیریلهدی.
بوندن اول هم، عزیزی گروپ کمپنیهسی اسلام امیرلیگی سوو و برق وزیرلیگی ۱۰ مینگ میگاوات کوچیگه ایگه برق ایشلب چیقریش و انتقال بیریش شرطنامهنی امضالهگن ایدی.
