قندهار ساغلیک ریاستی مسووللری نینگ ایتیش‌لریچه، بمب جایلشتیریلگن بیر موتر قندهار ولایتی میوند تومنی نینگ پولیس قومندانلیگی برابریده پارتله‌گنی باعث ۴ کیشی هلاک و ۴۰ کیشی یره‌لنگن.
اوشبو هجوم بوگون (دوشنبه ۱۹- عقرب) ایرته‌لب میوند تومنیده یوز بیرگن.
قندهار ساغلیک ریاست باشلیغی محمد طاووس اشرف نادری نینگ ایتیشیچه، حاضرگچه ۴ جسد و تینچ‌اهالی شامل ۴۰ یره‌دار ولایتی کسل‌خانه گه انتقال بیریلگن. اونگه کوره، جان بیرگن و یره‌لنگنلر آره‌سیده عیاللر و باله لرهم شامل دیر.
اونینگ ایتیشیچه، تلفات رقمی کوپه‌یشی ممکن و توپراقلر آستیده قالگن کیشیلرنینگ نجات بیریش اوچون سعی و حرکت‌لرنی دوامی بار.
قندهار ساغلیک ریاست باشلیغی نینگ ایتیشیچه، مذکور پارتلش ده حربیلرگه نسبتن تینچ‌اهالی کوپ یره‌لنگن، لیکن یره‌لنگن تینچ‌اهالی رقمی حقیده معلومات بولمه‌گن.
امنیتی بیر منبع کیم‌لیگی سیرقالیش نی ایسته‌ب سلام‌وطندارگه ایتیشیچه، میوند امنیه قومندانلیگی اوستیگه اویوشتیریلگن هجوم‌ده ۱۰ دن آرتیق پولیس یره‌لنگن.
لیکن قندهار پولیسی سوزلاوچیسی جمال ناصر بارکزی نینگ ایتیشیچه، اوشبو هجوم‌ده ۳ پولیس هلاک و ۱۳ تینچ‌اهالی یره‌لنگن. عین‌حالده بارکزی جنابلری، بو هجوم‌ده بیر عیال جان بیرگنی نی تصدیقله‌گن.
عینی شاهدلرگه کوره، پارتلش جوده کوچلی بولگن و اویلری و دکانلری نینگ شیشه‌لری سینیب توکیلگن، لیکن هجوم مسئولیتی نی حاضرگچه هیچ بیر گروه بوینیگه آلمه‌گن.
میوند تومنی، قندهار نینگ مرکزیگه یقین بیر تومن دیر و طالبان گروهی ایکی هفته دن بویان امنیتی کوچلر بیلن اوشبو تومنده آتیشماقده.
اوروش جریانیده یوزلرچه عایله اوی-جایلرینی ترک قیلیب، قندهار شهریگه بارگنلر. اوی-جایی نی ترک قیلیش گه زورلنگن کیشیلر دولت و طالبان گروهیدن آتیش کیسین اعلام قیلیشلرینی سوره‌شگن.