ساغلیق‌نی سقلش وزیرلیگی مسئوللری، بوگون (چهارشنبه، ۱۷-اسد)، کابل ده «آنه سوتیدن آوقت‌لنیش خلق‌ارا هفته‌سی» مناسبتی بیلن یولگه قوییلگن خبری بیر ییغینی‌ده ایتیشلریچه، جاری میلادی ییل‌ده توییب آوقتلنمسلیککه چلینگن آنهلر و باله‌لر سانی اوتگن ییل گه قره‌گنده کمه‌یگن.
ساغلیق‌نی سقلش وزیرلیگی آوقت‌لنیش بولیمی باشلیغی محمدوزیر حامد نینگ ایتیشیچه، جاری میلادی ییل باشلنگنی‌دن حاضرگچه آغیر توییب آوقتلنمسلیککه چلینگن ۸۵۷ مینگ باله و اورته توییب آوقتلنمسلیککه چلینگن ایکی میلیون باله بو وزیرلیک‌ده ثبت بولگن. جناب حامد گه کوره، جاری ییل‌ده آغیر و اورته توییب آوقتلنمسلیککه چلینگن قریب ایکی میلیون باله دوالنگن.
بیزلرنینگ «ایکس» ترماغی ده هم تعقیب قیلینگ!
اوشبو وزیرلیک آوقت‌لنیش بولیمی باشلیغی نینگ کوپه‌یتیریشیچه، آنهلر و باله‌لر آره‌سیده توییب آوقتلنمسلیک نینگ اینگ کوپ آماری، ایکینچیلیک محصولاتی کمه‌یگن و قوروق‌چیلیک بیلن روپه‌ره بولگن ولایت‌لرده ثبت بولگن.
شونینگدیک افغانستان ده بیرلشگن ملتلر تشکیلاتی نینگ باله‌لردن حمایت قیلووچی صندیغی (یونیسف) نماینده‌سی محمد امین نینگ ایتیشیچه، اولر نینگ آمارلری اساسیده جاری میلادی ییل‌ده آغیر توییب آوقتلنمسلیککه چلینگن باله‌لردن ۳۶ فایزی ۶ آیلیکنی تولدیرمه‌گن چقه‌لاقلر دیر.
اونینگ کوپه‌یتیریشیچه: «کسل‌خانه گه مراجعت قیلگن آغیر توییب آوقتلنمسلیککه چلینگن ۱۰ مینگ ۲۰۰ باله، آلتی آیلیکنی تولدیرمه‌گن چقه‌لاقلر دیر که باله‌لردن ۳۶ فایزینی تشکیل بیره‌دی. چقه‌لاقلرگه دستلبکی آلتی آی‌ده آنه سوتی نی بیرگنیمیز صورت‌ده، هیچ قچان توییب آوقتلنمسلیککه چلینمه‌یدیلر.»
مذکور برنامه‌ده بیرلشگن ملتلر تشکیلاتی خلق‌ارا آزیق-آوقت دستوری نماینده‌سی مونا شیخ نینگ ایتیشیچه، جاری میلادی ییل‌ده اوشبو نهاد سوت بیره‌دیگن ۱.۶ میلون آنه گه آزیق-آوقت محصولاتی نی یاردم بیرگن.
بیزلرنینگ فیسبوک صحیفه‌میزگه باش اورینگ!
بیرلشگن ملتلرتشکیلاتی نینگ خلق‌ارا آزیق آوقت دستوری، افغانستان ده سوت بیره‌دیگن آنهلر نینگ آوقت‌لنیشی و آنهلر و چقه‌لاقلر نینگ توییب آوقتلنمسلیککه چلینمسلیکلری اوچون بو نهاد نینگ همکارلیک‌لری دوامی‌دن ایشانچ بیرگن.
ساغلیق‌نی سقلش وزیرلیگی‌ده مسئوللر سوداگرلر، صنعتچیلر و خصوصی سکتوردن، آز صفتلی قوروق سوت وارداتی آلدی آلینیشی خصوصیده مسئولیت‌لری نی بجریشلری و شونینگدیک ییتکیرمه‌لردن آنه سوتی بیلن آوقت‌لنیش فرهنگی رواجلنیشی مقصد معلومات بیریلیش بولیمی‌ده همکارلیک قیلیشلرینی ایسته‌گن.
