محمدنادر، غور مرکزی فیروزکوه شهری نینگ یشاوچی‌سی دیر. او، کمبغللیک، ایش‌سیزلیک و ناتینچلیکلر سبب، چیت‌ایللیک مملکت‌لردن بیریده تینچ فضا ده تیریک چیلیک قیلیش مقصد ده ۳ ییل آلدین نامنظم مهاجرلیک آرقه‌لی افغانستان‌نی ترک قیلگن. محمدنادر، پاکستان و ایران یول‌لری آرقه‌لی اوزینی ترکیه‌ده ییتیشتیرگن.
اوشبو یاش نی ایران و ترکیه مملکت‌لریگه قیلگن سفریدن قیغولی حکایه‌سی بار. او، ترکیه و ایران حربی‌لری نینگ یمان یول باریش، شکنجه و تحقیر قیلیش‌لریدن شکایت قیله‌دی.
محمدنادر نینگ ایتیشیچه، آز مدت ترکیه‌ده ایکن، بیراق اوشبو مملکت پولیسی تامانیدن قولگه آلینیب محبوس قیلینگن.
اونینگ ایتیشیچه، ۴۰ کیچه و کوندوزنی ترکیه قماقخانه‌لریدن بیریده اوتکزگن و بو مدت‌ده پولیس تامانیدن قیناققه سالینگن و حتا سوو و آوقات ییشدن محروم بولگن.
«ترکیه پولیسی قولیگه توشدم کوپ قیناققه ساله‌ریدیلر. ۴۰ کیچه قماقخانه ده ایدیم، مین بیلن یمان شکلده یول باره‌ریدیلر. بو ۴۰ کون جریانیده هر پیت‌ده بیزگه آقات بیرمه‌ریدیلر. سوو بیرمه‌ریدیلر. بیزنی برققه بیره‌ریدیلر و نیمه اوچون ترکیه گه کیله‌سیزلر دیب تهدید قیله ریدیلر؟ بیز قیین‌چیلیک‌لریمیز کوپ بولگنی‌نی ایتیک، آوقات کیلتیره‌دیگن یوق دیدیک و کمبغللیک بیلن دوچ کیلگن‌میز دیدیک و انه‌شو سبب، ترکیه گه سفر قیلگنمیز دیدیک. قول‌لریمیزنی باغلب طیاره گه آلیب کیلدیلر و بیزنی سورگون ایتدیلر.»
محمدنادر نینگ ایتیشیچه، نامنظم مهاجرلیک یولیده کوپینچه قیین‌چیلیکلر بیلن دوچ کیلگن و حتا همراه‌لرنینگ کسل بولیب جان بیرگن‌لریگه گواه بولگن. او، کمیده ایکی آیی دن بویان غور مرکزی فیروزکوه شهریده تیریک‌چیلیک قیله‌دی. اونینگ ایتیشیچه، ایش زمینه‌سی یره‌تیلمه‌گن صورتده، نامنظم مهاجرلیک آرقه‌لی چیت‌ایللیک مملکت‌لردن بیریگه باریشی ممکن.
غور ده اجتماعی ایش بیلرمان گل‌رحمان فراز نینگ افغانستان‌لیک یاش‌لرنی چیت‌ایللیک مملکت‌لرگه باریشیدن خواطر بیلدیریب ایتیشیچه، ناتینچلیک و ایش‌سیزلیک سبب، کوپ قطار یاش‌لر بنگی‌وار ماده‌گه چلینیب یا-ده تروریستی گروه‌لرگه قوشیلگن و اولردن بیرقطاری مملکت‌نی ترک قیلیش‌گه مجبور بولگنلر.
عین‌حالده، غور ولایتی بوییچه مهاجرلر و باش‌پناه ایزلاوچی‌لر ریاستی باشلیغی عبدالرووف غفوری نینگ ایتیشیچه، ۲۰۲۱- ییل باشلنگنیدن حاضرگه‌قدر عیال‌لر و باله‌لر شامل ۲۰۰ مهاجر اوشبو ولایت گه قیتیب کیلگن.
غفوری نینگ ایتیشیچه، اوشبو اداره، خلق ارا مهاجرلیک تشکیلاتی دفتری یاردمی بیلن سورگون ایتیلگن کیشی‌لرگه آذیق-آوقات و نقده پول یاردم بیرگن.
شونینگدیک، غور محلی مسووللری نینگ ایتیش‌لریچه، نامنظم مهاجرلیک آرقه‌لی مملکت‌نی ترک قیلگن یاش‌لردن کوپ قطاری مقصد گه ییتیشمه‌گن و یولده جان بیرگنلر. غور حاکمی سوزلاوچیسی زلمی کریمی نینگ ایتیشیچه، افغانستان دولتی نامنظم مهاجرلیککه توسیق بولیش اوچون سعی و حرکت قیلماقده.
غور محلی مسووللری، یاش‌لرنینگ حجت‌سیز شکلده مملکت‌نی ترک قیلیش‌لریدن خواطر بیلدیریب ایتیش‌لریچه، بونده‌ی مهاجرلیککه توسیق بولیش اوچون نیچه مرته سعی و حرکت قیلگن‌لر، لیکن موفق بولمه‌گنلر.
افغانستان نینگ ایران و ترکیه ده‌گی ایلچی‌خانه‌سی مسووللری فکرینی آلیش اوچون سعی و حرکت قیلدیک، لیکن موفق بولمه‌دیک.
غور محلی مسووللری و اجتماعی بولیمی ایش بیلرمان‌لری نینگ ایتیش‌لریچه، یاش‌لرنینگ نامنظم مهاجرلیک خطرلری خصوصیده معلومات‌لری بولمه‌گنی سبب، سونگی ییل‌لرده قاچاق یولی آرقه‌لی چیت‌ایللیک مملکت‌لرگه باره‌دیگنلرنینگ سانی کوپه‌یب بارماقده.
