بغلان ولایتی کرکر منطقه‌سیده‌گی قوم بویوکی حسام‌الدین نینگ ایتیشیچه، اوشبو منطقه یشاوچیلری برچه نرسه‌لری نی قولدن بیرگنلر و بو منطقه‌ده یوز بیرگن سونگی سوو تاشقینلر نتیجه‌سیده، کمیده ۱۵۰ عایله زیان کورگن.
اونینگ کوپه‌یتیریشیچه، مذکور عایله‌لرده‌گی عیاللر و باله‌لر کیچه و کوندوزلری نی ساووق هوا و آچیق فضاده اوتکزماقده‌لر. «کمیده ۱۵۰ عایله زیان کورگن و اولر نینگ اوی‌لریده هیچ نرسه قالمه‌گن، اولر نینگ اوی‌لریده یالغیز لای قالگن و اولتیریش گه هم جای یوق.»
بیزلرنینگ فیسبوک صحیفه‌میزگه باش اورینگ!
شونینگدیک سونگی کون‌لر بدخشان، تخار و غور ولایتی‌لریده یوز بیرگن ویران قیلووچی سوو تاشقینلر نتیجه‌سیده زیان کورگن عایله‌لردن قطاری نینگ سلام‌وطندار گه ایتیشلریچه، حاضرگچه سرپرست حکومت آرقه‌لی یاردم قولگه کیلتیرمه‌گنلر.
بدخشان ولایتی کوهستان تومنی یشاوچیسی خدایداد نینگ ایتیشیچه: «سوو تاشقینی طفیلی کوهستان تومنی نینگ تورت قیشلاغیده یشاوچیلر گه کوپینچه زیان ییتیشگن، ایکینچیلیک ییرلر ویران بولگن و باغ‌لر اورته‌دن کیتگن. بو منطقه گه هیچ قنده‌ی یاردم کیلمه‌گن، نان و باش‌پنه تامین‌لنیشی نی ایسته‌یمیز.»
تخار ولایتی اشکمش تومنی یشاوچیسی نیک‌محمد نینگ ایتیشیچه: «یشاوچیلر گه یاردم بیریلیشی نی ایسته‌یمیز و سوو تاشقین‌لریدن اوزاق‌ده بولگن اوی‌لرده اولر گه باش‌پنه بیریلیشی نی ایسته‌میز، چونکه سوو تاشقینی‌دن زیان کورگنلر خیمه‌سیز دیر.»
شونینگدیک غور ولایتی مرغاب تومنی یشاوچیسی غلام نینگ ایتیشیچه: «هیچ نرسه یاردم بیریلمه‌گن، هر قنده سعی‌وحرکت قیله‌میز لیکن اویی‌میزده هیچ نرسه قالمه‌گن. ییگولیک ماده‌میز یوق و حاضر ایسه تلف بولماقده‌میز. بیزلر گه یاردم بیریلیشی نی ایسته‌یمیز.»
شونده‌ی بیرحالده، طبیعی آفت‌لرنی باشقریش ایشلری بوییچه دولت وزیرلیگی مسئوللری نینگ سلام‌وطندار گه ایتیشلریچه، سونگی اوچ کون جریانیده مملکت نینگ تورت ولایتی‌ده یوز بیرگن ویران قیلووچی سوو تاشقینلر نتیجه‌سیده، ۱۶۲ کیشی اولیب و ۲۲۶ کیشی ایسه یره‌لنگن.
اوشبو وزیرلیک سوزلاوچیسی محمد عبدالله‌جان سایق نینگ ایتیشیچه، مذکور سوو تاشقین‌لردن زیان کورگن عایله‌لر گه یاردم بیریش پروسه‌سی باشلنیب و بو یاردم‌لر کییم، آزیق-آوقت و چادردن عبارت دیر.
بیزلرنینگ «ایکس» ترماغی ده هم تعقیب قیلینگ!
جناب سایق نینگ کوپه‌یتیریشیچه: «سونگی نیچه کون جریانیده بغلان، تخار، بدخشان و غور ولایت‌لریده یوز بیرگن سوو تاشقین‌لرده ۱۶۲ کیشی اولیب و ۲۲۶ کیشی یره‌لنگن. مذکور سوو تاشقین‌لرده ۸۸۰ یشش اوی بوتونلی و قسمی شکلده ویران بولیب و ۳۷۱۰ باش چاروه تلف بولگن. یاردم بیریش پروسه‌سی باشلنیب و دوام قیلماقده که بو یاردم‌لر کییم، آزیق-آوقت و چادردن عبارت دیر.»
ایتیش کیره‌ک که، جمعه کونی، ۲۱-ثور مملکت نینگ شمال و شمال شرقی ولایتلری اولیملی و ویران قیلووچی سوو تاشقینلر نینگ یوز بیریشی گه شاهد بولیب و بغلان ایسه اینگ کوپ زیان کورگن ولایتلردن دیر.
