بوگون (چهارشنبه، ۱۲-ثور/ ۱-می)، خلق‌ارا ایشچی کونی‌گه ماس دیر. بوگون نینگ ییتیب کیلیشی بیلن بیرگه افغانستان ده ایشچیلر اوشبو مملکت‌ده ایشلاوچیلیک حقوقی رعایت ایتیلمسلیگی‌دن شکایت قیلگنلر.
کابل ده ایشچیلردن قطاری نینگ ایتیشلریچه، مملکت‌ده سیاسی اوزگریشلردن کیین کوزگه کورینه‌رلی درجه‌ده ایش فرصتلری کمه‌یشی، ایشلش چاغیده اولرنینگ هر قنده‌ی عدالت‌سیزلیک و یامان رفتارلر نی تحمل قیلیش گه مجبور قیلگن.
اولر گه کوره، کوپینچه پیت ایش ساحه‌سیده اولر گه آزیق-آوقت بیریلمه‌ی و اولر ۱۵۰-۲۰۰ افغانی برابریده ۹ ساعت ایشله‌یدیلر.
بیزلرنینگ «ایکس» ترماغی ده هم تعقیب قیلینگ!
ایشچیلردن نادر نینگ ایتیشیچه: «بیر هفته‌دن بیر کون ایش تاپیله‌دی و درآمدی هم ۲۰۰ افغانی بوله‌دی. ایش یوق و اویگه بارگنیمیز‌ده چرچمه‌ینگ دیه‌دیلر و خجالت قیله‌میز. ایش بولگنی پیتده، نیگه باشقه مملکتلر گه کیته‌یلیک.»
ایشچیلردن باشقه بیری جاوید نینگ ایتیشیچه: «بیر هفته‌دن بیر یا-ده ایکی مرته ایش گه کیته‌من. دکان‌دارلردن قرض آلیش گه مجبورمین. ۲۰۰-۳۰۰ بیره‌دی و قنچه ساعت ایشلته‌دی. مجبور‌میز. حاضر ایسه ایکی ییل‌دن بیری برق پولی نی بیرگنیمیز یوق. برقی‌میز نی کیسگنلر. بعضا عاجل دارو نیاز بوله‌دی که پول یوق.»
شونینگدیک کابل‌ده‌گی ایشچیلردن بیری سلیمان ایش جریانیده ایشچیلر خوفسیزلیگی رعایت ایتیلمسلیگی و اولر گه ساغلیق بیمه یوقلیگی‌دن شکایت قیله‌دی.
اونینگ ایتیشیچه، آته‌سی ایش جریانیده خوازه‌دن ییقیلیب و حاضر ایسه اونینگ دوالنیشی اوچون قرضدار بولگن. «ایکی آی آلدین آته‌من رنگ قیلیش جریانیده خوازه‌دن ییقیلدی. قوللری سیندی. ایش ایگه‌سی اونگه یاردم بیرمه‌دی. دوالنیشی اوچون قرض آلدیک. حاضر ۴۰ مینگ افغانی قرض‌دارمیز.»
سونگی اوچ ییل جریانیده، مملکت‌ده سیاسی توزوم اوزگریشی و اقتصادی تنزل بیلن افغانستان ده ایچکی و تشقی لایحه‌لردن کوپ قطاری توخته‌تیلیب و انه شوو سبب ایشلچیلردن کوپ قطاری ایش‌سیز بولیب و درآمدلری کمه‌یگن.
عین حالده، افغانستان ایشچیلر بیرلشمه‌سی باشلیغی لیاقت عادل ایش فرصتلری کمه‌یگنی سبب ایشچیلر برابریده قیین‌چیلیکلر کوپه‌یگنی‌دن شکایت قیلیب ایتیشیچه، خلق‌ارا ایش تشکیلاتی هم بو رقم بیر وضعیت‌ده افغانستان‌لیک ایشچیلردن حمایت قیلمه‌یدی.
اونینگ کوپه‌یتیریشیچه: «اوزگریشلر ایشچی طبقه‌سی گه قتیق زیان ییتیشتیره‌دی. ییترلی درآمدی یوقلیگی، مملکت‌ده اساسی سرمایه یاتقیزیش یوق. ایشچی طبقه‌سی ایسه یامان بیر وضعیت بیلن روپه‌ره بوله‌دی که حتی مهاجرت قیلهدیلر. بو طبقه حتی باله‌لری نی هم ایشچی‌لیککه مجبور قیلهدیلر.»
شونینگدیک عامه پالیسی بیلرمانلری، ایشچیلر حقوقی جمله‌دن ایش ساعتلری نظر گه آلینیب اولر نینگ درآمد میزانی تعیین‌لنیشی اوچون معین قانون ایجاد بولیشی گه تاکید‌لب، اولر نینگ ایش نوعیتی و مهادلری گه اورغوله‌گن.
عامه پالیسی بیلرمانی نیازمحمد همدرد نینگ سلام‌وطندار گه ایتیشیچه: «دولت ایشچیلر خصوصیده بیللی پالیسیسی بولیشی کیره‌ک. بازار نرخی، مهارتلری و زمان گه قره‌ب اولر گه معاش بیریلیشی کیره‌ک. دولت اولر گه ایش فرصتلری نی یره‌تیش گه مجبور دیر. اینیقسه ایکینچیلیک و صناعت سکتورلریده فابریکه‌لر قوریلیشی و کوپراق سرمایه یاتقیزیلیشی کیره‌ک که اولر گه ایش تاپیلسین.»
بیزلرنینگ فیسبوک صحیفه‌میزگه باش اورینگ!
بیراق ایش و اجتماعی ایشلر وزیرلیگی مسئوللری نینگ ایشانچ بیریشیچه، اوشبو وزیرلیک مملکت‌ده‌گی موجود امکانیت‌لردن قوللنیش بیلن ایش فرصتلری یره‌تیلیشی و ایش جریانیده ایشچیلر حقوقی رعایت ایتیلیشی خصوصیده سعی‌وحرکت قیلماقده.
مذکور وزیرلیک سوزلاوچیسی سمیع‌الله ابراهیمی نینگ ایتیشیچه: «ایشچیلر اوچون بیزلر ایش گه تیگیشلی قاعده-قانون نی تیار قیلدیک و اونینگ اجرا بولیشی اوچون برنامه توزه‌تیب و اقدام قیلدیم. مثلا ایش قانونی نینگ تیکشیریش نی ایته آله‌میز. شونینگدیک اولر گه تینچ و راحت ایش محیطی نی یره‌تیش اوچون کیره‌کلی سعی‌وحرکتلریمیز نی انجام بیره‌میز.»
ایتیش کیره‌ک که، گزارشلر اساسیده افغانستان جمعیتی‌دن کوپ قطاری نی ایشچیلر تشکیل بیره‌دی و انه شوو سبب، مملکت‌ده ایش زمینه‌سی یوقلیگی اوچون ییل‌ده افغانستان‌لیک ایشچیلردن مینگلرچه‌سی تورلی مملکتلر جمله‌دن قوشنی مملکتلر گه مهاجرت قیلگنلر.
