خواف-هرات تیمیر یولی آرقه‌لی رسمی روشده سوداگرلیک توارلرنی انتقال بیریش جریانی باشله‌نیشی بیلن، سه‌شنبه کونی، ۲۰ سرطان، «روزنک» بیکتی دن تیمیر یولی تورتینچی قطعه‌سینی قوریش ایشی باشلنگن. اسلام امیرلیگی رسمی‌لری گه کوره، خواف-هرات تیمیر یولی تورتینچی قطعه‌سی مذکور ولایت نینگ صنعتی شهرکی گه قدر دوام تاپه‌دی.
اسلام امیرلیگی سوزلاوچیسی ذبیح‌الله مجاهد نینگ ایتیشیچه، اوتگن کون اوشبو تیمیر یولی آرقه ایران دن ۱۰ واگن سوداگرلیک توار هرات گه ییتیب کیلگن. جناب مجاهد نینگ کوپه‌یتیریشیچه، خواف-هرات تیمیر یولی نینگ تورتینچی قطعه‌سی قوریلیش ایشی یکونیدن کیین، یشاوچیلر اوشبو تیمیر یولی آرقه‌لی ایران گه سفر قیلیش‌لری ممکن.
بیزلرنینگ فیسبوک صحیفه‌میزگه باش اورینگ!
عین‌حالده، ایران یوللر و شهرلرنی قوریش وزیرلیگی مسئوللری نینگ ایتیشلریچه، افغانستان ده تیمیر یولی کینگه‌یتیریلیش خریطه‌سینی عملی قیلیش اوچون سعی‌وحرکت قیلماقده‌لر.
ایران یوللر و شهرلرنی قوریش وزیرلیگی نینگ مخصوص نماینده‌سی میرشفیع سلام‌وطندار بیلن اوتکزگن صحبتیده ایتیشیچه، خواف-هرات تیمیر یولی آرقه‌لی دایمی روشده ایکی تامانلمه سوداگرلیک توارلر انتقالی دوام تاپه‌دی.
میرشفیع نینگ کوپه‌یتیریشیچه: «خواف-هرات تیمیر یولینی اوزبیکستان و چین تیمیر یولی و افغانستان آرقه‌لی سوداگرلیک یولینی منطقه اولکه‌لری بیلن باغلش مقصدیده سعی‌وحرکت قیلینماقده.»
باشقه تاماندن، هرات محلی مسئوللری گه کوره، هرات افغانستان نینگ اقتصادی قطبی اوله‌راق اوشبو ولایت ده تولیدات کوپ بولیب و کوپ سانده ایشخانه‌لر موجود دیر، مذکور تیمیر یولی هرات ده‌گی سوداگرلر و صناعتچیلر اوچون مهم سنله‌دی.
هرات حاکمی نوراحمد اسلام‌جار نینگ سلام‌وطندار گه ایتیشیچه، افغانستان خواف-هرات تیمیر یولی آرقه‌لی اروپا اولکه‌لری گه باغله‌نیشی، اوشبو مملکت اینیقسه هرات نینگ اقتصادی نقطه‌ی نظر دن رواجلنیشی گه سبب بوله‌دی.
بیزلرنینگ توییترده هم تعقیب قیلینگ!
جناب اسلام‌جار نینگ کوپه‌یتیریشیچه: «بوگون بیرینچی مرته افغانستان تاریخی ده تیمیر یولی تورکیه و ایران دن هرات گه ییتیب کیلگن. تیمیر یولی صناعتی‌میز رواجلنیشی گه سبب بوله‌دیگن بیر جهاز دیر.»
برچهسی بیلن، افغانستان تیمیر یولی اداره‌سی مسئوللری نینگ ایتیشلریچه، تیمیر یولینی اوزبیکستان و چین گه باغلش مقصدیده سعی‌وحرکت قیلماقده‌لر.
افغانستان تیمیر یولی عمومی باشلیغی بخت‌الرحمان شرافت نینگ سلام‌وطندار گه ایتیشیچه، خواف-هرات تیمیر یولی ایران و افغانستان نینگ اقتصادی اوسیشی اوچون بویوک آدیم دیر.
جناب شرافت خواف-هرات تیمیر یولی آرقه‌لی رسمی روشده سوداگرلیک توارلر انتقال بیریلیشینی ایکی مملکت اورته‌سیده مناسبت‌لر مستحکم‌لنیشی اوچون تاریخی کون عنوان قیلیب ایتیشیچه، تیمیر یولی افغانستان و ایران ارا سوداگرلیک مناسبت‌لر کینگه‌یشی اوستیده مثبت تأثیر قیله‌دی.