بامیان ده چاروهچی عیاللردن قطاری، فنی تعلیملرنی آلیش و زمانهوی اوسکونهلردن فایدهلنیش بیلن، قویلری یونگینی خام شکلده ساتیش اورنیده، پروسس قیلهدیلر که بو ایش، درآمدلرینی کوپهیتیریب و برقرار ایش زمینهسینی یرهتگن.
بامیان ولایتی «توبعلی شیبرتو» قیشلاغیده حیات کیچیرهدیگن عیاللردن بیری رقیهنینگ ایتیشیچه، اوشبو قیشلاقدهگی عیاللردن هر بیری ۱۳-۱۸ باش قوی سقلهب و ییلده سیزیلرلی درجهده یونگ ایشلب چیقرهدیلر. «هر ییل کوپینچه یونگ ییغهمیز، بوندن آلدین یونگدن فایدهلنیش توغریسیده درست آگاهیلیگیمیز یوق ایدی. دستلبکی اوسکونهلردن فایدهلنیش و مهارت گه ایگه بولمسلیک سبب یونگ خراب بولیب و آز قیمت گه ساتیلهر ایدی. آلگنیمیز تعلیملر بیلن حاضر ایسه یونگنی درست و پاک شکلده ییغه آلهمیز و عیاللردن قطاری یونگ ییگیریشنی هم اورگنیب و قالین توقووچیلرگه ساتهدیلر که درآمدی کوپ دیر.»
بامیان ولایتی «قلعهی گدا» قیشلاغیدهگی چاروهچی عیاللردن خدیجهنینگ ایتیشیچه: «بوندن آلدین سنتی اوسکونهلر بیلن یونگ ییغیش، هم قولگه زیان ییتیشتیرهر ایدی و همده قویلر تیریسینی یرهلنتیرهر ایدی. حاضر فنی تعلیملر بیلن بو ایش قولی بولگن و قیزلریمیز هم بو ایش نی اورگهنیب و ایپ ایشلب چیقرهدیلر.»
بامیان ده چاروهچیلیک ایش بیلرمانی عبدالصبورنینگ اورغولشیچه: «زمانهوی اوسکونهلردن فایدهلنیش و فنی تعلیملر، ضایع بولیشنی کمهیتیریب، یونگ صفتی آشیشی و ساتیلیش قیمتینینگ کوپهیشیگه سبب بولهدی. برقرار بازار بولیب و ییترلی حمایت بولگنی صورتده، عیاللر برقرار شکلده اوز مهارتلریدن فایدهلنه آلهدیلر.»
بیزلرنینگ فیسبوک صحیفهمیزگه باش اورینگ!
«آسو» ادارهسی مسئولی محمدرضا ابراهیمینینگ ایتیشیچه: «بامیان ده چاروهچیلیک کوچهیگنی و یونگنینگ خام منبعلریدن فایدهلنیش سبب یونگنینگ پروسس بولیشیگه توجه قرهتگنمیز. بو لایحهده ۵۶ عیال شرایط گه ماس تانیلگن که کیچیک اقتصادی فعالیتلر اوتکزیلیشی بیلن، عایلهلریگه درآمد منبعسینی یرهتسهلر.»
بامیان ایکینچیلیک، سووغاریش و چاروهچیلیک ریاستینینگ چاروهچیلیک آمری عبدالجبار خالدگه کوره: «بو ولایتده عیاللردن ۵۰-۶۵ فایزی چاروهچیلیک بولیمیده فعال دیر. محلی بازار و حتا تشقیده یونگ محصوللری ساتیلیشی اوچون یخشی پتانسیل بار و تعلیم بیریش، امکانیت یرهتیش همده مالی منبعلر و بازارگه قول تاپیش بیلن، عیاللرنینگ کیچیک کسب-کارلرینی رواجلنتیریش ممکن.»
مذکور لایحه، تعلیم زمینهسی و مناسب امکانیتلر یرهتیلیشی بیلن عیاللرنینگ نهفقط عایله اقتصادی، بلکیم جمعیت اقتصادیده هم فعال رول اوینهشی ممکن بولگنینی کورستهدی.
