هېچ بیر عیالنینگ حقوقلری شریعتنی بهانه قیلیب چېکلنیشی ممکن اېمس. چونکی دین انسانی قورقیتیش یا کی بویسوندیریش واسطهسیگه ایلنه باشلهگن زهاتی، اۉز ماهیتیدن اوزاقلشهدی. اگر دین ظلمنی آقلش قورالیگه ایلنسه، عینن شو حالتنینگ اۉزی دیننی توغری توشونیش و قیته ترتیب گه سالیش ضرورلیگینی کورستهدی.
اسلام دینی اۉز اصلیده انسانی معنوی کمالات گه یېتکلاوچی، اونی ایمان-اعتقاد، انصاف و عدالت گه چارلاوچی تحمل دینیدیر. او انسان قدرینی، اونینگ شأنی و حقوقینی اولوغلهیدی. اما افسوس کی، عینن اسلام نامی آرتیده صنعی روشده شکللنتیریلگن ایریم دینی آقیملر و عقیده پرست قرهشلر عیالنی شخص صفتیده قبول قیلمسلیککه اورینیب کیلماقده.
بوندهی یاندهشوولر عیالنی جیم توریشگه، شخصی حیاتی حقیده قرار قبول قیلمسلیککه، جمعیت ایشلریدن چیتده قالیشگه مجبورلهیدی. بو اېسه نهفقط انسان حقوقلریگه، بلکی اسلامنینگ ماهیتیگه هم آچیق-آیدین ضد دیر. نتیجهده، اۉزینی مسلمان دیب بیلگن جمعیت ایچیده هم چقور ضدیتلر و آغریقلی سواللر پیدا بولماقده.
۲۱-عصرده یشهیپمیز، اما حلی-هنوز عیال شریعت نامی بیلن چیزیلگن صنعی قالیپ ایچیده قالیشی کېرهکدیک تلقین قیلینهیاتگنی اچینرلی حالت. عیال – بویوم اېمس. او تربیهلنهدیگن، باشقریلهدیگن آبیکت (نرسه) هم اېمس. او مستقل تفکر گه، بیلیمگه، حیات اوچون جوابگرلیککه ایگه تولهقانلی شخص.
بوگون رواجلنگن مملکتلرده عیاللر ییریک بیزنسلر (تجارت)لرنی باشقرماقده، وزیرلیکلر، پارلمان و حتا جمهور باشلیغ لوازملریده دولت تقدیرینی حل اېتماقده. شوندهی بیر زمانده ایریم جمعیتلرده عیاللرنی حجاب یا کی نقاب آرتیگه مجبوری روشده «یشیریش»، اونینگ آوازینی اوچیریشگه اورینیشلر دوام اېتهیاتگنی حقیقتدن هم اویلنتیروچی حالت دیر.
آچیغینی تن آلیش کېرهک؛ عیال حقوقلرینی چېکلش آرقهلی دین حمایه قیلینمهیدی. دین عدالت بیلن، انصاف بیلن، اېرکینلیک و مسئولیت اویغونلیگی بیلن حمایه قیلینهدی. قچانکی عدالت استوار بولسه، اوشه جایده هم دین، هم جمعیت یوتهدی.
عیال اېرکین نفس آله آلگن، اۉز فکرینی ایته آلگن، قرار قبول قیلیش حقوقیگه ایگه بولگن مملکتده ایمان هم مستحکم بولهدی، ترقیات هم. چونکی حقیقی دین قورقوده اېمس، آنگلی تنلاوده، حرمت و عدالتده یشهیدی.
