لوگر مرکزی پلعلم شهریده چاروهچیلیک بولیمیده ایش بیلن شغللنگن عیاللردن قطارینینگ سلاموطندار گه ایتیشلریچه، بیش ییلدن بویان چاروهچیلیک بیلن شغللنیب و بو یول آرقهلی عایلهلرینینگ اقتصادی نیازلرینی تامینلهیدیلر.
اولرنینگ کوپهیتیریشلریچه، هر کونی چاروهلریدن ۲۰ کیلوگرام سوت قولگه کیلتیریب و اونینگ بازار گه ساتهدیلر؛ بیراق سوت پروسس قیلهدیگن مرکزلر کملیگی سبب، محصوللرینی آز قیمتگه ساتیشگه مجبورلر.
بو توغریده لوگر دهگی چاروهچی عیاللردن بیری صدیقهنینگ ایتیشیچه: «عیاللرنینگ هر کونی لبنیاتنی ساتیشدن ۶۰۰ دن ۸۰۰ افغانیگچه درآمدی بار. حاضر بیر سطل قتیق قریب ۲۰۰ افغانی ساتیلهدی. بو یول آرقهلی نهفقط اقتصادی قیینچیلیگیمیز بیراز حل بولهدی، بلکیم عایله اقتصادیده تورموش اورتاغیمیز یانیده فعال و فایدهلی حصه قوشهمیز.»
شونینگدیک بو توغریده لوگر ده چاروهچی عیاللردن باشقه بیری راحلهنینگ ایتیشیچه: «لبنیات ساتیش آرقهلی عیاللرنینگ بیراز یخشیراق فایده قولگه کیلتیرگنلری بیرحالده؛ بیراق لوگر لبنیاتیدن کوپینچهسینینگ ساتیلیش و پروسس اوچون کابل گه یوباریلیشی اینگ بویوک قیینچیلیک دیر. لبنیات لوگر ده ساتیلیب و پروسس بولگنیده، عیاللر درآمدی کوپراق بولهدی. گرچند عیاللردن قطاری لبنیاتنی سقلش و ییغیش توغریسیده آگاهیلیگی کوپ ایمس؛ لیکن تخصصی تعلیمی برنامهلر آرقهلی، اولرنینگ بیلیم سطحینی آشیریشگه نیاز بار.»
لوگر ولایتی برکی برک تومنی یشاوچیلریدن صالحهگه کوره، نیچه ییلدن بویان چاروه سقلش یانیده، لبنیات تولید قیلیش و ییغیش بولیمیده عایله ایرککلری بیلن بیرگه ایشلهیدی. اونینگ ایتیشیچه، چاروه سقلش و لبنیات تولید قیلیش آرقهلی، کونده یوزلب افغانی درآمدی بولیب و بو یولدن عایله نیازلرینی تامین قیلهدی.
صالحه، ایکینچیلیک، چاروهچیلیک و سووغاریش وزیرلیگیدن لوگر ده لبنیات ایشلب چیقریش و پروسس قیلیش مخصوص مرکزلری آچیلیشینی سورهگن. «ولایتیمیزده اونلب عیال جملهدن اوزیم، هر کونی اونلب کیلوگرام سوتنی تولید و بازارگه چیقرهمیز. حاضر بیر کیلوگرام سوت ۲۵ دن ۲۷ افغانیگه ساتیلهدی.»
شوندهی بیرحالده، لوگر یشاوچیلریدن عبدالحفیظنینگ ایتیشیچه، بو ولایت یشاوچیلریدن کوپ قطاری چاروهچیلیک بیلن شغللنیب، سوت، قتیق، چلاو و مسکه کبی اوشبو ولایت لبنیاتی، افغانستان ولایتلریدن کوپ قطاریده مخصوص شهرتگه ایگه دیر.
او، ایکینچیلیک وزیرلیگی و یاردم بیرووچی نهادلردن، لوگر مرکزی و تومنلریده سوت پروسس قیلهدیگن زمانهوی مرکزلر آچیلیشینی سورهگن. «لوگر ده سوت ییغیلیشیدن کیین، منظم پروسس مرکزلری آچیلگنیده و سوتنینگ لبنی محصوللرگه اوزگرتیریلگنیده، عایلهلردن کوپ قطارینینگ اقتصادی مستحکملنیب و باشقه کابل گه سوتنینگ یوباریلیشیگه نیاز بولمسلیگی ممکن.»
لوگر ایکینچیلیک، سووغاریش و چاروهچیلیک ریاستی اورینباسری محمدرفیع ابراهیمینینگ سلاموطندار گه ایتیشیچه، اوتمیشگه نسبت لوگر ده چاروهچیلیک سیزیلرلی درجهده کوپهیب و حاضر ۳۰۰۰ دن ۵۰۰۰ لیتر سوت پروسس اوچون کابل گه یوباریلهدی.
اونینگ کوپهیتیریشیچه، کمبغل عایلهلر اینیقسه عیاللردن کوپ قطاری، سوت تولید قیلیش اوچون چاروه سقلش بیلن، کوندهلیک نیازلرینی تامین قیلهدیلر. «لبنیات کمبغل عایلهلر اینیقسه عیاللر حیاتیده، ایجابی اوزگریشلرنی کیلتیرگن. گرچند ایکینچیلیک و چاروهچیلیک وزیرلیگی چاروهچیلرگه تورلیخیل یاردملرنی کورستگن؛ لیکن بو یاردم ییترلی بولمهی و اوشبو بولیمنینگ کوپراق کوچهیشی اوچون سعیوحرکتلر دوام قیلماقده.»
لوگر، یشاوچیلریدن قریب ۸۰ فایزی ایکینچیلیک و چاروهچیلیک بولیملریده ایش بیلن شغللنگن ولایتلردن بولیب و عایلهلر اقتصادی کوپراق بو ساحهلرگه تهینگن.
