فاریاب ده دهقان عیاللردن قطاری، سوو کملیگی و کیمیاوی کوددن فایدهلنه آلمسلیکدن شکایت قیلیب و ایتیشلریچه، هوا ایسیقلیگی، سوو کملیگی و دولت بیلن یاردم بیرووچی نهادلر آرقهلی یاردم ترقهتیلیشی کمهیگنی، اولرنینگ ایکینچیلیک فعالیتلرینی جدی قیینچیلیکلر بیلن روپهره قیلگن.
مذکور عیاللرنینگ اورغولشیچه، ییترلی حمایتلر یوقلیگی سبب، حاصللریدن اساسی بولیمی اورتهدن کیتیب و ایکینچیلیککه دوام بیریش توغریسیده قیزیقیشلری کمهیگن.
فاریاب دهگی ایکینچی و باغدار عیاللردن بیری سهیلا، اریقلر و دریا سووی قوریگنی کبی قیینچیلیکلردن خواطر بیلدیریب و ایتیشیچه، سوو منبعلری کمهیگنی و اصلاح بولگن اوروغلر همده کیمیاوی کوددن فایدهلنه آلمسلیک، اولرنینگ اساسی قیینچیلیکلریدن دیر.
بیزلرنینگ «ایکس» ترماغی ده هم تعقیب قیلینگ!
سهیلا، ایکینچیلیک حاصلاتی کوپهیشی و محصوللر کمهیشی آلدی آلینیشی اوچون دولت آرقهلی بو توغریده جدی شکده توجه قرهتیلیشینی ایستهگن. «ایکینچیلیک بولیمیده کوپینچه قیینچیلیکلر بیلن روپهرهمیز. امکانیتیمیز یوق که ییرلریمیز اوچون کیمیاوی کود ساتیب آلسهک. ییل اوتیشی بیلن قیشلاق سووی سطحی هم قویی کیلماقده.»
فاریاب دهگی دهقان عیاللردن باشقه بیری هنگامهنینگ ایتیشیچه، ۲۰ ییلدن بیری ایکینچیلیک بولیمیده فعالیت قیلماقده؛ لیکن سوو کملیگی و کیمیاوی کود یوقلیگی کبی قیینچیلیکلر بیلن روپهره دیر.
هنگامهنینگ کوپهیتیریشیچه، دهقان عیاللر مسلکی و پایدار شکلده فعالیت قیله آلیشلری اوچون دولت و نهادلر آرقهلی ایکینچیلیک بولیمیده تعلیمی، آگاهیلیک بیریلیش، کیمیاوی کوددن یخشی شکلده فایدهلنیش و ستندرد سووغاریش بوییچه برنامهلر اوتکزیلیشی کیرهک. «اینگ اساسی قیینچیلیگیمیز سونگی ییللرده سوو کملیگی و کیمیاوی کود دیر. بوندن آلدین بیراز یاردم بیریلیب و تعلیم بیریلهر ایدی، بیراق سونگی ییللرده هیچ یاردم بیریلمهگن.»
فاریاب ایکینچیلیک ایش بیلرمانلریدن احمدضیا دانشنینگ ایتیشیچه، عیاللر جمعیتنینگ یریمینی تشکیل بیرهدی؛ بیراق ایش فرصتلری یوقلیگی همده ملی و خلقارا نهادلر آرقهلی قوللب-قوتلنیش یوقلیگی، دهقان عیاللر آرهسیده کینگ شکلده خواطرلرگه سبب بولگن. «سبزهوات و ایکینچیلیک بولیمیده عیاللر اورنی مملکت اقتصادیگه کوپ تاثیری بار، چونکه اولر جمعیتنینگ فایدهلی بولیمی دیر. عایله سرپرستی بولگن عیاللر اوچون ایکینچیلیک کوپ یاردم بیرهدی.»
بیزلرنینگ فیسبوک صحیفهمیزگه باش اورینگ!
شوندهی بیرحالده، فاریاب ایکنیچلیک، سووغاریش و چاروهچیلیک ریاستی مسئوللرینینگ ایتیشلریچه، سونگی ییللرده مینگلب دهقان عیال گه تورلی ایکینچیلیک بولیملریده ایش و فعالیت زمینهسی یرهتیلگن. اولرگه کوره، همکار نهادلر هماهنگلیگی بیلن حمایتی برنامهلرینینگ دوامی بار و کیلهسی موسوملرده هم حمایتلری کوپهیتیریلیشی توغریسیده سعیوحرکت بولهدی.
فاریاب ایکینچیلیک ریاستی ترقیات بوییچه عمومی مدیری نجیبالله میرزایینینگ ایتیشیچه، ایکینچیلیک سکتوریده عیاللرگه امکانیت یرهتیلیشی و حمایت بولیشی مقصد، بو ریاست هماهنگلیگی و همکار نهادلرنینگ همکارلیگی بیلن، مذکور ولایت بویلب نیازمند دهقان عیاللرگه ۱۶۴ ته اوی باغچهسی یرهتیلگن. جناب میرزایینینگ کوپهیتیریشیچه: «اوشبو ولایتنینگ ایکینچیلیک ریاستی آرقهلی ۱۴۰۳-ییلده بیر قطار موسسه همکارلیگی و هماهنگلیگیده، قریب ۳ مینگ ۱۵۸ عیال تورلی ایکینچیلیک لایحهلردن فایدهلنگن.»
سوو کملیگی و قوروقچیلیک، افغانستان بویلب بیر قیینچیلیک حسابلنهدی و شونینگدیک فاریاب هم بو بحران بیلن روپهره دیر. هوا ایسیقلیگی کوپهیگنی و سوو منبعلری کمهیگنی، بو ولایتدهگی ایکینچیلر اینیقسه دهقان عیاللر اوچون جدی قیینچیلیکنی یرهتگن.
